¿IMA NINMI BIBLIA?
Sufriymanta
Wakin runakunaqa ninkun “Diosmi sufrichiwanchis” nispa, otaq ninku “manan paymanqa imapas qokunchu sufrisqanchisqa” nispa. Ichaqa, ¿chaytachu Biblia nin? Yachasun.
¿Sufrichiwanchischu Dios?
“¡Diosqa manan hayk’aqpas mana allintaqa ruwanmanchu!” (Job 34:10)
¿IMA NINKUN RUNAKUNA?
Wakin runakunan ninku: “Hasta ichhupiwanpas Diospa munayninpin aytikun”, nispa. Chayraykun ima desgraciapas kaqtinqa ninku: “Diospa castigonmi chayqa”, nispa.
¿IMA NINMI BIBLIA?
Diosqa manan pitapas sufrichinchu. Sichus huk runa ninman “Diosmi wateqashawan otaq pruebashawan” nispa chayqa pantashanmi. Diosqa manan pitapas mana allinwanqa pruebaman churanchu (Santiago 1:13). Problemakunaqa anchatan sufrichiwanchis, sichus chaykunata Dios churawasunman chayqa mana allinta ruwaq Dioschá kanman, ichaqa Biblian nin: “¡Diosqa manan hayk’aqpas mana allintaqa ruwanmanchu!”, nispa (Job 34:10).
¿Manataq Dioschu sufrichiwanchis chayqa, pitaq sufrichiwanchisri? Mayninpiqa runamasinchispa huchanpin sufrinchis (Eclesiastés 8:9). Chaymantapas mayninpiqa qonqaymi ima desgraciapas otaq ima accidentepas pasawasunman (Eclesiastés 9:11). Ichaqa astawanqa ‘kay pachapi kamachikuqmi’ sufrichiwanchis, chay kamachikuqqa Saqra Satanasmi, Biblian willan ‘lliw kay pacha saqraq munaychakusqan kashasqanta’ (Juan 12:31; 1 Juan 5:19). Chhaynaqa Saqra Satanasmi sufrichiwanchis manan Dioschu.
¿Imallatapas sientenchu Dios sufrisqanchista rikuspa?
“Pipas qankunata tupaykuqqa ñawi ruruytan tupaykun” (Zacarías 2:8)
¿IMA NINKUN RUNAKUNA?
Wakin runakunaqa ninkun: “Diosqa manan imatapas sientenchu sufrisqanchista rikuspaqa”, nispa. Huk qelqaq runan nirqan: “Diosqa manapunin khuyapayawanchischu, chayqa sut’i reparaymi”, nispa. Nillarqantaqmi: “Kanña Dios chaypas manachá chhikallantapas sientenchu sufrisqanchista rikuspaqa”, nispa.
¿IMA NINMI BIBLIA?
Diosqa anchatan khuyapayawanchis sufrisqanchista rikuspaqa, hinaspapas payqa pisi tiempollamantan problemanchiskunata tukuchinqa. ¿Imaynapin chayta yachanchis? Yachasun.
Diosqa yachanmi sufrisqanchista. Runaqa ñawpa tiempomantapachan waqayllapi kawsan, Jehová Diosqaa reparanmi chaykunataqa. Diosqa rikumushanmi imaynapi tarikusqanchista (Salmo 11:4; 56:8). Yachanapaq, serviqninkunata sufrichishaqtinkun nirqan: “Allintan rikuni llaqtaypa [...] muchushasqanta”, nispa. Ichaqa manan rikullarqanchu, nillarqantaqmi: “Yachanitaqmi ñak’arishasqankutapas”, nispa (Éxodo 3:7). Manaña hukkuna yachankuchu nanayninchismanta chaypas Diosqa allintan yachan, payqa allintan entiendewanchis; chayta yachaspan askha runakuna thak sientekunku (Salmo 31:7; Proverbios 14:10).
Diosqa khuyapayawanchismi sufriqtinchis. Ichaqa Diosqa manan qhawayllachu qhawamun, payqa sientenmi nanayninchismanta. Biblian nin: “Pipas qankunata tupaykuqqa ñawi ruruytan tupaykun”, nispa (Zacarías 2:8). Jehová Diosqa kamaqninchismi payqa hatunchanapaqmi, chaywanpas sufriqtinchisqa paypas sufrishanman hinan sientekun, sonqonraqmi nanan. Chhaynataqa sientekun ‘ancha khuyapayakuq llakipayakuq’ kasqanraykun (Santiago 5:11). Hinaspapas yanapawanchismi llakikuyninchispi (Filipenses 4:12, 13).
Diosqa chinkachinqan sufrimientota. Diosqa gobiernonwanmi kay pachapi problemakunata allichanqa. Wiñaypaqmi runakunaq sufrisqanta chinkachipunqa. Prometewallanchistaqmi kaytapas: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 21:4). ¿Iman kanqa wañupuqkunamanta? Diosmi kawsarichimpunqa kay pachapi thak kaypi kawsanankupaq (Juan 5:28, 29). ¿Pillapas sufrinqachu kay kawsayta yuyarispa? Manan. Jehová Diosmi prometewanchis: “Ñawpaq sucedesqankunaqa qonqasqan kapunqa, manañan yuyarisqapasñachu kanqa”, nispa (Isaías 65:17).b
a Biblian willan Diospa sutin Jehová kasqanta.
b ¿Imaraykun Dios manaraq chinkachinchu runaq sufrisqanta? ¿Imatan ruwanqa chayta chinkachinanpaq? Chaykunamanta yachanaykipaq qhaway ¿Imatapunin Biblia yachachin? librota, 8, 11 capitulokunata. Chaytaqa Jehová Diospa testigonkunan ruwan.