Diospa sonqonpas nananmi ¿imaynatan kusichisunman?

¿Waqarqankichu hayk’aqllapas imapas sinchita nanasuqtiyki?. . .a Yaqa llapanchismi chay hinapi tarikurqanchis. Ichaqa manan makinchis otaq chakinchis nanasqanraykullachu waqanchis. Ñoqanchismanta pipas llullakuspa rimaqtin, ¿nanachinmanchu sonqonchista?. . . Chhaynatan Diospa sonqonpas nanan pipas paymanta llullakuspa rimaqtin. Chaymantan kunan rimasun, yachasuntaqmi imatan ruwasunman Diosta kusichinapaq chaytapas.

Biblian willan ñawpa tiempopi runakuna, “Diostaqa munakuyku” nishaspapas sapa kutilla ‘llakichisqankuta’. Arí, sapa kutillanmi sonqonta nanachirqanku. ¿Imaraykun Diospa sonqon nanan mana kasukuqtinchis?

Diospa kamasqan runakunan anchatapuni Diosta llakichirqanku. Kay Hallp’ata kamaspan paykunata “Edén huertaman” churarqan. ¿Iman paykunaq sutin karqan?. . . Arí, Adán, Eva sutiyoqmi karqanku. Qhawarisun imatachus paykuna ruwasqankumanta.

Chay sumaq huertata qosqan qhepamanmi, Dios paykunata kamachirqan allinta cuidanankupaq. Nirqantaqmi wawakunayoq kanankupaq, wiñay-wiñaypaq kawsanankutapas. Ichaqa manaraq wawayoq kashaspan, huk llakikuy karqan. ¿Yachankichu ima sucedesqanta?. . . Huk angelmi Evata engañarqan Diosta mana kasukunanpaq, chay qhepamanmi Adanpas mana kasukullarqantaqchu. Chaymanta kunan yachasun.

Huk mach’aqwaypas rimapayashanman hinan chay angelqa Evata rimapayarqan. ‘Dios hinan’ kanki nisqanta uyarispan Evaqa chayta munapayarqan, nirqantaqmi chaypaq imatachus ruwananta, hinaspan Evaqa kasurqan. ¿Yachankichu ima ruwasqanta?. . .

Jehová Diospa hark’asqan sach’amanta frutatan Evaqa mikhurqan. Manaraq Evata kamashaspan Diosqa Adanta nirqan: “Atinkin huertapi llapa sach’a ruru mikhuyta, allinkaqta mana allinkaqta reqsichiq sach’a rurutan ichaqa ama mikhunkichu, chayta mikhunki chayqa, wañunkipunin”, nispa.

Evaqa yacharqanmi chay kamachikuyta. Ichaqa Evan “qhawarirqan sach’a ruruqa mikhunapaq sumaqllaña, munayllaña kasqanta [...]. P’itispataq mikhuykurqan”. Chay qhepamanmi Adanman qorqan, hinan “paypas mikhuykullarqantaq”. ¿Imaraykun Adán chayta ruwarqan?. . . Adanqa Evatan Diosmantaqa astawan munakurqan, chaymi chay frutata mikhurqan. Ichaqa Jehová Diosta kasukuymi aswan allinqa, riki.

¿Yuyashankichu Evata rimapayaq mach’aqwayta? Paypas Evata rimapayashanman hinan karqan, riki. Ichaqa hukmi chay mach’aqwayta muñecota hina rimachisharqan. ¿Pin chay karqan?. . . Payqa “ñawpa mach’aqway, saqra, Satanás nisqa karqan”.

¿Yachankichu imatan ruwanayki Diosta kusichinaykipaq?. . . Sapa kutilla payta kasukuspa. Satanasmi ichaqa mana munanchu Dios kasukunanchista. Chaymi Jehová Dios niwanchis: “Churilláy [otaq ususillay], yachayniyoq kay, hinaspa sonqoyta kusirichiway, chaymi k’amiwaqniyman kutichisaq”, nispa. ‘K’amiwaqniy’ nispaqa nishan Diosmanta burlakusqanta. Payqa kay hinatan nin: “Llapa runatan Diosmanta t’aqasaq”, nispa. Chayrayku kallpachakuy Diosta servinaykipaq kasukunaykipaqpas, chaywanmi payta kusichinki. ¿Kallpachakunkichu chayta ruwanaykipaq?. . .