¿Yuyashankichu?
¿Leerqankichu kay killakunapi chayamuq Qhawaq revistakunata? Chhayna kaqtinqa, ¿kutichiwaqchu kay tapuykunata?
¿Imatan ruwasunman rimasqanchiswan “ninata” ama hap’ichinapaq?
Ñawpaqtaqa qhawarikunanchismi sonqonchispi imachus kasqanta. Huk iñiqmanta mana allinta yuyaykushanamantaqa, aswanpas t’aqwikunanchismi imarayku paymanta mana allinta rimasqanchista. ¿Allinpi qhepananchisraykuchu payta pisichanchis? Hukkunamanta mana allinta rimayqa astawanmi ch’aqwata hatarichin (15/8, 21 página).
¿Imakunan kanqa manaraq p’uchukay chayamushaqtin?
Kay pachapi kamachikuqkunan ninqaku: “Thak-kaypin kashanchis, allin waqaychasqan kashanchis”, nispa. Paykunan Hatun Babiloniata chinkachinqaku, chay qhepamantaq Diospa llaqtan contra sayarinqaku. Chaymi Armagedonqa chayamunqa hinan Saqrapas supayninkunapas chinkay-chinkay ukhuman wikch’uykusqa kanqaku (15/9, 4 página).
¿Imaynapin allinninchispaq p’uchukay p’unchay hayk’aqchus kasqanta mana yachasqanchis?
Chhaynapin rikuchiyta atinchis sonqonchispi imachus kasqanta, Diospa sonqon kusichiytapas. Kallpachawanchismi tukuy imata saqesparaq Diosta servinapaq, yanapawanchistaqmi Diospa Simin Qelqapipas astawan confianapaq, hinallataq sasachakuykunapas allin iñiyniyoq kananchispaq kasqanta (15/9, 24, 25 paginakuna).
¿Imaynatan Kamachikuy Simi rikuchin warmikunata Dios chaninpaq qhawarisqanta?
Kamachikuy Simiq nisqanman hinan Israel llaqtapi warmikunaqa paykunallamanta imatapas ruwayta atiqku, yachachisqataqmi kayta atiqku. Warmikunataqa respetananku, cuidanankun karqan, ancha chaninpaqtaqmi qhawarinanku karqan (1/10, 4-7 paginakuna).
Apocalipsis 1:16, 20 textoq nisqanpi hina, ¿pikunamanmi rikch’akun Jesuspa paña makinpi kaq ‘qanchis qoyllurkuna’?
Chay qoyllurkunan rikch’akun akllasqa cristiano umallikunaman hinallataq iñiq t’aqapi umallikunamanpas (15/10, 14 página).
¿Imaynatan Jesús rikuchirqan huch’uyaykukuq kasqanta Isaías 50:4, 5 textopi nisqan hina?
Chay texton willan Jesusqa ‘sayk’usqata siminwan kallpachananpaq’ yachachisqa kasqanta, ‘manataqmi qhepamanpas kutirirqanchu’. Yachayta munaspan Jesusqa huch’uyaykukuspa uyarirqan Taytanpa yachachisqanta. Jehová Diosqa huch’uyaykukuq kasqantan rikuchirqan huchayoq runakunata k’uyapayasqanpi, chaytan Jesusqa tukuy yuyaywan yacharqan (15/11, 11 página).