Ima rayku Moisés ayqekuran

QHAWARIY Moisesta; Egipto suyumantan ayqekushan. ¿Rikushankichu qhepanta phawaq runakunata? ¿Ima raykun Moisesta wañuchiyta munanku? Chaymantan kunan yachasun.

Moisesqa wiñaran Egipto suyuta kamachiq Faraonpa wasinpin. Allin yachayniyoq respetasqa runan karan. Moisesqa yacharanmi mana Egipto suyumanta kasqanta, tayta-mamanpas kamachi israelitakuna kasqanta.

Tawa chunka watanpi kashaspan Moisesqa riran israelita masinkuna watukuq. Sinchitan ñak’arichisharanku. Huk egipcio runatan rikusqa israelita runa maqashaqta. Muyuriqninpi mana pitapas rikuspan Moisesqa chay runata maqaspa wañuchiran. Wañuchispataq aqo ukhupi pakaran.

Paqaristinmi Moisesqa rillasqataq israelita masinkuna watukuq. Manaña kamachi kanankupaqmi yanapayta munaran. Iskay israelitakunaq maqanakusqanta rikuspan, maqaqta niran: ‘¿Ima raykun wayqeykita maqashanki?,’ nispa.

Chay israelitan kutichiran: ‘¿Pin churarasunki kamachiwanaykikupaq anyawanaykikupaqpas? ¿Egipcio runata hinachu ñoqatapas wañuchiwanki?,’ nispa.

Chayta uyarispan Moisesqa mancharikusqa. Reparasqa egipcio wañuchisqanmanta runakunaq yachasqanta. Faraonpas uyarisqa, chaymi runakunata kamachisqa Moisesta wañuchinankupaq. Chay raykun Moisesqa Egipto suyumanta ayqekuran.

Egipto suyumanta lloqsispan Moisesqa karu llaqta Madianman ripuran. Chaypin reqsisqa Jetroq familianta, hinaspan casarakuran Zípora sutiyoq ususinwan. Jetroq ovejankunatan michipakuran. 40 watan Madián llaqtapi tiyaran. Ñan 80 watayoqña karan. Huk kutinmi Jetroq ovejankunata michishaspa rikusqa ancha musphanata, chaymantapacha kawsaynin hukniray kapuran. Hukkaq paginapi chaymanta yachasun.