Umalliq T’aqaq qelqasqan carta
Munasqa wayqe panaykuna:
Apóstol Pabloqa rikuchillaqpuni wayqe panankunaman munakuyninta agradecekuynintapas. Yachanapaq, Roma suyupi tiyaq cristianokunamanmi khaynata qelqaran: ‘Llapallaykichismantan Jesucristoq sutinpi Diosniyman graciasta qoni, Jesucristopi iñisqaykichis kay pachantinpi willasqa kasqanmanta’, nispa (Rom. 1:8). Arí, qallariy siglopiqa, Roma suyuq llapa kamachisqan llaqtakunapin wayqe pananchiskuna allin reqsisqa karanku, allin takyasqa iñiyninkumanta tukuy sonqowan predicasqankumantapas (1 Tes. 1:8). Chayraykuchá apóstol Pabloqa anchata paykunata munakuran.
Ñoqaykupas apóstol Pablo hinan qankunamanta Jehová Diosman graciasta qoyku. Anchatapunin munakuykichis. Jehová Diospas sapankaykichistan munakusunkichis. Wakinniykichisña sinchi hark’asqa kankichis chaypas, predicashallankichismi. ¡Anchatachá Jehová Diosqa kusikun mana manchakuspa tukuy sonqowan yupaychasqaykichismanta! (Pro. 27:11.)
Sumaq kallpachaq Anuariota leesqaykichisman hina, yuyaymanaychis “Hechos de los testigos de Jehová de tiempos modernos” nisqa willakuypi. Chaypin reparanki imaynata Señor Jesucristo ‘atipaspa lloqsinña astawan atipananpaq’, reparallankitaq imarayku mana ima armapas qatikuqninkunata atipanmanchu chayta (Apo. 6:2; Isa. 54:17).
Apóstol Pabloqa Filipos llaqtapi tiyaq cristianokunamanpas kayta qelqaran: “Diosniyman graciasta qoni. [...] Allin willakuykunata willaypi llank’aysiwasqaykichismanta”, nispa (Fili. 1:3-5). Umalliq T’aqapi kaq wayqekunapas kaqllatataqmi qankunamanta niyku. 2007 watapi, 6.691.790 publicadorkuna predicaranku 1.431.761.554 horakunata 236 suyukunapi. ¡Anchatapunin kallpachakushankichis hinantinpi allin willakuykuna willasqa kananpaq! Huk nisqalla predicacionpi kallpachakusqanchiswanmi waranqanpi runakunata yanaparanchis, chhaynapin Jehová Diosta hatuncharanchis.
Tesalónica llaqtapi tiyaq wayqe panankunaman carta qelqasqanpin apóstol Pablo rikuchiran paykunamanta llakikusqanta, chaymi khaynata qelqaran: ‘Dios Yayanchispa ñawpaqenpin yuyarillaykupuni [...] Señorninchis Jesucristopi ancha pacienciawan [“aguantewan”, NM] suyakuyniykichismanta’, nispa (1 Tes. 1:2, 3). Arí, sasachakuykunaqa kallanqapunin, ichaqa aguantananchismi. ¿Ima sasachakuykunapin tarikushanki? ¿Sinchitachu llakikushanki onqosqaykirayku manaña ñawpaq hinachu Jehová Diosta servisqaykimanta? ¿Munakusqayki qosaykichu, esposaykichu wañukapun? (Pro. 30:15, 16.) ¿Casarakuyta munaspa manachu tarinki Jehová Diosta munakuq qosata otaq esposata, chaywanpas kallpachakushallankichu Señorpi iñiqllawan casarakuychis nisqa kamachikuyta kasukunaykipaq? (1 Cor. 7:39.) ¿Kallpachakushankichu pisichikuypi wawaykikunata uywanaykipaq? Munasqa wayqe panaykuna ima sasachakuypiña tarikunkichis chaypas Diosqa ‘manan qonqanqachu ruwasqaykichiskunata, [...] payta munakusqaykichistapas’ sichus Diospa Reinonta ñawpaqta maskhankichis chayqa. Chayrayku, ‘amayá allinkaqta ruwaspaqa sayk’uychischu’ (Heb. 6:10; Gál. 6:9).
Chhaynaqa, ¿iman yanapasunkichisman aguantanaykichispaq? Tesalónica llaqtapi wayqe pananchiskunata hina “Señorninchis Jesucristopi” suyakuyniykichis. Chayraykuchá apóstol Pabloqa qespichisqa kananchispaq ‘suyakuyninchista’ cascowan tupachiran, chaymi cristianokunataqa mana allin yuyaykuykunamanta, iskayaykunamantawan waqaychawasun (1 Tes. 5:8).
Sichus kusikuywan aguantankichis chayqa, Satanaspa churapakusqanmanmi kutichishankichis, payqa Diospa kamachikuq kaynin contra churapakuran. Jehová Diospa kamachinkunamantan Satanás nin: Paykunaqa imachus chaskinankuraykullan Diosta yupaychanku, munanqakuña yupaychayta chaypas, karunchakapunqakun sinchi sasachakuykunapi tarikuqtinku otaq millay kawsaypa mana usqhaylla tukukusqanta reparaqtinku, nispa. ¡Ruwayniykichiswanmi rikuchiwaqchis Saqraq llulla kasqanta! Chaymantapas, pisillañan tiempo kashan suyakuyniykichis hunt’akunanpaq.
Imayna apóstol Pablopas wayqe panankunata sumaqta kallpacharan aguantasqankumanta, allin takyasqa iñiyninkumanta, predicacionpi tukuy sonqowan yanapakusqankumantawan, chhaynatan ñoqaykupas kay cartawan allin ruwasqaykichismanta sumaqta kallpachamuykichis ancha munakuyniykutapas rikuchimuykichis. ¡Llank’ashallaychis!
Kay watapipas chaskishallaychis Jehová Diosmanta askha saminchaykunata otaq bendicionkunata. Ñoqaykuqa tukuy sonqowanmi munakuykichis.
Wayqeykichiskuna,
Jehová Diospa Testigonkunaq Umalliq T’aqa