Bibliaq yanapayninwan cambianku

“Unayñan tapukusharqani imapaqtaq kausayri, imapaqmi kaypi kashayku, nispa” (ROSALIND JOHN)

• ¿IMA WATAPIN NACERQAN? 1963 WATAPI

• ¿MAYMANTAN? GRAN BRETAÑA NACIONMANTA

• ¿IMAMANTAN WILLAKUSHAN? PAYQA ALLIN EDUCACIONNIYOQSI QHAPAQSI KASQA, ICHAQA SAQEPUSQAS CHAYKUNATA

ÑAUPA VIDAY:

Noqaqa Londres llaqtapi kaq Croydon llaqtapin nacerqani. Papaypas mamaypas Caribe nisqa ladopi San Vicente isla nisqamantan kanku. Noqaykuqa isqonmi kayku, noqaqa soqta kaqmi kani. Mamitayqa Metodista nisqa religionmantan karqan, noqamanmi ichaqa mana chaykunaqa gustawaqchu. Erqe kashaspaqa imaymanatan yachayta munaq kani. Vacacionpipas leespallan tiempota pasaq kani, juj qochaq ladonpi tiyaruspan librokunata leeq kani.

Escuelayta tukusqay manaraq unaychu kashaqtinmi noqaqa jujkuna yanapayta qallarirqani. Mana wasiyoqkunata, mana puriy atiqkunata, mana rimay atiqkunata iman yanapaq kani. Chaymantan ichaqa universidadman jaykuspa medicina nisqata estudiayta qallarirqani. Estudioyta tukusqay qhepamanqa allinmi imapas riwarqan. Allin llank’anakunapin karqani, allintan qolqetapas ganaq kani, gustoyman jinan kausaqpas kani. Jujkunata yanapanaypaqpas imaymanakunatan ruwarqani. Llank’anaypaqqa laptop nisqa computadorata, internet-ta imallan necesitaq kani. May munasqay llaqtamanmi riq kani, may munasqay hotelkunamanmi chayaqpas kani, chaypin askha semana qhepakuq kani. Chaypiqa kaqmi ejerciciota ruwana gimnasio nisqa wasikuna, masajes nisqakuna chaykuna jina imaymanakunapas, chaykunapin tiempota pasaq kani. Noqaqa tukuy imaypas junt’asqa kananpaqmi, manaña imapas llakichiwananpaqmi piensarqani. Ichaqa umallaypin sonqollaypin kasharqan pisichasqa wajcha runakuna.

BIBLIAQ YANAPAYNINWAN CAMBIAPUNI:

Unayñan tapukusharqani “imapaqtaq kausayri, imapaqmi kaypi kashayku”, nispa. Ichaqa manan jayk’aqpas Bibliataqa qhawaykullarqanipaschu. Juj kutinmi jaqay 1999 watapi sullk’a hermanay Margaret juj amiganpiwan visitamuwasqaku. Paykunaqa Jehová Diospa testigonkunan kasqaku. Amiganqa munay llamp’u sonqon kasqa, mana reparakuspallan noqaqa “ya” nirusqani Biblia estudianaykupaq, jinan estudiayta qallarirqayku. Ichaqa manan facilchu noqapaq kasharqan, llank’anaymi, imayna vida apasqaymi nishuta tiempota qechuwasharqan.

2002 watapin Inglaterra nacionpi uray ladopi kaq llaqtaman astakurqani runakuna yanapaymanta astawan estudianaypaq. Chaypiqa sapa kutillanmi wawaywan kuska juñunakuykunaman riq kani. Universidadpiña estudiarqani chaypas, allin educaciontaña chaskirqani chaypas manan yachasqanichu imaraykupunis kay kausaypi ñak’ariy kan chayta, imaynapis chaykuna tukupunqa chaytapas. Bibliata estudiaspañan allinta chaykunataqa entienderqani. Mateo 6:24 textoq nisqanpas allintan yuyayniyta kichariwarqan. Chaypi nisqan jina, “manan pipas iskay patrontaqa serviyta atinmanchu”. Arí, Diostawan qhapaq kaytawanmi ajllakunay kasharqan. Jujninmanmi vidayta qonay kasharqan.

