¿IMA NINMI BIBLIA?
Maqanakuymanta
Tukuy tiempo runaq kawsasqanpiqa kallarqanpunin maqanakuyqa. ¿Chhaynallapunichu kanqa?
¿Ima ninmi Dios maqanakuymanta?
¿IMA NINKUN RUNAKUNA?
Religioso runakunapas hukkunapas ninkun: “Manan huchachu pipas millayta tratawaqtinchis millayta kutichiyqa”, nispa. Millonninpi runakunan maqanakuymanta peliculakunata televisionpi qhawanku.
¿IMA NINMI BIBLIA?
Irak nacionpin tarikun Mosul llaqta, chaypin tarikun Nínive hatun llaqtaq raqay-raqaynin, chayqa karqan Asiria nacionpa capitalninmi. Chay Nínive llaqta aswan allin kashaqtinmi huk profeta willarqan Nínive llaqtata Dios purunyachinanta (Sofonías 2:13). Nínive llaqtaqa reqsisqan karqan “runa wañuchiq” kasqanmanta, chaymi Dios castigarqan hukkunaq yachananpaq (Nahúm 1:1; 3:1, 6). Nínive llaqtaq raqay-raqay kasqanmi rikuchin Diosqa runa wañuchiqkunata cheqnikusqanta castigasqanta ima (Salmo 5:6).
Maqanakuytaqa Saqran paqarichirqan, Saqraqa Diospa enemigonmi runaq enemigon ima. Chaymi Jesuspas suticharqan “runa wañuchiq” nispa (Juan 8:44). 1 Juan 5:19 texton willan ‘lliw kay pacha saqraq munaychakusqan kasqanta’. Chaychá runakunaqa ima hinaraq munanku maqanakuyta. Diospa amigon kanapaqqa yachananchismi maqanakuy cheqnikuyta.a ¿Atisunmanchu chay ruwayta?
Diosqa “millay runakunatapas maqaylla maqaqkunatapas cheqnikunmi” (Salmo 11:5)
¿Maqakuq runa cambianmanchu?
¿IMA NINKUN RUNAKUNA?
Runakunaqa munanchispunin maqanakuyta, chay hina kasqanchistaqa manan cambiasunmanchu.
¿IMA NINMI BIBLIA?
Diosmi kayta kamachiwanchis: “Tukuy kaykunata saqepuychis: k’arak phiñakuyta, phiñasqalla kayta, millay-kayta, tumpayta, qhelli rimayta. [...] Millay ruwaykunatan wikch’upunkichisña, hinaspan mosoq runa-kaywan p’achawan hina churakunkichisña”, nispa (Colosenses 3:8-10). ¿Mana atinanchistachu Dios kamachiwanchis? Manan. Llapanchispas atisunmanmi cambiayta.b ¿Imaynata?
Ñawpaqtaqa Diostan allinta reqsinanchis (Colosenses 3:10). Allin sonqoyoq runaqa Dios imayna kasqanta reqsispa kamachikuyninkuna allinninpaq kasqanta yachaspa iman, Diosta munakuyta qallarin kallpachakuntaqmi sonqonpaq hina kawsananpaq (1 Juan 5:3).
Chaymantapas allintan amigonchiskunata akllakunanchis. Biblian niwanchis: “Ama phiñakuylla-phiñakuq runawanqa reqsinakuychu, ama saltaq sonqo runawanpas huñukuychu, paqtan imaynatachus kawsasqanta yachaqakuwaq”, nispa (Proverbios 22:24, 25).
Chaymantapas maqakuq runaqa pisi kallpa kasqantan rikuchin chaymi mana pay kikinta controlakunchu. Thakpi kawsaq runan ichaqa sonqonpi kallpayoq kasqanta rikuchin. Biblia nin: “Kallpasapamanta aswan allinqa mana usqhay phiñakuqmi”, nispa (Proverbios 16:32).
“Tukuy runawan sumaq kawsayta munaychis” (Hebreos 12:14)
¿Tukukunqachu hayk’aqllapas maqanakuy?
¿IMA NINKUN RUNAKUNA?
Kallarqanpunin maqanakuykunaqa manataqmi tukukunqapaschu.
¿IMA NINMI BIBLIA?
“Pisi tiempomantaqa chinkapullanqan millay runakunaqa [...]. Llamp’u sonqokunan ichaqa kay hallp’ata chaskinqaku, sumaq thak-nisqataq tiyakunqaku” (Salmo 37:10, 11). Llamp’u sonqokuna humilde runakuna thakpi kawsanankupaqqa Diosmi millay runakunata Nínive llaqtapi runakunata hina tukuchinqa. Chay hinapin thak-kaylla kay pachapi kanqa (Salmo 72:7).
“Llamp’u sonqoyoqkunaqa [...] kay pacha hallp’atan herenciapaq chaskinqaku” (Mateo 5:5)
Kunanmi tiempo kashan Dioswan allipunakapunanchispaq hukkunawan thakpi kawsayta yachananchispaqpas. 2 Pedro 3:9 texton nin: “[Diosqa] pacienciawan suyasunkichis, mana pitapas chinkananta munaspa, huchata saqespa payman llapa kutirikunankuta munaspa”, nispa.
“Espadankumantapas yapuna rejakunatan ruwakapunqaku, lanzankunamantapas ichhunakunatan ruwakapunqaku” (Isaías 2:4)
a Diospa munayninpin Israel llaqtaqa maqanakurqan qorpankuta respetachikunankupaq (2 Crónicas 20:15, 17). Ichaqa Israel llaqtan Diosmanta karunchakapurqan, chaymi Diosqa mana qorpayoq cristiano iñiq t’aqata paqarichirqan, chaymi manaña necesarioñachu maqanakunankuqa.
b Qhawaq revistapin lloqsimun “Bibliaq yanapayninwan cambianku” nisqa tema, chaypin tarinki askha runakunaq imayna cambiasqankumanta.