Leeqkunaq tapukusqan

Satanasmi Evata niran: “Allin kaqta mana allin kaqta reqsichiq sach’aq rurunta mijuspaqa manapunin wañunkichischu”, nispa. Chayta nispa, ¿mana wañuq almamantachu yachachisharan?

Manachus jina. Satanasqa manan Evata niranchu: “Allin kaqta mana allin kaqta reqsichiq sach’a ruruta mijuspaqa cuerpollaykin wañunqa, espirituykitaq kausashallanqa”, nispaqa. Aswanpas niranmi manapunin wañunkichu, chaywanqa willasharan kusisqa kay allpapi mana Diospa kamachisqallan tiyananmantan (Gén. 2:17; 3:3-5).

Chhaynaqa manataq mana wañuq almamanta yachachikuy Edén huertapichu paqariran chayqa, ¿jayk’aqtaq paqariranri? Manan sut’itapuniqa yachakunchu. Yachasqanchis jina, jatun parapin pantasqa religionqa chinkapuran. Chay tiempopiqa Noewan familianwanmi salvakuranku, paykunaqa Jehová Diostan adoraranku, chaymi manaña kapuranchu pantasqa religionpa yachachikuyninkunaqa.

Chhaynaqa mana wañuq almamanta yachachikuyqa jatun para pasasqan qhepamanmi rijuriran. Babelpi Jehová Dios runakunaq rimayninta pantachiqtinmi runakunaqa tukuy ladoman ch’eqeriranku, jinan mana wañuq almamanta yachachikuypas ch’eqeriran (Gén. 11:8, 9). Chay jinaqa manan yachanchischu jayk’aqchus chay llulla yachachikuy rijurisqanta. Ichaqa Satanasmi chay yachachikuytaqa rijurichiran, payqa anchatan kusikun tukuy ladopi runakuna chay yachachikuypi creesqankumanta (Juan 8:44).