¿Yacharankichu?

Ñaupaq tiempopi, ¿imatan pipas ruwanan karan barcopi viajananpaq?

APÓSTOL PABLOQ tiemponpiqa manan pasajerokunallata apaq barcokunaqa karanchu. Chaymi pipas munasqan llaqtaman viajananpaqqa cargakunata apaq barcokunata maskhaq, jinaspa valekuq viajananpaq (Hech. 21:2, 3). Manaña munasqan llaqtamanpunichu chay barco apaq chaypas, juj puertopi uraykuspan munasqan llaqtaman riq barcomanñataq wichaq (Hech. 27:1-6).

Chay tiempopiqa wakin killakunallapin barcokunaqa viajaqku, manataqmi yachakuqchu ima p’unchaychus lloqsinankuta. Barcota manejaqkunaqa imaymanapin creeqku. Ejemplopaq, sichus barconkuq patapi juj cuervo waqayta qallariq otaq lamar-qochaq cantonpi juj barcoq chhallusqa partekunata rikuruqku chayqa, manan chay p’unchayqa viajaqkuchu. Jinaspapas barcokunaqa wayraq phukusqallanwanmi puriqku, chaymi barcota manejaqkunaqa viajananku ladoman wayrallaqtin viajaqku. Jinan viajayta munaqkunaqa listollaña puertopi suyaqku imay ratochus barco lloqsinanta.

Ñaupaq tiempomanta yachaq Lionel Casson runan nin: “Pasajerokuna manaña sapanka barcokunata tapushanankupaqmi, Roma nacionpi puertokunapi puestokunata churaranku maymanchus mayqen barcopas rinqa chayta yachanankupaq. Jujnin kaq puertonqa Ostia llaqtaq qayllanpin tarikuran chaypin askha puestokuna karan. Chay puestokunaqa askha puertokunamantan karan: Narbona puerto, chayqa Franciapin tarikun, Cartago puerto, chayqa Tunezpin tarikun, juj puertokunapiwan. Barcopi viajayta munaqqa chay puestokunamanmi rinan karan tapukuq”, nispa.

Barcopi viajaspaqa aswan pisi tiempopin llaqtakunaman chayaranku, ichaqa peligroson karan. Apóstol Pablopas askha kutipin viajashaspa barcon t’ijrakuran (2 Cor. 11:25).