Mana allin kawsaypa tukukunanmanta

¿IMATAN kaypi rikushanki? Arí, maqanakuypaq yuraq caballokunapi sillaykusqa soldadokunata. Qhawariy, maymantan hamushanku. ¡Hanaq pachamantan phuyuq hawanta phawaylla urayamushanku! ¿Kanchu hanaq pachapi caballokuna?

Manan, kaykunaqa manan cheqaq caballokunachu. Caballokunaqa manan phuyuq hawanta phawayta atinkuchu. Biblian ichaqa willawanchis hanaq pachapi caballokunamanta. ¿Yachankichu ima rayku?

Huk tiempopiqa caballokunapin riranku maqanakunankupaq. Chaymi Bibliaqa willan caballokunapi angelkuna hanaq pachamanta urayamusqankuta, chaymi rikuchiwanchis kay Allpapi runakunawan Diospa maqanakunanta. ¿Hayk’aqmi chay maqanakuy kanqa? Armagedonpin, chay maqanakuypin millay runakunaqa wañunqa.

Jesusmi umallinqa Armagedonpi maqanakuyta. Yuyariy, Jehová Diosmi Jesusta akllan Kamachikuq kananpaq. Chaymi Jesusqa coronayoq kashan. Espadanmi rikuchin Diospa awqankuna wañuchinanta. ¿Musphananchischu millay runakunata Diospa wañuchinanmanta?

Maskhay 10 Willakuyta. ¿Imatan rikunki? Arí, hatun Millp’uq Para Unuta, chaypin millay runakuna wañushanku. ¿Pin parachiran? Jehová Diosmi. Kunanqa qhaway 15 Willakuyta. ¿Iman sucedeshan? Sodoma Gomorra llaqtakunatan nina parawan Jehová Dios ruphachishan.

33 Willakuyta maskhay. Qhawariy egipciokunaq caballonkunata carretankutapas sucedesqanta. ¿Pin unuwan millp’uchiran? Jehová Diosmi. Llaqtanta waqaychananpaqmi chayta ruwaran. 76 Willakuyta maskhay. Chaypin rikunki imaynatan Jehová Dios llaqtanta saqerpariran thunichinankupaq millay kasqanku rayku.

Chay raykun mana muspharinanchischu kay Allpapi millay runakunata wañuchinanpaq hanaq pachamanta ejercitonta kachamuqtin. ¿Iman chaymanta sucedenqa? Qhawasun qatimuq paginata, chaypi yachasun chaykunamanta.