Runata Ruwan

¿IMATAN kay dibujopi huknirayta rikunchis? Arí, runakunata. Paykunan kanku ñawpaq qhari, ñawpaq warmi. ¿Pin paykunata ruwaran? Diosmi. ¿Yachankichu paypa sutinta? Sutinqa, Jehová. Qhariman Adán sutita churaran, warmimantaq Eva sutita.

Khaynatan Jehová Diosqa Adanta ruwaran: ñut’u allpata hap’ispan sumaq cuerpota ruwaran. Chaymanta senqanpi phukuykuran, hinaspan Adanqa kawsayta qallariran.

Diosmi Adanman huk llank’anata qoran. Kamachiranmi lliw animalkunaman sutita churananpaq. Unay tiempotapaschá Adanqa sapanka animalkunata allinta qhawaran llapanmanpas allin sutita churananpaq. Chayta ruwashaspa, ¿imatan Adán reparasqa?

Animalkuna iskaykama kasqanta. Llapanmi orqo-chinantin kasqaku, leonpas, elefantepas huk animalkunapas. Adanmi ichaqa sapallan kasharan. Chay raykun Jehová Diosqa Adanta misk’ita puñuchispa waqtanmanta huk tulluta horqosqa. Chay tullumantan Jehová Diosqa Adanpaq warmita ruwasqa.

¡Anchatan Adanqa kusikuran! ¡Evapas anchatachá kusikuran chay sumaq huertapi kawsananta yachaspaqa! Wawayoq kaspan paykunaqa kusisqa chay huertapi tiyananku karan.

Jehová Diosqa munaran Adanpas Evapas wiñaypaq kawsanankutan. Allpatapas Edén hina sumaq huertaman tukuchinankutan munaran. ¡Anchatachá kusikuranku Adanpas Evapas chay ruwanankuta yachaspa! ¿Yanapakuwaqchu karan kay Allpanchis sumaq huertaman tukunanpaq? Manan ichaqa unaychu Adanwan Evawanqa kusisqa kawsaranku. Kunanqa yachasunchis ima rayku.