¿Yacharankichu?

¿Imakunatan mayordomokuna ruwaranku?

ÑAUPA tiempopi mayordomokunaqa patronninpa wasintan allinta qhawariqku.

Egipto llaqtapin Joseqa esclavo karan, jinan patronninqa wasinpi mayordomo kananpaq churaran. ‘Josemanmi jap’ichiran tukuy kaqninkunata’ (Gén. 39:2-6). José Egiptopi kamachikuq kapuqtinpas juj mayordomotan wasinpi churaran (Gén. 44:4).

Jesuspa tiemponpi qhapaq runakunaqa llaqtapin tiyaranku, chaymi moyordomokunata churaranku chajrankupi llank’aqkunata allinta qhawarinankupaq.

¿Imakunatan pipas ruwanan karan mayordomo kananpaq? Roma llaqtamanta Columela sutiyoq runaq nisqanman jina mayordomoqa rikuchinanmi karan allin experienciayoq kasqanta. Jinaspapas mayordomoqa mana pisichaspan llank’aqkunata allinta llank’achinan karan. Columela nillantaq: “Mayordomoqa manan yachaysapamanchu tukunan karan, aswanmi mana yachasqanta tapukunan karan”, nispa.

Bibliapin mayordomoq ruwasqanta comparan iñiq t’aqapi hermanokunaq ruwasqanwan. Chaymi apóstol Pedro niran: “Allin mayordomokunan kankichis, chayrayku maykamachus Diospa qokuyninta chaskisqaykichisman jina jujkuna-jujkunawan servinakuychis”, nispa (1 Ped. 4:10).

Jesuspas Lucas 16:1-8 textopin juj mayordomomanta willaran. Jinaspapas willaranmi rey jina chayamusqan tiempopaq ‘allin yuyayniyoq junt’aq kamachita’ otaq ‘allin yuyayniyoq junt’aq mayordomota’ churanan kasqanta. Paykunan llapa iñiqmasikunata tiempollanpi yachachinanku karan qelqakunawan juñunakuykunawanpas tukukuy tiempo chayamunankama (Mat. 24:45-47; Luc. 12:42). Maytan agradecekunchis mayordomota iñiyninchispi allin kashananchispaq askha qelqakunata ruwachimusqanmanta pachantinman apachisqanmantawan.