Chay wata ñaupaqtaqa sapa kutillanmi riq kani juj hermanoq wasinta, chaypin juj hermanokunapiwan estudiaq kayku ¿Existe un Creador que se interese por nosotros?a nisqa librota. Chay estudiokuna aparikusqanpin allinta entienderqani imaynas llapa sasachakuytapas, llapa ñak’ariytapas Jehová Dioslla allichanqa chayta. Chay wata universidadpi kashaqtiymi ichaqa niwaqku “kusisqa kausanapaqqa manan Diospiraqchu creena” nispa. Manan chayta sonqoy chaskiyta atisharqanchu, chaymi iskay killallaraq chaypi estudiashaspa lloqsipurqani, jinaspa astawan tiempota qokurqani Diosta reqsinaypaq, paywan amigontin kanaypaq.

Imayna vida apasqayta cambianaypaqqa Proverbios 3:5, 6 texton yanapawarqan, chaypin nishan: “Tukuy sonqoykiwan Jehová Diospi confiay, amataq qan kikiykiq yachasqallaykimanchu jap’ipakuy. Tukuy ima ruwasqaykipi payta yuyariy, paymi allin kaq ñanta reqsichisunki”, nispa (TNM). Manan ima yachasqaykipas ima estudiasqaykipas ni qhapaq kaypas igualanmanchu ancha munakuq Jehová Diosta reqsiymanqa. Kay pachapaq Diospa imachus munasqanta, imaraykuchus Jesuspa wañusqanta allinta yachasqaymi yanapawarqan Diosman vidayta entreganaypaq. Jinan 2003 watapi abril killapi bautizakapurqani. Chaymantapachan pisi-pisimanta imaymanaykunata pisiyachipurqani.

BENDICIONKUNA CHASKISQAY:

Dioswan amigo kaytaqa manan imawanpas rantiyta atiwaqchu. Kunan payta reqsispayñan thaj kausani, sonqopas sonqo kausani. May munaymi payta serviqkunawan tiempota pasaypas.

Maytapunin gustawan Biblia leeypas juñunakuykunaman riypas. Gustawanmi yachasqayta jujkunaman willaypas, chaymi 2008 watapi junio killamantapacha tukuy tiempoywan chayta ruwashani, precursor jinan Diosta servishani. Chayta ruwaspan runakunata yanapashani allinta kausanankupaq, paraisoman jaykunankupaq ima. Manapunin jayk’aqpas kunan jina kusisqaqa karqanichu. Maytan Diosta “gracias” nini khayna munay vida qowasqanmanta.

“Amigoypa wañupusqanqa sinchi llakikuymi noqapaqqa karqan” (ROMAN IRNESBERGER)

• ¿IMA WATAPIN NACERQAN? 1973 WATAPI

• ¿MAYMANTAN? AUSTRIA NACIONMANTA

• ¿IMAMANTAN WILLAKUSHAN? PUJLLAYMANSI QOKUQ QOLQEPAQ IMAS PUJLLAQ

ÑAUPA VIDAY:

Noqaqa Austria ladopi Braunau llaqtapin nacerqani, juj católica familiapi. Llapa wasimasiyku runakunapas noqaykupas qhapaq familian karqayku, chayniqpiqa manan suwapas kaqchu.

Juj p’unchaymi 1984 watapi chunka jujniyoq wataypi kashaqtiy sinchi llaki chayamuwarqan. Juj munakusqay amigoymi accidentepi wañupusqa, paywanqa chay pasasqan ñaupaqllatan bolata jayt’asharqayku. Chay amigoypa wañupusqanqa sinchi llakikuymi noqapaqqa karqan, unay watakunan mana entiendeyta atirqanichu. Sapa kutillanmi tapukuq kani “imapunitaq wuñupuqtinchisri pasawanchis” nispa.

