Apocalipsis: Caballopi phawaqkuna

¡Qonqayllan rijuriramunku caballopi phawamushaqkuna! Chay parteta Bibliapi leespaqa rikushawaqpas jinataraqmi piensanki. Primerota phawamuq caballoqa yuraqmi, chaypi sillakuqtaq chayllaraq atiyta chaskiq rey. Iskay kaq caballoqa sansa color jina pukan, chaypi sillakuqtaq kay pachapi thaj kayta tukuchipun. Kinsa kaqqa tuta jina yana caballon, chay caballopi phawaqtaq juj balanzata altopi apashan. Rishaqtinmi juj willakuyta uyarikun yarqay kananmanta. Tawa kaqtaq q’elluniraq caballo, chaymi apamun onqoykunata wañuytawan. Chay caballopi phawaqtaqmi kikin wañuy, sepulturataq qhepallanta rin askha wañuqkunata oqoykushanmanpas jinataraq chaskispa (Apocalipsis 6:1-8).

Crystal nin: “Apocalipsis libropi caballopi phawamuqkunamanta chayllaraq leespayqa nishutan mancharikurani. Piensaranin juicio p’unchay chayamushananpaq, jinaspa mana preparasqa kasqayrayku wañunaypaq”, nispa.

Ed nin: “Anchatan gustawaq juj-juj colorniyoq tawa caballokunamanta Bibliapi leesqay. Imachus significasqanta yachaspayqa entienderanin imarayku chay jina willasqanta”, nispa.

Yaqapaschá mayqenninkuq nisqanwanpas acuerdopi kashanki. Apocalipsis libropi caballopi phawaqkunamantaqa yaqa llapa runan yachan. Qanqa beneficiakuwaqmi chay rijuriy imachus significasqanta entiendespaykiqa. Diosmi prometesunki chay libropi profeciakunata leespa, jinallataq chayta entiendespa chayman jina kausanki chayqa, kusikuy tarinaykita (Apocalipsis 1:1-3).

Apocalipsis libropi tawa caballopi phawaqkunamanta willakuyqa manchakunapaq jinan kanman wakin runakunapaq, ichaqa manan pitapas manchachinapaqchu qelqakuran. Aswanpas chay rijuriyqa millonninpi runakunatan iñiyninkuta kallpacharan, jinaspapas sumaq suyakuytan jamuq tiempopaq qoran. Kaqllatataqmi qanwanpas ruwanman. Qatimuq temapin astawan willashan.