Iñiymanta willakuy
1. ¿Imakuna kananmantan Jesús profetizaran?
1 Apostolkunaqa tukuy yuyaywanmi uyariranku Jesuspa qayllaykamunanmanta, kay pachaq p’uchukapunanmantawan willaq profeciakunata. Runakunan sinchita ñak’arinanku karan: hatun maqanakuykunawan, yarqaykunawan, pacha chhaphchiykunawan, hukkunawanpas. Cheqaq cristianokunan cheqnisqa, qatiykachasqa kananku karan; wakintaq wañuchisqa kananku karan. Llulla profetakunapas askha cristianokunata pantachinan karan. Yaqa llapa runakunaq munakuyninpas chiriyapunan karan.
2. ¿Imaraykun teqsimuyuntinpi allin willakuykunamanta predicay musphanapaq hinaraq?
2 Chaykunataq sucedenan karan chayqa, kaytapaschá Jesuspa yachachisqankuna tapukuranku: ¿Imaynatataq Diospa Reinonmanta allin willakuykunari pachantinpi predicakunqa? nispa (Mat. 24:3-14). Ichaqa kunanmi rikushanchis chay profeciaq hunt’akusqanta. Sasa tiempokunapiña kawsashanchis chaypas, Jehová Diospa testigonkunaqa kusikuywanmi allin willakuykunata willashanchis. Kay pacha runakunaq munakuyninqa chiriyapushanmi, ñoqanchispa munakuyninchismi ichaqa astawanraq yapakushan. ‘Lliw llaqtakunapiña’ otaq suyukunapiña cheqnisqa kanchis chaypas, llapa suyukunapin predicashanchis.
3. ¿Ima allin willakuykunata tarinchis Jehová Diospa testigonkunaq llank’asqankumanta willakuypi?
3 3-6 paginakunapin tarikun qayna wata Jehová Diospa testigonkunaq llankˈasqankumanta willakuy. Chayta t’aqwiymi kallpachawasun. Yachanapaq: 16 kutitañan mil millones horata predicashanchis, runakunamanpas yachachishanchis Jesuspa discipulon kanankupaq. ¡Chay willakuyqa allintapuni iñiyninchista rikuchin! Qayna wata año de serviciopaqmi yapakuran 5,8% precursorkuna, 3,1% publicadorkuna, 4,4% estudiokuna, 20,1% bautizasqakunapas. ¡Kusikunapaqmi yaqa qanchis millón runakunaña Jehová Diosta tukuy sonqomanta servishanchis! ¡Manan hayk’aqpas khaynataqa rikukuranchu! ¿Ima allin willakuykunatawanmi informepi tarinki?
4. ¿Imakunatan huk runa saqenan karan bautizakunanpaq?
4 Chay willakuykunaña musphanapaq hina chaypas, manan qonqananchischu runakunaq iñiynin rikuchisqanta. Guillermomanta yachasunchis, payqa Bolivia suyumanta. Paymi 1935 watapi naceran, isqon watachanmantapacha coca plantaypi llank’aran. Erqechanmantapacha cocata hallparan (akulliran) allinta llank’ananpaq. Tiempowantaq sinchita machayman tabaco pitaymanpas qokuran. Jehová Diosmanta yacharuspataq saqepuran tabaco pitayta machaytapas. Ichaqa sasatan saqeran coca hallpayninta. Jehová Diospa yanapayninwanmi atiparan. Vicionkunata saqespataq bautizakapuran. Paymi nin: “kunanqa cuerpoypas ch’uyan kusisqataqmi kanipas”, nispa.
5. ¿Imatan runakunapaq munanchis?
5 Jehová Diosqa anchatan runakunapi interesakun. Payqa huchankumanta kutirikapunankutan munan (2 Ped. 3:9). Kaqllatataqmi ñoqanchispas munanchis. Chayrayku, tukuy sonqomanta sumaq sonqo runakunata yanapananchis Jehová Diosman asuykunankupaq ñoqanchis hina munakunankupaqpas.