Munakusqanchis runa wañupuqtinqa sonqo nanaypin tarikunchis

Kostasmi nin: “Esposay Sofíaa wañupuqtinqa 39 watakunañan casarasqa kasharqayku; payqa sinchita onqospan wañukapurqan. Jinan wakin amigoykuna sumaqta yanapawarqanku, chaymantapas imaymanata ruwaspan ocupasqa kasharqani. Chaywanpas juj wata junt’an sonqoyqa sinchitapuni llakikuymanta nanawarqan. Esposaypa wañupusqanmantaqa kinsa wata jinañan pasarun, chaywanpas qonqayllan sonqoyqa phoq nin, jinaspa waqayta qallarini”, nispa.

¿Munakusqayki runakunamanta pillapas wañupurqanchu? Chhayna kaqtinqa yaqapaschá Kostas jina sientekurqanki. Familianchismanta pipas wañupuqtin otaq amigonchis wañupuqtinqa sinchitan sonqonchis nanan, manataqmi imanakuytapas atinchischu. Llakikuymanta estudiaq runakunapas chaytan ninku. The American Journal of Psychiatry revistapin nirqan: “Munakusqanchis runa wañukapuqtinqa nishutan llakikunchis, manan chhaynataqa imamantapas llakikusunmanchu”, nispa. Chhaynapi tarikuq runaqa tapukunpaschá: “¿Jayk’aqkamataq chhaynari kasaq? ¿Jayk’aqllapas jujmanta kusisqa kausasaqchu? ¿Iman sonqoyta tiyaykachinman?”, nispa.

Kay revistapin chay tapuykunamanta yachasun. Qatimuq yachachikuypin yachasun ima sasachakuykunapis tarikusunman munakusqanchis runa wañukapuqtin chayta. Chaymantapas yachasunmi imakunas yanapawasunman chay llakikuyninchiskunata atipananchispaq chaytapas.

Munakusqan runaq wañupusqanwan llakisqa runakunatan mayta munayku kallpachariyta yanapariytapas.