Rahab qhamiyaqkunata pakan

KAY runakunaqa sasachakuypin kashanku. Ayqekunankun mana wañuchisqa kanankupaq. Qhamiyaqkunaqa israelitakunan, paykunata yanapaq warmitaq Rahab. Rahabqa tiyan Jericó llaqtaq perqa patan wasipi. Yachasun chaykuna imayna sucedesqanta.

Israelitakunaqa chinpanqakuñan Jordán mayuta, Canaán suyuman haykunankupaq. Manaraq haykushaqtinkun ichaqa Josué iskay qhamiyaqkunata kachan. Paykunatan nin: ‘Qhawamuychis allpata, Jericó llaqtatapas,’ nispa.

Jericó llaqtaman chayaspan qhamiyaqkunaqa Rahabpa wasinman haykunku. Kayta rikuspan Jericó llaqtapi kamachiqman willaranku: ‘Ch’isin hamunku iskay israelitakuna llaqtanchista qhamiyanankupaq,’ nispa. Chayta uyarispan, kamachiqqa Rahabpa wasinman kacharan iskay runakunata, paykunan Rahabta ninku: ‘¡Horqomuy wasiykipi qorpachasqayki runakunata!,’ nispa. Rahabqa wasi patanpin chay runakunata pakaran. Paymi nin: ‘Iskay runakunaqa hamurankun wasiyman, manan ichaqa yachanichu maymanta kasqankuta. Tutayashaqtinmi ripuranku llaqtapi punkuta manaraq wisq’ashaqtinku. ¡Phawaspaqa ayparunkichismi!’ nispa. Chaymi runakunaqa maskhaq phawanku.

Ripuqtinkun Rahabqa wasin pataman wichan. ‘Ñoqaqa yachanin kay allpata qankunaman Jehová Dios qonasuykichista,’ ninmi qhamiyaqkunata. ‘Uyariraykun Egiptomanta lloqsimushaqtiykichis Puka lamar-qocha ch’akichisqanta, Sehón, Og kamachiqkunatapas wañuchisqaykichista. Qankunata yanapasqay rayku, ama hina kaspa prometewaychis ñoqatapas yanapawanaykichispaq. Qespichiychis taytayta, mamayta, turaykunata, ñañaykunatapas,’ nispa.

Qhamiyaqkunaqa prometenku yanapanankupaq, ichaqa Rahabpas kasukunanmi paykunaq nisqanta. ‘Kay puka waskhata ventanaykimanta warkunki, familiaykitataq llapanta wasiykiman huñumunki. Jericó llaqtata hap’ikapunaykupaq kutimuspan, chay waskhata rikuspa mana pitapas wasiykipi kaqta wañuchisaqkuchu,’ ninkun llaqta qhamiyaqkunaqa. Kutispan qhamiyaqkunaqa Josueman willanku chaykunata.