Jordán mayuta chinpaspa

¡QHAWARIY! ¡Israelitakunan Jordán mayuta chinpashanku! ¿Maytaq unuri? Chay tiempopiqa nishutan paran, chaymi chay ñawpaqllata mayuqa hunt’a kasharan. ¡Kunanmi ichaqa mayu ch’akirapun! ¡Israelitakunataq ch’aki allpanta chinpashanku Puka lamar-qochata hina! ¿Maytaq mayupi unuri? Chaymantan yachasun.

Jordán mayuta israelitakuna chinpananku kashaqtinmi Jehová Diosqa llaqtaman Josuewan kayta willachin: ‘Sacerdotekunan Diospa rimanakuynin arcata apanqaku, paykunan ñawpaqenchista rinqaku. Jordán mayuta saruqtinku hinan unuqa ch’akinqa,’ nispa.

Chaymi sacerdotekunaqa rimanakuy arcata apaspa runakunaq ñawpaqenta purinku. Jordán mayuman chayaspan sacerdotekunaqa unuman haykunku. Hatunmi mayuqa, unupas nishuta phawashan. ¡Sacerdotekuna saruqtin hinan unuqa ch’akiyta qallarin! ¡Milagron kayqa! Wichaymantan Jehová Diosqa mayuta wisq’aramun. Chaymi ¡mayuqa ch’akin!

Rimanakuy arca apaq sacerdotekunan purinku ch’aki mayuq chawpinkama. ¿Rikushankichu dibujopi? ¡Chaypi sayaqtinkun israelitakunaqa ch’aki pampanta chinpanku!

Chinpayta tukuqtinkun Jehová Diosqa Josueta nin 12 kallpasapa qharikunata kayta kamachinanpaq: ‘Riychis, rimanakuy arca hap’iq sacerdotekunaq kasqankama. Chaymanta pallamuychis 12 rumikunata, chaytataq churaychis kay tuta samasqaykichispi. Chaymi, imapaqmi kay rumikuna nispa wawaykichis tapuqtinqa willankichis, Diospa rimanakuynin arca chinpashaqtinmi Jordán mayu ch’akiran, nispa. ¡Chay milagrotan rumikuna yuyarichinqa!’ Josuepas sayarichillantaqmi sacerdotekunaq sayasqanpi 12 rumikunata.

Chaymantan rimanakuy arca apaq sacerdotekunata kamachin: ‘Jordanmanta lloqsimuychis,’ nispa. Lloqsiqtinku hinan hukmanta mayuqa puririn.