Umalli T’aqaq cartan
Munasqa wawqe-panaykuna:
Jehová Diosqa ancha munakuq tayta hinan, chaymi Biblian nin: “Diosqa munakuymi”, nispa (1 Juan 4:8). Payqa tukuy atiyniyoqña chaypas Simin Qelqapiqa manan ninchu: “Diosqa atiyniyoqmi”, nispa. Aswanpas payqa munakuywanmi kamachikamun, chaymi astawanqa payman asuykachiwanchis.
Jehová Diosqa manan capataz hinachu payta servinapaq kamachiwanchis, chayta yachaymi anchata kusichiwanchis. Payqa munakuywan servinanchistan munan. Chhaynapin rikuchisun chanin kaqwan munakuywan kamachiwananchista munasqanchista. Chaytaqa sut’itan rikunkun kay pachapi runa kamasqa kasqanmantapacha.
Diosqa manan hayk’aqpas Adanta Evatawan obligarqanchu kasukuq kanankupaq, aswanpas paykuna kikinku decidikunanku karqan. Sichus Diosta munakunkuman karqan chayqa paykunallamanta kasukuq kankuman karqan, manan Satanaswan kuska Dios contra hatarinkumanchu karqan.
Moisés manaraq wañupushaqtin huk discursonpi Israel llaqtaman nirqan: “Kunanmi ñoqa qankunaman willaykichis kawsaymanta wañuymantawan, hinallataq allin kaymanta mana allin kaymantapas Chhaynaqa, kunan qankuna akllakuychis”, nispa (Deut. 30:15). Israel llaqtataq paykunamanta akllakunanku karqan imayna kawsanankuta. Chhaynallatataqmi Josuepas Israel llaqtata nirqan: “Manataqchus Señor Diospa kamachin ruwayta munankichis chayqa, kunanpacha akllakuychis mayqentachus servinaykichista”, nispa. Llaqtataq kutichirqan: “Ñoqaykuqa manan hayk’aqpas Señor Dios serviytaqa saqeykumanchu”, nispa (Jos. 24:15, 16). Ñoqanchispas chhaynatan kutichinanchis. Jehová Diosta munakunchis chayqa manan hayk’aqpas saqenanchischu.
Cristianokunaqa allintan entiendenchis imachus kikillanchismanta akllakuy munasqanchista. Umallikunaña sumaqta anyawasunman otaq wanachiwasunman chaypas, manan kamachiwanchischu imakuna ruwananchista nitaq kawsayninchispi chapukunkuchu. Chaymi apóstol Pablo nirqan: “Iñiyniykichispiqa allin takyasqañan kashankichis, chaymi iñiyniykichispi mana kamachikuytachu munayku, aswanpas kusikunaykichispaqmi yanapaykuyta munayku”, nispa (2 Cor. 1:24).
Sonqomantapuni ruwaymi anchata kusichiwanchis kamachisqa hina ruwaymantaqa. Jehová Diosqa invitawanchismi munakuywan imatapas ruwananchista. Chhaynata ruwaqtinchisqa Pabloq nisqanta hunt’anchis, ninmi: “Tukuy kaqniykunata wakchakunaman rakiyman, cuerpoytapas ruphachinapaq hap’iykachikuyman, manataq munakuyniy kanmanchu chayqa, manan imapaqpas serviymanchu”, nispa (1 Cor. 13:3).
¡Jehová Diosmi anchata kusikun imayna waranqanpi runakuna sonqomanta servisqankuta rikuspa!
Jehová Diosqa llapanchistan munakuwanchis. Wawakunatapas, wayna-sipaskunatapas munakun, paykunaqa Jehová Diostan astawan munakunku kay pachapi imaymana ruwaykunata munakunankumantaqa. Ñoqaykupas anchatan qankunata munakuykichis (Luc. 12:42, 43).
Wawqe-panaykuna, wayna-sipaskuna Jehová Diosta munakusqaykichis rikukun chaymi qayna wata 1.748.697.447 horasta hina allin willakuykunata predicarqankichis. Munakusqaykichisraykun 7.782.346 iñiqmasikunan pachantinpi chay ruwaypi yanapakurqanku. Chaymi ancha kusikuywan 268.777 mosoq iñiqmasikuna, paykunamanta askha wayna-sipaskuna bautizakurqanku. Chaykunan rikuchiwanchis 5.168 sapa semanan bautizakusqankuta. ¡Chaykunaqa anchatan kusichiwanchis!
Kay tukukuy tiempopin Diospa llaqtanqa imaymana sasachakuypi tarikunchis, qatikachasqa, onqospa otaq yuyaqña kapuspa ima. Chaywanpas ama hayk’aqpas qhepaman ‘kutirinanchischu’ nitaq ‘pisipananchispaschu’ ¡Anchatan munakuykichis chay ruwasqaykichismanta! (Heb. 10:39; 2 Cor. 4:16.)
Iñiqmasiykichiskuna,
Jehová Diospa testigonkunamanta Umalliq T’aqa