¿Creenanchischu Trinidad yachachikuypi?

BIBLIAQA 100 watapaqqa hunt’asqañan karqan. Trinidadmanta yachachikuymi ichaqa 325 watapiña iglesiaq yachachikuynin hina rikhurimurqan, chayqa karqan Asia Menor ladopi Nicea llaqtapin (kunanqa Iznik llaqtan, Turquía nacionpi). Dios Salvador en los Padres de la Iglesia nisqa qelqan nin: “Iglesiaq ñawpa yachachikuyninkunaqa Nicea llaqtapin ruwakurqan”, nispa. Chaypin yachachikurqan pichus Diospas Cristopas kasqankuta. Ichaqa, ¿imanaqtintaq Diospas Cristopas pichus kasqankuta chayraq yachachikurqan iskay pachak wata masña Biblia hunt’asqa kashaqtinri? ¿Manachu Biblia sut’ita willan pichus Diospas Cristopas kasqanta?

¿JESUSCHU DIOS?

Roma nacionpi Constantino rey kasqan tiempopin cristianon kayku niq runakuna ch’aqwasharqanku Diosmanta Cristomantapas. ¿Diospa kamasqanchu Jesús karqan, icha paychu Dios karqan? Chayta allichananpaqmi Constantino reyqa Iglesiapi umallikunata waqyachimurqan Nicea llaqtapi huñukunankupaq, chaytaqa ruwarqan manan cheqaqta yachananpaqchu aswanpas kamachisqan runakuna mana t’aqanasqa kanankupaqmi.

Constantino reyqa chay kutipi huñukuq umallikunatan nirqan decidinankupaq, ichaqa yuyaykusqankutan mana tupachirqankuchu. Chaymi mana entiendekuq yachachikuyta rikhurichimurqan, chaypin yachachikurqan Jesusqa taytan kikillan kasqanta (griego simipi homoóusios nisqa). Kay yachachikuyqa Grecia runakunaq yachachikuyninman hinan kasharqan manataq Bibliaman hinachu, chay yachachikuypin saphichasqa kashan Trinidad yachachikuyqa. Yaqa tawa pachak watapaqqa Trinidad yachachikuyqa kunan tiempopi yachachikusqan hinañan kasharqan, santo espiritupas chay yachachikuypin hukllachasqa karqan.

¿IMARAYKUN CHAYMANTA YACHANAYKI?

Jesusmi nirqan: ‘Cheqaq adoraqkuna Yayata [...] cheqaq-kaywan adoranankuta’ (Juan 4:23; Mosoq Rimanakuy). Chay cheqaq kayqa Bibliapin tarikun (Juan 17:17). ¿Yachachinchu Biblia Taytawan, Churiwan, santo espirituwan dioskuna kasqankuta hinaspataq huk dioslla kasqankuta?

Bibliapiqa manan rikhurinchu Trinidad simiqa. Jesuspas manan hayk’aqpas nirqanchu “Diosmi kani” nispaqa. Aswanmi payqa Diosta yupaycharqan servirqanpas (Lucas 22:41-44). Kawsarimpusqan qhepamanpas Jesusqa qatikuqninkunatan nirqan ‘wawqeykuna’ nispa (Mateo 28:10). Paykunaqa manan tukuy atiyniyoq Diospa wawqenkunachu karqanku. Aswanpas Diospa wawankunan kapurqanku Cristopi iñisqankurayku, Jesuspas Diospa phiwi wawanmi karqan (Gálatas 3:26). Kunanqa rikusun Nicea llaqtapi yachachikuy horqosqanku Bibliaq yachachisqanwan tupanchus icha manachus chayta.

Nicea yachachikuypa nisqan:

“Diospa Churin Jesucristo Señorllapin iñiyku [...], Taytanmantan rikhurimurqan [...], Diosqa Diosmanta, k’anchay k’anchaymanta, cheqaq Dios cheqaq Diosmanta”.

¿Imatan Biblia yachachin?

• “Yayaqa ñoqamanta [Jesús] aswan kurakmi” (Juan 14:28)a

• “Ñoqan [Jesús] wichashani Yayayman Yayaykichisman, Diosniyman Diosniykichisman” (Juan 20:17)

• “Ñoqanchispaqqa sapan Dios Yayallan kan” (1 Corintios 8:6)

• “Señorninchis Jesucristoq Yayan Diosta yupaychasun” (1 Pedro 1:3)

• “Chay Amén [Jesusmi], [...] Diospa kamasqanpa qallariynin” (Apocalipsis 3:14, Mosoq Rimanakuy)b