Egipto suyupi kacharichiymanta Israelpi ñawpaq kamachiqkama

Moisesmi israelitakunata pusaran Egipto suyumanta Sinaí orqokama, chaypin Dios Kamachikuy simikunata qoran. Chaymantan Moisés kacharan 12 runakunata Canaán suyuta qhamiyamunankupaq. Chunka runakunan ichaqa mana allin willakuywan kutimuranku. Chayta uyarispan israelitakunaqa manchakuspa Egipto suyuman kutiyta munaranku. Mana iñiyniyoq kasqankumantan Diosqa israelitakunata muchuchiran 40 watata ch’inneq aqo pampapi.

Qhepataqa Josuetan Dios akllaran israelitakunata Canaán suyuman pusananpaq. Chay suyuta qechunankupaqmi Jehová Diosqa milagrokunata ruwaran. Jordán mayutan ch’akichiran, Jericó llaqtapi perqakunatan thunichiran, Intitapas ch’isiyaqtan sayachiran. Soqta wata qhepatan, Canaán suyuta runakunamanta qechuranku.

Josuewan qallarispan, 356 watata Israel suyupi juezkuna kamachiran. Askha juezkunamantan yachasun, Barac, Gedeón, Jefté, Sansón, Samuelmantawan. Yachallasuntaqmi Rahab, Débora, Jael, Rut, Noemí, Dalila warmikunamantapas. Kay KINSA Kaq T’aqapin willakun 396 watapi sucedesqanta.