Kamachikuy iskaypi t’aqakun

¿IMA raykun kay runa p’achata llik’ishan? Jehová Diosmi kamachiran kayta ruwananpaq. Kay runaqa Diospa profetan Ahiasmi. ¿Imataq profetari? Imapas sucedenanta ñawpaqmanta Diospa willasqanta willaq runan.

Ahiasqa Jeroboanwanmi rimashan. Jeroboanqa Salomontan yanaparan yupaychana wasi ruwaypi. Jeroboanwan ñanpi tupaspan, Ahiasqa mosoq p’achanta ch’utikuspa llik’in 12 retazokunapi. Jeroboantan nin: ‘Qanpaqmi kay 10 retazokuna kanqa,’ nispa. ¿Ima raykun chunkata qon Jeroboanman?

Kay profetan willan Jehová Dios Salomonmanta kamachikuy qechunanta. Qanmanmi qosunki 10 ayllukunata, ninmi. Iskay ayllukunallan qhepanqa Salomonpa churin Roboam kamachinanpaq, nispa.

Jeroboanman Ahiaspa nisqanta yachaspan Salomonqa sinchita phiñakun. Wañuchiytan munan, chay raykun Jeroboanqa Egiptoman ayqekun. Chay qhepamanmi Salomonqa wañun. 40 watan kamachiran, kunanqa churin Roboammi kamachikun. Egiptopi kashaspan Jeroboanqa uyarin Salomonpa wañusqanta, chaymi Israelman kutin.

Roboamqa mana allin kamachikuqmi. Taytan Salomonmanta aswan millaymi, sinchitan runakunata ñak’arichin. Jeroboanmi allin respetasqa runakunawan Roboamta ninku runakunata sumaqta qhawarinanpaq. Manan ichaqa uyarinchu. Aswan millaytaraqmi ruwan. Chay raykun Jeroboanta runakuna akllan 10 ayllupi kamachinanpaq, ichaqa iskay ayllutan, Benjaminta Judatawan Roboam kamachin.

Jeroboanqa manan munanchu kamachisqan runakuna Jerusalenta rispa yupaychana wasipi Jehová Diosta yupaychanankuta. Chay raykun qorimanta ruwan iskay torillokunata chunkantin ayllupi runakuna yupaychananpaq. Pisi tiempollapin q’oñirin millay kawsay.

Iskaynin ayllupipas kanmi sasachakuykuna. Manaraq pisqa wata Roboam kamachishaqtinmi, Egipto suyupi kamachikuq hamun Jerusalenpi runakunawan maqanakunanpaq. Askha qhapaq kaykunatan apan Jehová Diospa yupaychana wasinmanta. Chay rayku yupaychana wasiqa mana qallariypi hinañachu.