K’anchayniykichis k’anchachun
1. ¿Ima ruwananchispaqmi Jehová Dios sumaq regalota qowarqanchis?
1 Illarimuymanta tardeyanankama intiq sumaq k’anchasqanqa Diostan hatunchan. Ichaqa Jesús qatikuqninkunaman k’anchaymanta rimaspaqa manan intiq k’anchayninmantachu rimasharqan, aswanpas ‘kawsay k’anchaymantan’ rimasharqan (Juan 8:12). Chay espiritual k’anchayqa Jehová Diospa sumaq regalo qowasqanchismi. ¿Ñoqallanchispaqchu chay regalota hap’ikunanchis? Jesusmi kutichin: “K’anchayniykichis runakunaq ñawpaqenpi k’anchachun”, nispa; chhaynaqa hukkunaq allinninpaqmi chayta utilizananchis (Mat. 5:16). Chaytan kunan usqhaylla ruwananchis astawanqa kay pacha laqhayaqpi tarikusqanrayku. ¿Imaynatan Cristo hina k’ancharisunman?
2. ¿Imaynatan Jesús rikuchirqan espiritual k’anchay ancha importante kasqanta?
2 Predicaspa. Jesusqa tiemponta, kallpanta, kaqninkunata iman qorqan kawsay k’anchayta runakunaman apananpaq. Chaymi wasin-wasinta, mercadokunapi, orqokunapi, runakunaq may tarikusqanpipas predicarqan. Payqa yacharqanmi espiritual k’anchay runakunaq ancha allinninpaq kasqanta (Juan 12:46). Chaymantapas askha runaman chayananraykun qatikuqninkunata yachachirqan ‘runakunapaq k’anchay kanankupaq’ (Mat. 5:14). Paykunaqa allintan k’anchayninkuta k’ancharichirqanku, chhaynapin runakunata yanaparqanku imaymanatataq Diosmanta yachachirqanku.
3. ¿Imata ruwaspan rikuchisunman espiritual k’anchay valorasqanchista?
3 Kay tiempopi Diosta serviqkunapas ‘k’anchaypi kasqankutan’ rikuchinku runakunaq may tarikusqanpipas predicaspa (Efe. 5:8). Mayninpiqa piwanpas parlayta qallarinapaqqa hukkunaq rikusqanmi llank’anapi otaq escuelapipas samana horaspi Bibliata otaq huk qelqatapas leesunman. Chhaynapin huk sipas iñiqmasinchispas estudiota tarirqan, hinallataq 12 librokunata compañeronkunaman saqerqan.
4. ¿Imaraykun allinta comportakunanchis k’ancharinanchispaq?
4 Allinta comportakuspa. Runakunaq ñawpaqenpi k’ancharinapaqqa allintan comportakunanchis (Efe. 5:9). Llank’anapi, escuelapi otaq maypipas allinta comportakusqanchistaqa runakunan reparanku, chhaynallapin hukkunawan Bibliamanta parlarisunman (1 Ped. 2:12). Phisqa watayoq wawaq allinta comportakusqanta qhawarispan, huk profesora tayta-mamanta waqyachispa nirqan: “¡Manan hayk’aqpas rikurqanichu huk wawa imachus allin imataqchus mana allin kasqanta entiendesqanta!”, nispa. Arí, predicasqanchispas allinta comportakusqanchispas runakunatan yanapan “kawsay k’anchayman” hamunankupaq, hinaspapas Diostan hatunchan.