Pacienciawanmi predicanchis
1. ¿Imaynatan Jehová Dios paciencianta rikuchin runakunaman?
1 Diosqa pacienciawanpunin runakunata tratan (Éxo. 34:6; Sal. 106:41-45; 2 Ped. 3:9). Chaytaqa sut’itan reparanchis pachantinpi Reinonmanta allin willakuykuna willachisqanpi. Jehová Diosqa yaqa iskay waranqa wata hinañan allin sonqoyoq runakunata pusamushan, kunankamapas chaytaqa ruwashallanmi (Juan 6:44). ¿Imaynatan ñoqanchispas predicacionpi rikuchisunman pacienciayoq kasqanchista?
2. ¿Imaynatan predicasqanchis cheqaspi rikuchisunman pacienciayoq kasqanchista?
2 Wasin-wasinta predicaspa. Mana uyariyta munaq runakunaq tiyasqan cheqaskunapi “sapa p’unchay” predicaspapas, rikuchinchismi Jehová Dios hina pacienciayoq kasqanchista (Hech. 5:42). Runakuna mana uyariwaqtinchispas asipayawaqtinchispas hark’akuwaqtinchispas pacienciakunchismi (Mar. 13:12, 13). Bibliamanta yachay munaqkunaman sapa kutilla kutispapas rikuchinchismi pacienciayoq kasqanchista, manaña mayninpi wasinkupi tarinchischu chaypas.
3. ¿Imanaqtinmi pacienciayoq kananchis revisitata ruwanapaq Bibliamanta yachachinapaqpas?
3 Estudiota qospa. Huk plantata wiñachinapaqqa pacienciakunan. Atisunmanmi unuwan hich’ayuspa sumaq cuidayta, ichaqa manan atisunmanchu usqhaylla wiñachiyta (Sant. 5:7). Chhaynatan estudiantekunapas pisi-pisimanta iñiyninkupi wiñarinku (Mar. 4:28). Paykunapaqqa manapaschá facilchu kanqa creenciankuta otaq costumbrenkuta saqepuy. Chhayna kaqtinqa, manan allinchu kanman usqhaylla cambianankuta munaspa mat’ipayayqa. Aswanpas pacienciakunanchismi, tiempotan qonanchis Jehová Diospa santo espiritun sonqonta kallpachanankama (1 Cor. 3:6, 7).
4. ¿Imaynatan pacienciayoq kay yanapawanchis mana iñiq familianchista predicanapaq?
4 Familianchisman predicaspa. Maytaña munanchis mana iñiq familianchis Jehová Diosmanta yachanankuta chaypas, pacienciawanmi suyanchis uyariy munasqanku tiempopi willarinapaq, ichaqa pisi-pisimantan chaytaqa ruwanchis manan hukpaqkamachu (Ecl. 3:1, 7). Chaymantapas imayna kawsasqanchiswanmi predicanchis kallpachakunchistaqmi llamp’u sonqowan ancha respetowan iñiyninchismanta willananchispaq (1 Ped. 3:1, 15). Sichus pacienciawan runakunata predicasun chayqa, atisunmi paykuna yanapayta Jehová Diostapas kusichiyta.