¿Hanaq pachaman ripunanpaqchu Jesús prometerqan mana allin runaman?

Jesusqa chay mana allin ruwaq runawan kuska kurkupi kashaqtinmi nirqan: “Cheqaqtan niyki, kunanmi ñoqawan kuska paraisopi kanki”, nispa; chaymantapachan chay tapuyqa rikhurirqan (Lucas 23:43). Ichaqa manan willarqanchu maypi chay paraíso kasqanta. Chhaynaqa, ¿nisharqanchu chaywan hanaq pachaman kuska ripunankupaq?

Ñawpaqtan qhawarisunchis hanaq pachaman rinanpaq hinachu karqan icha manachu chayta. Hanaq pachaman riq cristianokunaqa unumantawan Diospa espiritunmantawanmi bautizasqa kananku, chhaynapin Jesuspa discipulonman tukupunku santo espiritumanta nacesqankurayku (Juan 3:3, 5). Diospa munasqanman hina kawsananku, astawanqa rikuchinanku honrado kayta, allin yuyaywan puriyta, khuyapayakuq kaytawan (1 Corintios 6:9-11). Chaymantapas kay pachapi kawsayninku tukupunankaman Diospaq Jesuspaqpas hunt’aq kananku (Lucas 22:28-30; 2 Timoteo 2:12). Sichus chaykunata hunt’anqaku chayqa, hanaq pachapi sacerdotekuna reykuna hina kanqaku Cristowan kuska waranqa watata kamachimunankupaq (Apocalipsis 20:6).

Chay runaqa runa wañuchiqmi karqan, chhaynallapitaqmi wañupurqanpas (Lucas 23:32, 39-41). Ichaqa respetowanmi Jesusta valekurqan: “Qhapaqsuyuykipi [otaq Gobiernoykipi] hamuspayki ñoqamanta yuyarikuwanki”, nispa (Lucas 23:42). Ichaqa manan bautizasqachu karqan, nitaq santo espiritumantachu nacerqan, manataqmi kawsayninpi allin qhawarisqachu karqan. Chhaynaqa, ¿nirqanchu Jesús hanaq pachapi hunt’aq qatikuqninkunawan kuska kamachimunanpaq? (Romanos 2:6, 7.)

Kay rikch’anachiypi yuyaykuy. Qolqeykita suwakuq runan pampachayta mañakusunki hinaspa manaña quejamunkichu. Ichaqa chhayna runaman, ¿confiawaqchu negocioykita familiaykitapas cuidananpaq? Manan riki. Chaytaqa allin confianzayki runamanmi qowaq. Chaynallataqmi hanaq pachamanta kamachikamuqkunapas allin confianza runa kananku, Diospa nisqanman hinan chaytaqa ruwanqaku kay pachata kamachimunankupaq (Apocalipsis 2:10). Chay mana allin ruwaq runaqa tukuy sonqomantaña Jesusta valekurqan chaypas, manan confianapaq kasqanta rikuchirqanchu.

¿Jesús nirqanchu chay runata chay p’unchaypacha hanaq pachaman ripunankupaq? Manan. Jesusqa manan chaytaqa ninmanchu karqan, ¿imarayku? Payqa manan chay p’unchaypachachu hanaq pachaman ripurqan, aswanpas kinsa p’unchayta “hallp’aq sonqonpi” kasqanrayku (Mateo 12:40; Marcos 10:34). Chaymantapas kawsarimpusqanmantaqa 40 p’unchayraqmi pasarqan hanaq pachaman ripunanpaq (Hechos 1:3, 9).

Chhaynaqa, ¿maypin chay runa kawsarimpunqa? Kay hallp’apin, kay pacha sumaq paraisoman tukupuqtin (Hechos 24:15; Apocalipsis 21:3, 4). Astawan yachayta munanki paraisomanta chayqa, Jehová Diospa testigonkunawan rimay.