12 Imakunatas ruwayta munashanki chayta junt’ay

¿IMATAN CHAYPAQ RUWANAYKI?

Ima ruway munasqanchistapas junt’ananchispaqqa ñaupaqmantan allinta tanteakunanchis, juj chhikanta allinchana kaqtinpas allicharinanchis, tukuy atisqanchistataq llank’ananchis.

Wakin ruway munasqanchistaqa askha p’unchaykunapi, askha killakunapi, otaq askha watakunapin junt’asunman. Imachus ruway munasqayki unay tiempo kanqa chayqa, tanteanaykin sapa p’unchay sapa killa imakunatas ruwanki chayta.

¿IMARAYKUN IMACHUS RUWAY MUNASQAYKITA JUNT’ANAYKI?

Imachus ruway munasqaykita junt’anaykipaq kallpachakunki chayqa, juj ruwaykunatapas mana iskayaspan ruwanki, amigoykikunapas astawanmi qanpi confianqaku, aswan kusisqataq kankipas.

Mana iskayaspan imatapas ruwanki. Sichus pisi tiempopi imachus ruway munasqaykita junt’anki chayqa, unay tiempopi imachus ruway munasqaykitapas atinkin junt’ayta. Chaymantapas ima sasachakuykunatapas aguantankin.

Amigoykikunan qanpi astawan confianqaku. Llapanchispas munasunmanmi amigonchiskuna mana iskayaspa imatapas ruwanankuta, imachus ruway munasqankuta junt’anankutapas. Chaymantapas juj amigoykiwan imachus ruway munasqaykichista ruwankichis chayqa, allin amigontinmi kapunkichis.

Aswan kusisqan kanki. Imachus ruway munasqanchista ruwayta tukusunchis chayqa, aswan kusisqan kausasunchis.

Christopher nin: “Noqaqa sapa kutillanmi imaymanata ruwashani, chaymi yanapawan llank’ashanallaypaq. Ruwanaykunata tukuspayqa anchatan kusikuni”, nispa.

BIBLIAPIN NISHAN: “Wayrata qhawaqqa manan tarpunchu, phuyuta qhawaqpas manan cosechanchu”, nispa (Eclesiastés 11:4).

KAYKUNATAN RUWAWAQ

Imachus ruway munasqaykikunata tukunaykipaqqa kaykunatan ruwanayki:

Imakunatas ruwayta munashanki chaykunata qelqay. Llapanta qelqaspa qhawariy mayqenkunatas ñaupaqta ruwanki chayta.

Imaynatas ruwanki chayta qelqay. Chaypaqqa kaykunatan ruwanayki:

• Jayk’a tiempopis tukuyta munanki imachus ruwanaykita chayta qelqay.

• Imaynatas ruwanki chayta qelqay.

• Ima ruwaykunas sasa kanman chaykunata qhawariy, jinaspa piensay imaynatas chaykunata allichawaq chayta.

Llank’aytan qallarinayki. Imachus ruway munasqaykita qallarinaykipaqqa, manan tukuypas allin kanantaraqchu suyanayki. Aswanpas qhawarinaykin imatas ñaupaqta ruwanki chayta, jinaspa ruwayta qallarinayki. Chaymantapas imakunatas ruwarankiña chaytan qhawarinayki.

BIBLIAPIN NISHAN: “K’uchi runaq yuyaykusqankunaqa allinmankaman tukun”, nispa (Proverbios 21:5).