¿Imaynatan beneficiasunkiman Diosta reqsisqayki?

Kaykama yachamusqanchisqa yanapawanchismi astawan Diosta reqsinanchispaq: Biblian yachachisqa Diospa sutinqa Jehová kasqanta, llapan cualidadninkunamanta munakuymi aswan importante kasqa, yacharunchismi imaymanakuna kamasqanmanta, imakunatan runakunapaq ruwanqa chaytapas. Imaymanakunaraqmi kashan Diosmanta yachananchisqa, ¿allinchu kanman astawan yachashallay?

Jehová Diosmi prometen maskhaqtinchisqa ‘tarichikunanta’ (1 Crónicas 28:9). Sichus kallpachakunki Diosta reqsinaykipaq chayqa, imayna juj tayta wawanwan amigontin kanku chhaynan qanpas Dioswan kanki (Salmos 25:14). ¿Imaynatan beneficiasunkiman Diosta reqsisqayki?

Kusisqan kausanki. Jehová Diosqa ‘kusisqa Diosmi’ (1 Timoteo 1:11). Sichus payman qayllaykunaykipaq kallpachakunki, ejemplontapas qatikunki chayqa cheqaq kusikuytan tarinki, saludniykipaqpas allinmi kanqa (Salmos 33:12). Diosqa yanapasunkin ama millay kausayman, viciokunamanpas urmanaykipaq, jujkunawanpas allintan kausanki. Qanpas salmista jinan ninki: “Noqapaq aswan allinqa Diospa qayllanpi kayniymi”, nispa (Salmos 73:28).

Diosqa cuidasunkin. Jehová Diosmi nin: “Noqan yuyaychasayki, noqan maynin purinayki ñanta yachachisayki”, nispa (Salmos 32:8). Chaywanmi niwashanchis pay kikinpuni sapanka serviqninkunata cuidananta, necesitasqankutapas qonantawan (Salmos 139:1, 2). Jehová Diospa amigon kanki chayqa, rikunkin yanapasqasuykita.

Sumaq suyakuymi kashan. Jehová Diosqa kay tiempopipas kusisqa kausaytan qosunki, jamuq tiempopiqa aswan sumaq kausaytaraq (Isaías 48:17, 18). Biblian nin: “Wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3). Diospa sumaq suyakuy qowasqanchisqa ancla jinan, “cheqaqpunitaqmi mana kuyuriqtaqmi kanpas” chaymi yanapawanchis kay sasa tiempokunapi aguantananchispaq (Hebreos 6:19).

Diosta reqsispa amigon ima kaspaqa askha beneficiokunatan chaskisun, kunanqa wakillanmantan yacharunchis. Astawan yachayta munanki chayqa, invitaykikun Jehová Diospa testigonkunawan rimanaykipaq otaq internetpi direccionniykuman jaykunaykipaq jw.org/quz.