QALLARIYPI KAQ
¿Iman yanapasunkiman familiayki wañupuqtin?
“Ama waqaychu waway... Diosqa yachanmi chay allin kasqanta”
Rosaa sutiyoq warmimanmi chay simikunata ninrillanpi niranku papan wañupuqtin, papanqa juj accidentepin wañupuran.
Chay simikunata niqqa amigankun karan, paymantaqa allintan nisharan. Ichaqa chay simikunaqa yanapananmantaqa aswan maltan Rosataqa sientechiran. Payqa askha kutitan tapukuran: “¿Imaynapin allin kanman?”, nispa. Watakuna qhepamanmi chay simikunata juj libropi qelqaran, chaypin rikukun papan wañupusqanmanta sufrishasqantaraq.
Chaypin reparanchis familianchis otaq amigonchis wañupuqtinqa manan faciltachu qonqayta atisqanchista, astawanqa payta anchata munakusqanchisrayku. Bibliapas wañuytaqa kay jinatan sutichan: ‘Qhepallataña ch’usaqyachina auqa [otaq enemigo]’, nispa (1 Corintios 15:26). Wañuyqa mana pimanpas willaspan ladonchismanta munakusqanchis runakunata qechuwanchis. Manan pipas wañuymantaqa escapayta atisunmanchu. Chayrayku pipas wañuqtinqa mana ima ruwaytapas atinchischu.
Yaqapaschá kaykunata tapukuranki: “¿Jayk’a tiempotan necesitayman wañuqniymanta sonqoy tiyaykunanpaq? ¿Imatan ruwayman aguantanaypaq? ¿Imaynatan yanapayman wañuqninkumanta sufrishaqkunata? ¿Ima suyakuypas kanchu wañupuqninchiskunapaq?”, nispa.
a Sutinqa cambiasqan kashan.