Sisiq kunkan

INGENIERO MECÁNICO nisqakunan anchata admirakunku sisikuna (k’isimira) cuerponkuq llasasqanmanta aswan llasataraq imatapas oqariy atisqankumanta. Chayta allinta yachanankupaqmi Universidad Estatal de Ohio (Estados Unidos) nisqapi ingenierokuna sisita radiografiata orqoranku (microtomografía computarizada, o micro TC). Chaymantapas investigarankun imaynapi cuerponmanta aswan llasata imatapas oqariy atisqanta. Tukuy chaykunawan yanapachikuspan computadorapi sisiq rijch’ayninta jina ruwaruranku cuerponta, imayna ruwasqa kasqanta, imayna funcionasqantawan estudianankupaq.

Sisikunaqa kunkankuwan yanapachikuspan siminkuwan ima llasakunatapas oqarinku. Kunkanpin tupashan wasa tullunkuna uma tullunwan, chay tullu ukhupitaq kan jank’ukuna jina. Chay tullukunawan jank’ukunawan iman simp’asqa jina kunkanpi jap’inasqa kashan. Juj ingenieron nin: “Chhayna jap’inasqa kasqanmi sisita yanapan kunkan kuyunanpaq. Tullunkunapas jank’unkunapas imayna jap’inasqa kasqanmi sisiq umanta wasanwan allinta jujllachan. Chaymi sisitaqa yanapashanman kunkanwan yanapachikuspa ima llasatapas oqarinanpaq”, nispa. Ingenierokunaqa astawanmi investigashanku imaynatapuni sisiq kunkan llasakuna oqarisqanta yachanankupaq, chaywan yanapachikuspa aswan allin robotkunata ruwanankupaq.

¿Ima ninkin chaymanta? Sisiq kunkan chhayna admiranapaq ruwasqa kasqan, ¿kikillanmantachu paqariran icha kamasqachu karan?