Escuelayta tukuspaqa luzkunata churaspan noqaqa llank’ayta qallarirqani. Pisi-pisimantataq pujllayman jaykurqani, chaypin mayninqa askha qolqeta apostaq kani, manan ancha nishutachu chaypiqa gastaq kani. Bolata jayt’aspa imaymana loco musicakunata uyarispa iman tiempota pasaq kani. Sinchi qhelli kausaytan apasharqani, discotecakunapi fiestakunapi imallan kaq kani. Tukuy ima munasqaytaña ruwarqani, chaypas ch’usaqmi sonqoyqa kaq.

BIBLIAQ YANAPAYNINWAN CAMBIAPUNI:

Juj kutinmi jaqay 1995 watapi juj kuraq wiraqocha punkuyta takamushasqa, payqa Jehová Diospa testigonmi kasqa, paymi qowarqan juj librota, chaypin nisqa “¿iman pasawanchis wañupuqtinchis?” nispa. Noqaqa chaskikurqanin chay librota. Amigoypa wañupusqanqa umallaypiraqmi kasharqan. Chay librota leespaqa manan wañuymanta rimaq partellatachu leerqani, llapantan leerqani.

Allintan entienderqani imaynas wañusqakuna kashanku chayta, ichaqa manan chayllatachu entienderqani, imaymanakunatawanmi yacharqani. Noqaqa católico familiapitaq uywasqa karqani chayqa Jesusllatan reqsirqani, Bibliata allinta estudiaspan ichaqa Jesuspa papan Jehová Diostawan reqsirqani. Yachasqayman jinan allinta entienderqani imaynas Diosqa munakuq, sumaq sonqo chayta; imaynas reqsinanchista munan chaytapas, chaykunata yachaymi mayta sonqoyta kusichiwarqan (Mateo 7:7-11). Entienderqanin imaynas mayninpi llakichisunman mayninpitaq kusichisunman chaytapas. Chaymantapas paypa siminqa manan jayk’aqpas cambianchu, chayta yachaymi kallpachawarqan Bibliapi profecía nisqakunata astawan estudianaypaq, chaykunan yanapawarqan Diospi astawan iñinaypaq.

Pisi-pisimantan repararqani imaynas Jehová Diospa testigonkunalla tukuy atisqankuta kallpachakunku runakunaman Bibliamanta yachachinankupaq chayta. Llapa leesqay librokunapi revistakunapi textokunatan anotakuq kani, chaytataq católico Bibliaypi maskhaq kani. Estudiasqayman jinan cuentata qokurqani Diospa llaqtanta, cheqaq religionta tarisqayta.

Chaymantapas Biblia estudiasqaypin repararqani imaynas Jehová Diosqa simin kasukunayta munan chayta. Efesios 4:22-24 textota leespan repararqani imaynas “ñaupaqpi imayna runa” kasqayta, imaynachus purisqayta wijch’upunay karqan chayta, imaynas “mosoq runa kaywan” “Diospa munayninman jina kamasqa” kaywan p’achakunay karqan chaytapas. Jinan noqaqa nirqani “saqepusaqpuni khayna millay kausayta” nispa. Manañan qolqe maskhaypichu karqani, ni apostana wasikunamanpas rirqaniñachu (1 Corintios 6:9, 10). Chaykunata saqenaypaqmi ichaqa reqsisqay runakunamanta, ñaupaq amigoykunamanta t’aqakapunay karqan, Diosta serviq runakunawantaq amigota ruwanay karqan.

Chay ruwayqa manan facilchu karqan. Ichaqa juñunakuyman rispan allin amigokunata tarirqani, paykunan yanapawarqanku. Chaykamaqa estudiashallaqmi kani Bibliataqa, imachus yachasqaypin piensaq kani. Chhaynapin pisi-pisimanta música uyarisqaytapas imakunachus munasqaytapas, imayna kausay apasqaytapas cambiapurqani. Chaymantataq 1995 watapi bautizakapurqani, chhaynapin noqapas Jehová Diospa testigon kapurqani.

BENDICIONKUNA CHASKISQAY:

Kunanqa allin yuyaywanmi qhawarini qolqetapas imaymanayoq kaytapas. Manañan ñaupaq jinachu jatun sonqo kani, manañan ratuchu imawanpas renegani. Chaymantapas manañan qhepa tiempoman imachus kanqa chaymantapas nishutañachu llakikuni.

