¿Imaynatan wawaykita wanachiwaq?

SASACHAKUYKUNA

Wawaykiqa allintan yachan las diez tutakamalla wasiman chayamunanta ichaqa qayna p’unchaymi yapamanta las once tuta pasayta chayamun. Hinaspapas nirqankin las nueve tutataqa celularninkuta wañuchinankuta ichaqa ususiykitan kay semanapi iskay kutita tarirqanki celularninmanta mensajekuna apachishaqta, chaytan ruwashasqa kuska tuta pasaytaña.

Wawaykikunan mana kasukurqankuchu, chaywanpas yachanaykin imarayku mana kasusqasuykikuta. Manataqmi yuyaykunaykichu k’ulluman tukupushasqankutaqa.

¿IMARAYKUN MANA KASUKUNKUCHU?

Kamachisqayki mana sut’i kaqtin. Wakin wayna-sipaskunaqa maykamachus munasqallankuta ruwankuman chaytan yachayta munanku, chayraykun tayta-mamankuq nisqanta mana kasunkuchu. Sichus niwaq “mana kasuwankichu chayqa khaynapin tarikunki” nispa chayqa, yaqapaschá wawaykiqa rimasqaykita hunt’ankichus icha manachus chayta yachananpaq mana kasusunkichu. Chhaynaqa, ¿k’ullumanchu wawayki tukupushan? Manan. Tayta-mamanku mana sut’ita kamachiqtinku rimasqankutapas mana hunt’aqtinkun wayna-sipaskunaqa mana kasukunkuchu.

Mana allin yuyaywan ruwaqtiyki. Wakin tayta-mamakunaqa imaymanamantan wawankuta hark’anku, chaykunata mana kasuqtinkutaq phiñakuspanku astawanraq hark’anku. Ichaqa chayta ruwaqtinkuqa astawanmi mana kasukunkuchu. Tayta-mamakuna wayna-sipasyashaq wawankuwan allinta kawsanankumanta rimaq libron nin: “Tayta-mamakuna wawankuta astawan hark’aqtinkuqa astawanmi paykunaqa mana kasukunkuchu. [...] Chay ruwayqa ch’aki mantequillawan t’antata llusiy hinan, aswan kallpawan llusiqtiykin t’antaqa astawan ñut’ukapun”, nispa.

Wawakunata wanachiyqa allinmi. Ichaqa chayqa manan maqaychu, chayta ruwaspaqa ñak’arichinkin. Wanachiyqa tupan yachachiywanmi. ¿Imaynatan wayna-sipasyashaq wawaykita yachachiwaq kamachisqaykita kasukunanpaq?

KAYTAN RUWAWAQCHIS

Sut’ita kamachiy. Wayna-sipasyashaq wawakunaqa allintan entiendenanku imatachus ruwananku kasqanta, mana kasukuqtinkutaq imapichus tarikunankuta (Bibliaq yachachikuynin: Gálatas 6:7).

Kaytan ruwawaq: Ima kamachikuykuna churasqaykita anotay, hinaspa tapukuy “¿nishu askhachu otaq nishu pisichu?, ¿wawaypaq hinaraqchu wakin kamachikuykuna kashan?” nispa. Kamachisqaykita wawayki hunt’asqanman hinaqa wakintaqa cambianaykipaschá kanqa.

Nisqaykita hunt’allaypuni. Sichus qayna kutipi wawayki mana kasusqasuykimanta mana imatapas nirqankichu, kay kutipitaq yaqa kaqllata ruwasqanmanta wanachirqanki chayqa wawaykin mana entiendenqachu imarayku chhayna kasqaykita (Bibliaq yachachikuynin: Mateo 5:37).

Kaytan ruwawaq: Wawaykitaqa imapipas mana kasukusqanman hinan wanachinayki. Sichus wawayki imay horas wasiman chayamunanmanta aswan tardeta chayamun chayqa, wanananpaqmi kamachiwaq aswan tempranotaraq chayamunanpaq.

Allin yuyaywan ruway. Kasukuyta yachasqanman hina amaña nishutachu hark’ay imatapas ruwananpaq (Bibliaq yachachikuynin: Filipenses 4:5).

Kaytan ruwawaq: Wawaykiwan rimay wasipi kamachikuykuna kananmanta. Pay kikinpas ninmanmi mana hunt’aqtin imapi tarikunanta. Wayna-sipasyashaq wawakunaqa astawanqa kasukunku kamachikuykuna churakushaqtin paykunapas churaysikuspan.

Yanapay allin runa kanankupaq. Ama kamachikuykuna kasukunallantachu wawaykitaqa yachachiy, aswanpas yanapallaytaq allin concienciayoq kananpaqpas (qhaway “Yanapay sumaq runa kananpaq” nisqa recuadrota) (Bibliaq yachachikuynin: 1 Pedro 3:16).

Kaytan ruwawaq: Bibliapin aswan allin yachachikuykunaqa tarikun, chaypi maskhay yanapayta. Chaypi yachachikuyninkunaqa ‘warmakunatan yuyaysapaman tukuchin, waynakunatapas yuyaychaspan yuyayta hap’ichin’ (Proverbios 1:1-4).