¿YACHARQANKICHU?

¿Imaraykun Bibliaq qelqakusqan tiempopi runakuna p’achankuta llik’ikuqku?

BIBLIAN askha kutita willan wakin runakuna p’achankuta llik’ikusqankumanta. ¿Imaraykun chayta ruwaqku? Chay tiempopi judío runakunaqa chayta ruwasqankupin rikuchiqku llakikuyninkuta, pisichasqa rikukusqankuta, phiñakusqankuta, imatapas mana ruway atisqankuta ima. Kay tiempopiqa manan chay costumbre kanñachu.

Huk kutinmi Joseta wawqenkuna wañuchiyta munaqtin Rubén pakallapi yanapayta munarqan. Ichaqa mana yachashasqallan Joseta venderqontinkun, “p’achanta llakikuymanta llik’ikurqan”. Josemanta yachaspan taytan Jacobpas “p’achanta llakikuymanta llik’ikurqan”, “ima phiña animalchá Josetaqa llik’irqarispa mikhurqon”, nispa (Gén. 37:18-35). Jobpas llapa wawankuna wañupusqanta yacharqospan p’achanta llik’ikurqan (Job 1:18-20). Huk kutinmi huk runa “p’achanpas llik’i-llik’i” Elí sacerdoteman chayaspa willarqan maqanakuypi atipachikusqankuta, chaypi iskay churinkuna wañupusqankuta, rimanakuy arcata qechuchikamusqankutawan (1 Sam. 4:12-17). Josiaspas Kamachikuy Simi leesqankuta uyarispan llaqtaq huchallikusqanta yacharqorqan, hinan paypas “p’achanta llakikuymanta llik’ikurqan” (2 Rey. 22:8-13).

Jesuspa tiemponpipas uma sacerdote Caifasmi Jesuspa rimasqanta mana allinpaq qhawarispa, ‘phiñakuymanta p’achanta llik’ikurqan’ (Mat. 26:59-66). Kamachikuy Simita yachachiqkunan niqku, Diospa sutin contra pitapas rimaqta uyariqqa p’achanta llik’ikunan kasqanta. Ichaqa yupaychana wasi thunisqa kasqan qhepamanmi hukkuna niqku: “Kay tiempopi Diospa contranpi rimaqta uyariqkunaqa manañan p’achankuta llik’ikunankuchu. Chayta ruwanqaku chayqa, llapa p’achankun qhasu-qhasullaña kanqa”, nispa.

Jehová Diosqa, sonqonpi cheqaqtapuni llakikuspa p’achanta llik’ikuq runallatan allinpaq qhawarirqan. Chaymi Israel llaqtata nirqan: “Llakikuspa p’achaykichista qhasunaykichismantaqa sonqoykichista qhasukuychis. ¡Diosniykichis Señor Diosman kutirikuychis!”, nispa (Joel 2:13).