Limpio kaymanta

¿Ima ninmi Dios cuerpopi limpio kaymanta?

“Tukuy qhelli kaqmanta ch’uyanchakusun aycha cuerponchispipas espiritunchispipas” (2 Corintios 7:1)

¿IMA NINMI BIBLIA?

Diosqa munakuwanchismi, chayraykun mana munanchu onqonanchista, aswanpas munanmi unay kawsananchista. Niwanchismi: “Kamachikuyniykunata sonqoykipi waqaychay, chaymi unayta kawsanki, anchatapunin t’ikarinki”, nispa (Proverbios 3:1, 2). Diosqa Israel llaqtamanmi kamachikuykunata qorqan cuerponkupi limpio kanankupaq, chhaynatan rikuchiwanchis munakuwasqanchista (Deuteronomio 23:12-14). Chay kamachikuykunaqa manan sasa hunt’aychu karqan, kasukuspaqa manan huk nacionkunapi hinachu onqoqku. Egipto nacionpiqa manan karqanchu cuerponkupi limpio kanankupaq kamachikuykuna (Deuteronomio 7:12, 15).

Kay tiempopiqa imaymana viciokunan aycha cuerponchista qhellichanman, wakinkunan kaykuna: tabacota q’awchiy, tragota ukyay, drogakuy, hukkunapas. Chaykunamanta karunchakuqkunaqa manan chay viciokunaq paqarichisqan onqoykunawan onqonkuchu, aswan unaytataqmi kawsankupas. Chaymantapas cuerponchispi limpio kaspaqa rikuchinchismi runamasinchiskuna munakusqanchista (Marcos 12:30, 31).

¿Imatan Dios nin kawsayninchispipas Dios serviyninchispipas limpio kaymanta?

“Kay pachapi lliw millay ruwaykunamanta t’aqakuychis, ama qhelli huchapi puriychischu [...], ama cuerpoykichispa munasqanta ruwaychischu, ama mana allinta yuyaykuychischu, ama munapayaychischu [...]. Chaykuna hawan mana kasukuqkunaman Diospa phiñakuyninqa chayamun” (Colosenses 3:5, 6)

¿IMA NINMI BIBLIA?

Bibliaqa niwallanchistaqmi “espiritunchispipas” limpio kanapaq. Jesuspa tiemponpiqa askha judiokunan hinallataq religionpi umallikunapas nishuta llakikuqku cuerponkupi limpio kanallankumanta, ichaqa kawsayninkupipas Dios yupaychayninkupipas manan limpiochu kasharqanku (Marcos 7:1-5). Chayta huchachananpaqmi Jesusqa nirqan runataqa mana mikhusqanchu qhellichasqanta aswanpas sonqomanta lloqsimuq qhellichasqanta, “runakunaq sonqonmantaqa lloqsimun: mana allin yuyaykuna, wasanchaykuna, qhelli huchapi puriykuna, runa wañuchiykuna, suwakuykuna, munapakuykuna, millay kaykuna, q’otuykuna, mana p’enqarikuykuna, lerq’opayaykuna [...], mana yuyayniyoq kaykunapiwan”. Tukuy chay mana allinkunan sonqomanta lloqsimun, chaytaq runata qhellichan (Marcos 7:18-23).

Jesuspa nisqanman hinaqa, sichus nishuta llakikunku cuerpollankupi limpio kanankupaq, Diospa kamachikuyninkunatataq mana kasukunkuchu chayqa, hawallanpi limpio vaso hinan kanku, ukhuntaq ichaqa qhellillaña (Mateo 23:25, 26).

¿Sasa hunt’aychu Diospa kamachikuyninkuna?

“Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu” (1 Juan 5:3)

¿IMA NINMI BIBLIA?

Miqueas 6:8 texto nin: “¿Imatataq Señor Diosqa ruwanaykita munan? Chanin kaqllatapuni ruwanaykitan, khuyapayakuqllapuni kanaykitan, Diosniykiq ñawpaqenpi huch’uyyaykukuspa kawsanaykitan”, nispa. Chay niwasqanchistaqa hunt’ayta atisunmanmi, ¿riki? Diosqa munakusqanchisrayku servinanchistan munan. Chhaynata servispaqa kusisqan kasunchis (Salmo 40:8). Pantasunmanña chaypas confiananchismi khuyapayawananchispi. Biblian nin: “Imaynan taytaqa wawankunata khuyayta munakun, ahinatan Señor Diosqa manchakuqninkunata khuyayta munakun”, nispa. “Payqa reqsiwanchismi imayna kasqanchista, yuyarikuwanchismi ñut’u hallp’a kasqanchista” otaq pantaq kasqanchista, chayraykun khuyapayawanchis (Salmo 103:13, 14).

Diosqa munakuwasqanchistan rikuchiwanchis cuerponchispi limpio kanapaq, kawsayninchispipas Dios serviyninchispipas ch’uya kanapaq kamachikuykunata qowasqanchispi. Kasukusqanchiswanmi rikuchisun imaynata munakusqanchista.