May kusisqan kashani Diospa llaqtanpi kaspa. Arí, kusikunapaqmi mundontinpi hermanokuna ukhupi kayqa. Paykunaqa imaymana sasachakuypiña tarikunku chaypas manan Diostaqa saqenkuchu. Kunanqa manañan gustoyman jinachu imatapas ruwani, aswanpas Jehová Diospa munayninman jinan kausashani, jujkunata iman yanapashani.

“Chayraqmi kusisqa kausashani” (IAN KING)

• ¿IMA WATAPIN NACERQAN? 1963 WATAPI

• ¿MAYMANTAN? GRAN BRETAÑA NACIONMANTA

• ¿IMAMANTAN WILLAKUSHAN? PAYPAQQA MANAS KAY VIDA IMAPAS VALESQACHU.

ÑAUPA VIDAY:

Noqaqa Inglaterra nacionpin nacerqani, qanchis wataypi kashaqtiytaqmi Australia ladoman ripurqayku, chaypin Queensland llaqtapi kaq Gold Coast nisqa ladopi tiyarqayku. Manaña qhapaqchu karqayku chaypas manan imaykupas faltawaqkuchu.

Manaña imaypas faltawaqchu chaypas manan sonqoyqa kusisqachu kaq. “Imapaqtaq kay vidari valenman” nispan niq kani. Papayqa nishutan machaq, nishutan mamitaytapas sufrichiq, manan chhayna kasqan gustawaqchu, manan paypaq sonqoy kaqchu. Unaymantañan yacharqani imaynas paytaqa ejercitopi kashaqtin nishuta sufrichisqaku chayta, chayraqmi entienderqani imaraykus chhayna karqan chayta.

Noqapas chicollaraq kashaspan machayta yacharqani. Chunka soqtayoq wataypi kashaspan escuelata saqespa la Marina nisqaman jaykurqani, chayqa ejército jinan. Chay tiempopin mallirqani imaymana clase drogata, cigarro pitay vicio iman jap’ipuwarqan, nishutan machaqpas kani. Ñaupaqtaqa semana tukuy p’unchaykunallan machaq kani, chaymantan ichaqa sapa p’unchay machapuq kani.

Iskay chunka wataypi kashaqtiy jinan tapukuq kani “kantaq Dios chayqa, ¿imaraykutaq jinatari qhawan ñak’ariy kananta?, ¿imaraykun runakunapas wañun?” nispa. Poemakunata iman qelqaq kani, chaykuna qelqasqaypin Diosta tumpaq kani kay pachapi ñak’ariy kasqanmanta.

Iskay chunka kinsayoq wataypi kashaspan la Marina nisqamanta lloqsipurqani. Imaymanapin llank’arqani, juj wata junt’an askha llaqtakunata viajarqani, manapunin chaywanpas kusisqa kausaytaqa tarirqanichu. Manapas maymanpas rishaymanchu jinan kaq kani. Manan imapas sonqoyta kusirichiqchu. “Imapaqtaq imatapas ruwayman, imapaqtaq wasiyoqpas kayman, imapaqmi allin llank’anatapas maskhayman” nispan niq kani. Machayllamanmi qokuq kani, musicallatan uyariq kani.

Juj kutinmi Polonia nacionpi kasharqani, Auschwitz nisqa ladopi, runakuna ñak’arichisqanku carcelpi; chayqa jatun pampakunan kasqa. Noqaqa leerqanin imaynatachus mana juchayoq runakunata chaypi ñak’arichiqku chaymanta willaq librokunata. Chay kutipi chaypi kashaqtiymi ichaqa sonqoyraq nanariwarqan, manan tukuy ima rikusqay umayman jaykuyta atisharqanchu. “Imayniraq millaytaq runari chaytaq khaynaniraqtari runamasinta ñak’arichirqan” nisharqanin. Weqeykunaraqmi phawarimuwarqan, chhayna waqan-waqanmi may sonqo nanasqa nirqani: “¿Imaraykutaq kaykunari pasan, imaraykun kaykuna kan?” nispay.

