¿Iman kanman kawsayninchispi mana fracasay?

¿IMAN kanman fracasaymanta aswan peor? Fracasasqaykita mana reparakuymi. Pipas imapipas fracasaspaqa kallpachakunmi fracasasqanta allichananpaq, manaña allichayta atinmanchu chaypas kallpachakunmi qhepa kutipi manaña kaqta ruwananpaq.

Fracasashasqankuta mana reparakuqkunan ichaqa mana allinta ruwashaspapas allinta ruwashanankupaq qhawarikunku. Qhepaman reparakuspaqa yaqapaschá manaña allichayta atinkumanñachu.

Jesusmi nirqan: “Huk runachus kay pachantinpi lliw kaqkunata paylla hap’ikapunman kawsaynintataq chinkachikapunman chayqa, ¿ima allintaq paypaq kanqa?”, nispa (Mateo 16:26). Chayqa yuyarichiwanchischá runakunaq kay nisqanta: “Mana fracasaq kanapaqqa qolqeyoq kaqniyoqmi kana”, nispa. Chhaynata piensaqkunaqa q’otukushankun. Tom Denham runaqa hukkunatan yanapan ima profesionniyoq kanankupaq decidiyta, paymi nin: “Pichá afanasqalla kawsan aswan allin kananpaq qolqeyoq kaqniyoq kananpaq chayqa, manan tiempon kanchu thak kawsananpaq. Chhaynata kawsaqkunaqa qhepamanmi reparakunku manapas imatapas tarinkumanchu hinata”, nispa.

Askhan pay hina piensanku. Estados Unidospin runakunata tapurqanku: “¿Iman kanman kawsayninchispi mana fracasay?”, nispa. “Qolqeyoq kaymi” nispaqa pisichallan kutichirqanku. Aswan askhan kutichirqanku “qhalilla kaymi, hukkunawan allinta kawsaymi, gustawasqan trabajopi llank’aymi”, nispa.

Wakinqa reparanchismi imatachus ruwananchis mana fracasanapaq chayta. Ichaqa manapaschá reparasunmanchu decidinanchis ratopiqa.