Warmi-qhari puñuymanta

¿Huchachu mana casarasqa kashaspa warmi-qhari puñuy?

“Diosqa munanmi paypaq hina ch’uyatapuni kawsanaykichista. Chayrayku, ama pipas qhelli huchapi kawsaychischu” (1 Tesalonicenses 4:3)

¿IMA NINMI RUNAKUNA?

Wakin llaqtakunapiqa manan huchapaqchu qhawarinku mana casarasqa kashaspa warmi-qhari puñuyta. Wayna-sipaskuna munanakuspa q’apinakusqankutapas huk ladokunapiqa allinpaqmi qhawarinku.

¿IMA NINMI BIBLIA?

Diosqa serviqninkunatan nin: “Ama pipas qhelli huchapi kawsaychischu”, nispa (1 Tesalonicenses 4:3). ‘Qhelli hucha’ nispan Bibliapiqa nikun mana casarasqa kashaspa warmi-qhari q’apinakuykunata. Manaraq casarasqa kashaspa warmi-qhari puñuyqa wasanchay hucha, layqakuy, machay, ídolo yupaychay, runa wañuchiy, suwakuy ruwaykuna hina sinchi mana allinmi (1 Corintios 6:9, 10; Apocalipsis 21:8).

¿IMARAYKUN CHAYMANTA YACHANAYKI?

Biblian nin: “Qhelli huchapi puriqkunatan [...] Diosqa huchachanqa”, nispa (Hebreos 13:4). Ichaqa manan chayraykullachu kasukunanchis qhelli huchamanta karunchakunanchispaq Diospa kamachiwasqanchistaqa, aswanpas payta munakusqanchisraykun (1 Juan 5:3). Diosqa bendecinmi kamachikuynin kasukuqkunataqa (Isaías 48:18).

¿Huchachu kanman soltero warmi-qhari munanakuspa q’apinakusqanku?

“Qankuna ukhupiqa ama rimayllapas kachunchu qhelli huchapi puriymanta, tukuy mana chanin kaymanta, munapayaymantapas” (Efesios 5:3)

¿IMA NINMI RUNAKUNA?

Askha runakunan ninku: “Warmi-qhari puñuyta mana ruwaspalla soltero warmi-qharikuna munanakuspa q’apinakusqankuqa manan huchachu”, nispa.

¿IMA NINMI BIBLIA?

Bibliaqa manan qhelli hucha ruwayllamantachu riman, rimallantaqmi “millay qhelli ruwaykunamanta”, “mana p’enqarikuspa ruwaykunamantapas” (2 Corintios 12:21, NM). Chhaynaqa mana casarasqa kashaspa warmi-qhari munanakuspa q’apinakusqankupiqa kallantaqmi ‘millay qhelli ruwaykuna’, ‘mana p’enqarikuspa ruwaykunapas’, manaña warmi-qhari puñuyta ruwarqankuchu chaypas, chay ruwaykunaqa anchatan Diosta phiñachin.

Bibliaq nisqanman hinaqa casarasqakunallan munanakuyninkutaqa rikuchinakunanku. Bibliapiqa huchachakullantaqmi ‘millay munapayaykunata’ (1 Tesalonicenses 4:5). ¿Imatan chaywan nishan? Kaypi yuyaykusun: Yaqapaschá huk warmi otaq huk qhari yuyaykunman munakusqan runawan mana puñunanpaq ichaqa munanakusqankupitaq q’apinakunkuman. Manataq casarasqachu kanku chayqa mana ruwananku kaqtan munapayashanku, urmashankutaqmi ‘millay munapayayman’, chaytaqa Bibliaqa huchachanmi (Efesios 5:3-5).

¿Imaynatan qhelli huchamanta karunchakuwaq?

“Qhelli huchapi puriymanta ayqeychis” (1 Corintios 6:18)

¿IMARAYKUN CHAYMANTA YACHANAYKI?

Bibliaq nisqanman hinaqa mana casarasqa kashaspa warmi-qhari puñuypi kaqkunaqa manañan Diospa amigonchu kapunkuman (Colosenses 3:5, 6).

¿IMA NINMI BIBLIA?

1 Corintios 6:18 texton nin: “Qhelli huchapi puriymanta ayqeychis”, nispa. Chay nisqanta kasukusqanchistan rikuchisun tukuy qhelli huchaman apaq ruwaykunamanta karunchakuspa (Proverbios 22:3). Ch’uyata kawsayta munaspaqa Diospa kamachikuyninkunata mana kasukuq runakunamantan karunchakunanchis. Biblian niwanchis: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa (Proverbios 13:20).

Qhelli ruwaykunapi yuyaykuypas qhelli huchamanmi urmachiwasunman (Romanos 8:5, 6). Chayraykun mana qhawananchischu Diospa huchachasqan qhelli hucha ruwaymanta peliculakunata revistakunata nitaq uyarinanchischu mana allin takikunatapas (Salmo 101:3).