LEEQKUNAQ TAPUKUSQAN

¿Rinmanchu huk cristiano mana iñiq familianpa otaq reqsisqanpa casarakuyninman?

Casarakuykunaqa kusikunapaqmi, chaymi cristianokunapas chaypiqa kusikunku. Warmakunatawan invitakuqtinqa, tayta-mamanmi qhawarinqa imayna kananta wawakunataq kasukunanku (Efes. 6:1-3). Ichaqa, ¿imatan ruwanman huk cristiana mana iñiq qosan huk iglesiapi casarakuyman rinankupaq niqtin? Yaqapaschá cristianaqa chay casarakuypi mana participaspalla kananpaq decidispaqa, allillanpaq qhawarinqa chayman riyta.

Chhayna casarakuykunaman riyta otaq mana riytaqa, sapanka cristianon qhawarinan. Jehová Diosmanqa sapankanchismi cuentata qosun, chaymi manaraq decidishaspa Bibliapi wakin yuyaychaykunata qhawarina.

Llapa cristianopaqqa Diospa allin qhawarisqan kaymi aswan importanteqa. Jesusmi nirqan: “Diosqa Espiritun, payta yupaychaqkunaqa espiritupi cheqaq-kaypiwanmi yupaychanankupuni”, nispa (Juan 4:24). Chaymi Jehová Diospa testigonkunaqa mana participankuchu huk religionkunaq ruwayninkunapi, Bibliaq nisqanwan mana tupasqanrayku (2 Cor. 6:14-17).

Hinaspapas cristianoqa yuyaykunanmi, imaynatas hukkuna qhawarinqaku mana iñiqpa casarakuyninman risqanta. Rispaqa kaykunatan tapukunan: “¿Phiñakunqakuchu familiaykuna casarakuypi mana participaqtiy? ¿Imaynatan iñiqmasikuna qhawarinqaku?”, nispa (Rom. 14:13). Familiantinña allillanpaq qhawarinkuman chhayna casarakuyman riyta chaypas, ¿imaynan iñiqmasikuna sientekunkuman? ¿Mana allin ruwaqta hinachu qhawarinqaku?

Chhayna casarakuykunapiqa, costumbrenkuman hinan ruwanku. ¿Imatan ruwawaq noviata pusanaykipaq nisuqtiykiku? ¿Imatan ruwawaq mana iñiq qosayki otaq esposayki casarakuypi participanaykichispaq nisuqtiyki? Sichus consejopi casarakunqaku chayqa, juezpa nisqallantan uyarinki.

Iglesiapi casarakuy kaqtin otaq huk sacerdote casarachiqtinmi ichaqa aswan sasachakuyraq kanman. Chhayna kaqtinqa yaqapaschá mana rinkichu. Chhaynapin Dios contra ruwaykunamanta ayqenki otaq casarakuqkunatapas manaña p’enqachinkichu ima ruwasqaykiwanpas (Prov. 22:3). Sasachakuykunapi ama tarikunaykipaqqa, yaqapaschá ñawpaqmantaraq willawaq Bibliaq nisqanman hinalla imatapas ruwasqaykita. Willawaqmi imakunapi participanaykita, imakunapi mana participanaykitapas.

Chaykunata qhawarisqan qhepaman, yaqapaschá cristianoqa allillanpaq qhawarinqa mana iñiq familianpa otaq reqsisqanpa casarakuyninman riyta. Ichaqa, imatapas Diospa contranpi ruwananpaq hina qhawarikun chayqa, manachá rinqachu. Manaña rinqachu chaypas, yaqapaschá fiestallamanqa rinqa, ichaqa allin decidisqan kashanan ‘Diosta hatunchananpaq’ hina lliwta ruwananpaq (1 Cor. 10:31). Chaykunata decidispaqa, sapanka cristianon yuyarinan ‘Cristoq juzganan qayllapi’ kananta (2 Cor. 5:10). Imataña decidinki chaypas, aswan importanteqa Jehová Dioswan allinpi kaymi.