PACHANTINMANTA WILLAKUYKUNA

Internacional

Organización Mundial de la Salud nisqan willan warmikuna maltratay “huk onqoy hina pachantinpi astawan yapakushasqanta”. Ninmi: “Pachakmantan 35 warmikuna qosankuq otaq hukkunaq maltratasqanpuni kanqaku [...], warmikunaqa astawanqa qosankuq maltratasqanmi kanku, pachantinpiqa chhaynapin tarikunku pachakmanta 30 warmikuna”, nispa.

Gran Bretaña

64.303 runakunamanta 50.800 runakuna nirqanku: “Religionkuna kasqanraykun ñak’ariykunapas maqanakuykunapas kan”, nispa. 2001 watapin Inglaterra Gales llaqtakunapi yachakurqan pachakmanta 72 runakuna cristiano kasqankuta, 2011 watapin ichaqa pachakmanta 59 runakunalla. 2001 watapiqa pachakmantan 15 runakuna karqanku mana religionniyoq, 2011 watapaqmi ichaqa pachakmanta 25 runakuna.

China

Noticiakunapin willakurqan chay nacionpi huk leyta allichasqankuta, chay leypa nisqanman hinaqa machu-paya tayta-mamankutan sapa kutilla wawanku visitananku yanapanankupaq. Ichaqa manan “ima castigopas kanchu” chay leyta mana hunt’aqtinkuqa.

Europa

Aswan rantisqa kaq productokunatan falsificashanku, wakinmi kaykuna: ñawita simita silluta pintakunapaq kaqkunata, detergentekunata, mikhunapaq kaqkunatapas. Chaykunata controlaq empresamanta presidenten nin: “Askhata cuestaq productokunan astawanqa falsificasqa kankuman”, nispa. Chaykunamanta yachaq runaq nisqanman hinaqa, hatun nacionkunapiqa pachakmanta chunka productokunas falsificasqa kanku.