Leeqkunaq tapukusqan

¿Imaynatan entiendenanchis watantinpi llank’asqanchismanta willakuyta?

Anuario qelqanchispi teqsimuyuntinpi llank’asqanchismanta willakuytan llapanchispas ñawpaqta qhawarinchis. Anchatan kusikunchis kay pachantinpi predicacionpas Bibliamanta estudiokuna qoypas astawan yapakusqanmanta yachaspa. Chay willakuyta allinta entiendenapaqmi allinta yachananchis sapanka filapi willakuykuna imapaq lloqsimusqanmanta. Wakinmanta yachasunchis.

Watapi llank’asqanchis. Ñawpaq wata llank’asqanchismanta willakuymi Anuario qelqanchispiqa lloqsimun. Chayqa yupakun setiembre killamanta agosto killakaman. Chaymi Anuario 2011 qelqanchispiqa kashan 2010 watapi llank’asqanchismanta willakuykuna, chayqa qallarirqan 2009 watapi 1 setiembre killapin, tukupurqantaq 2010 watapi 31 agosto killapi.

Publicadorkuna. “Publicador” nispaqa nikun bautizasqa mana bautizasqa predicaqkunatan. ¿Ima ninatan nin “máximo de publicadores” nispa? Chaypiqa lloqsimun huk killapi llank’asqanchismanta hayk’a informekuna chaskisqankun. Sichus chay killapi huk publicador mana informenta qonmanchu chayqa manan yupasqachu kanqa, otaq ñawpaq killapi mana informasqanmanta chay killapi iskayta informanman chayqa iskay kutitan yupanqaku. Chaykuna mana kananpaqmi sapa killa predicasqanchista informananchis. ¿Imaynatan yupakun “promedio de publicadores” nisqata? Watantinpi sapa killa informekunatan yupakun, chaytataq 12 killakunapi t’aqakun.

Hayk’a hora predicasqanchis. Qayna wata 1.600 millones horas predicasqanchistan Anuario 2011 qelqanchispi willakushan. ¿Chhayna horallachu Diosta yupaycharqanchis? Manan. Chaypiqa manan willakunchu umallikuna iñiyninkupi kallpachanankupaq cristianokunata visitasqan, huñunakuyninchiskunaman risqanchis, sapallanchispi Bibliata estudiasqanchis, yuyaymanasqanchispas.

Gastokuna. 2010 watapin Jehová Diospa testigonkuna precursor especialkunapi, misionerokunapi, iñiq t’aqata watukuqkunapi ima gastarqanku 155 millones de dolares nisqamanta astawanraq. Ichaqa sapaqtan gastakurqan qelqanchiskuna lloqsimunanpaq, 20.000 masraq Beltel wasipi llank’aqkunapipas.

Hanaq pachapaq akllasqakuna. Chaypiqa Jesuspa Wañusqanta Yuyarina p’unchaypi t’anta mikhuqkuna, vino ukyaqkuna hayk’a kasqankutan willan. Chhaynaqa, ¿chaypi hayk’a kasqankumanta llapallankuchu hanaq pachapi suyakuyniyoq kanku? Manan. Wakinqa ñawpaqpin huk religionniyoq karqanku otaq yuyayninkupi mana allinchu kashanku, chaymi hanaq pachapaq waqyasqa kanakupaq yuyaykunku. Manan yachanchischu hayk’araqmi kashan hanaq pachapaq akllasqakunamanta, manataqmi chaytaqa yachananchisraqchu. Umalliq T’aqaqa manan huk listapichu hap’ishan t’anta mikhuqkunaq vino ukyaqkunaq sutinta, manataqmi llapankuchu rimanakushanku.a

Ichaqa yachanchismi ‘Diosninchispa [akllasqan] kamachinkuna’ Diospa k’araq phiñakuynin chayamuqtin wakinqa kay pachapiraq kanankuta (Apo. 7:1-3). Chay p’unchay chayamunankaman teqsimuyuntinpi aparikusqan predicacionta umallishanku, chaytan yachanchis watantinpi llank’asqanchismanta willakuy lloqsimusqanpi.

[Uranpi willakuy]