BIBLIAQ YANAPAYNINWAN CAMBIAPUNI:

Jaqay 1993 watapin juj llaqtakuna viajasqaymanta kutimuspa Bibliata qhawayta qallarirqani, “imallatapas willashanpaschá” nispay. Chaypi kashaqtiymi punkuyta qonqaylla takaykamurqanku, Jehová Diospa testigonkunan kasqaku, paykunan juj asambleaman invitawarqanku, chay qayllapi kaq estadiopin aparikunan kasqa. Rirqanin noqaqa chay asambleaman.

Chay killakuna ñaupaqllatan noqaqa chay estadiota rirqani pujllay aparikusqanta qhawaq, kay kuti risqaypin ichaqa tukuy imapas jujniraypuni karqan. Testigokunaqa jujniraypunin kasqaku, sumaq sonqo, allin sonqo runakunan kasqaku, wawankupas allin portakuqmi kasqaku. Mijuna horas chayamuqtinmi noqaqa admirasqapuni qheparqani. Askhan pujllananku estadio pampapi mijurqanku, tiyanankuman kutipunankupaqmi ichaqa mana juj papelchallapas chay pampapi kasqachu. Astawanqa admirachiwarqan imayna paykunapura kausasqankun. Chaypiqa thajmi tukuy imapas karqan, chaytapunin noqaqa maskhasharqani. Manan yuyanichu, imakunatachá chaypi yachachiq hermanokuna rimakamurqanku kanpas, ichaqa chaypi Testigo hermanokunaq imayna qhawarinakusqankuqa, imayna kasqankuqa umaypin sellasqa jina qheparqan.

Wasiyman kutipuspaqa chaypin piensasharqani, chayllamanmi yuyarirqani juj kutin primoywan rimasqayta. Payqa allintan Bibliata reqsiq, allintan religionkunamantapas yachaq, chay kutin payqa niwarqan “Jesuspa nisqanman jinaqa, cheqaq cristianotaqa reqsinki rurusqanpin, imaynachus kausasqanpin” nispa (Mateo 7:15-20). Noqaqa allintan Testigokunata reqsiyta munasharqani, “imaraykupunitaq paykunari jujniray kanku” nisharqanin. Chayraqmi yuyayman kutimusharqani, laqha ukhupipas k’anchayta rikushayman karqan jinan kasharqan.

Chay semana qhepallatan asambleaman invitawaq Testigo hermanakunaqa kutimusqaku. “Bibliata estudiayta munawaqchu” nispan niwarqanku, noqaqa “ya” nirqanipachan. Juñunakuykunamanpas mana faltakuspan riyta qallarirqani.

Biblia estudiasqayman jinan manaña ñaupaq jinañachu Diosmantaqa piensarqani. Allintan entienderqani imaynas mana paychu juchayoq khayna millay kausay kananpaq, khayna ñak’ariykuna kananpaq chayta. Entiendellarqanitaqmi imaynas payqa mana allinkunata ruwaqtinchisqa llakikun chaytapas (Génesis 6:6; Salmos 78:40, 41). Chaymi sonqoypi jurarqani “tukuy atisqayta kallpachakusaq ama llakichinaypaq” nispa. Sonqonta kusichiytan munasharqani (Proverbios 27:11). Llapa mana allin ruwaytan saqepurqani, saqepurqanin cigarrotapas machaytapas. Chaymantataq 1994 watapi bautizakapurqani, Jehová Diospa testigonmi kapurqani.

BENDICIONKUNA CHASKISQAY:

Kunanqa kusisqan kashani, sonqoypas thajmi kashan. Manañan ima llaki kaqtinpas machaqchu phawani, aswanmi Jehová Diosmanta mañakuni, paymanmi saqeni (Salmos 55:22).

Chunka watañan casarasqa kashani, esposaypa sutinqa Karenmi, wawanpa sutintaq Nella. Kinsantiykun Diospaq llank’aypi kashayku, jujkunatan yanapayku Diosta reqsinankupaq. Chayraqmi sonqoyqa thaj kashan, chayraqmi kusisqa kausashani.