Thaq (Hawka) kausay mosoq pachapi

Kay tratadopi sumaq kayta qhawarispayki, ¿imaynataq kanki? ¿Manachu sonqoyki munapakun, thaqta (hawkata), kusikuyta, sumaq tiyakuyta (yachakuyta) kaypi rikusqaykita hina? Munankipunichá. ¿Mosqoyllachu otaq yanqa suyakuychu chaykunaq chayamunan p’unchay suyakuy?

Askha runachá chhaynata yuyaychakunku. Kunan sasachakuykunaqa chaykunan: maqanakuy, suwakuy, yarqay, onqoy, machuyay, payayay, kaykunaqa wakillanraqmi. Biblia hamuq tiempopaq Willakun “mosoq hanaq pachata, mosoq allpa pachatawan [Diospa] munachikusqan hina suyakuyninchis, chaykunapin chanin kausay kanqa”. (2 Pedro 3:13; Isaías 65:17.)

Bibliaq nisqan hina “mosoq hanaq pacha” “mosoq allpa pachapas” manayá huk hanaq pachachu nitaq huk Allpa pacha rikunanchispaq hinachu. Hanaq pachapas, kay Allpanchispas allin ruwasqan kasqa, Bibliataqmi nín wiñaypaq kananta. (Salmo 89:36, 37; 104:5.) Chay “mosoq allpa pachaqa” kay Allpapi tiyaq chanin runakunan, “mosoq hanaq pachataqmi”, Diospa ch’uya kamachikuynin, paytaqchá kamachinqa kay allpapi tiyaq runakunata. ¿Chaninchu kanman “mosoq allpapi iñiy”, sumaq kausay nisqapi?

Chay sumaq kausaytan ñaupa tiempopiraq Diosqa munaran kay Allpapaq. Paymi ñaupa warmi qharita, Edén t’ikapatapi churarqan sumaq kamachiytataq qoran: “Miraq kaychis askhaman tukuychis kay allpaman hunt’anaykichiskama, kamachiychistaq”. (Génesis 1:28.) Arí, Diosqa munaran paykuna wawachuriyoq kanankuta, chaymantataq t’ikapataman llapan Allpata tukuchinankuta. Diosta mana kasukuyta akllaqtinkupas chaywan mana wiñaypaq kausanankuta qhawarichiranku chaypas, Diosqa manan t’ikranchu qallariymanta pacha munasqanta. ¡Hunt’akunqapunin mosoq pachapi! (Isaías 55:11.)

Yayaykuta resakuspaykiqa, Diospa kamachikuynintan mañakushanki, chaywantaqmi nishanki Diosta, kay Allpamanta tukuchichun ñak’ariyta hinaspa Pay kamachikamuchun mosoq pachata. (Mateo 6:9, 10.) Diosninchisqa kutichimuwasunmi chay mañakuyninchistaqa, qelqanmi nín: “Chanin runakunan kay allpata hap’ikapunqaku, chaypin wiñaypaq tiyanqaku”. (Salmo 37:29.)

Diospa mosoq pachanpi kausay

Diospa kamachikuyninqa mana risch’anachiy atina allinkunatan kay allpapaq apachimunqa, chhaynatan hunt’anqa, qallariymantapacha Dios runakunaq kusisqa kay Allpapi kausananku munasqanta. Cheqninakuypas mana allin qhawanakuypas tukukapunqan, chaymantataq kay Allpapi lliw tiyaqkuna cheqaq khuyaqmasi kapunqaku. Bibliapin Dios willakun, Payqa ‘hinantinpis maqanakuyta tukuchinqa’. “Manañan espadata hap’inkakuñachu, suyukuna huk suyukunawan maqanakunankupaq.” (Salmo 46:9; Isaías 2:4.)

Chaykunaq qhepantaqa llapan Allpachá sumaq t’ikapataman tukuchisqa kapunqa. Biblian nín: “Ch’inniqpas, ch’aki pampapas kusikunqan, sumaqta t’ikarispan q’ochukunqa hamanq’ay hinan t’ikarinqa. [...] Ch’inniqpin pukyukuna paqarinqa, ruphaypa atisqan pampataq hunt’a unuyoq hina kanqa; ch’aki pampapitaq pullpuq pukyukuna kanqa.” (Isaías 35:1, 6, 7.)

Chaninmi kanqa, kusisqa kanapaq t’ikapata Allpapiqa. Manan pipas yarqachikunqachu mana mikhuy kaqtin. “Kay allpapunin qowasunchis rurusqanta”, nínmi Bibliaqa. (Salmo 67:6; 72:16.) Llapankuchá llank’asqankuq rurusqanta mikhunqaku, Kamaqninchispa munachisqan hina: “Wasitan wasichanqaku, hinaspan chaykunapi tiyanqaku; uvastan tarpunqaku, chaypa rurusqantan mikhunqaku. [...] Manan hukpa mikhunanpaqchu mallkinqaku.” (Isaías 65:21-22.)

Diospa mosoq pachanpiqa runakunaqa manañan huk wasillapiñachu k’iski k’iski tiyanqaku nitaq ch’ukllakunallapipaschu, Diosqa munanpunin kayta: “Wasitan wasichanqaku hinaspan chaykunapi tiyanqaku [...]. Manan hukpa tiyananpaqchu wasichanqaku”. Bibliaqa munachillantaqmi: “Manan yanqapaqchu llank’anqaku”. (Isaías 65:21-23.) Chhaynaqa runaq llank’asqanqa hunt’asqa kanapaqmi kanqa. Kausayqa manan amiwasunchu.

Tiempoq risqanman hinan, Diospa Kamachikuynin kutichimunqa t’ikapatapi sumaq kausayta animalkuna hukhupi, runakunapas salqa animalkunata manaña manchakunqachu Biblian nín: “Lobopas borregowan kusqan tiyanqaku (yachanqaku), uturunkupas malta cabrachapas kuskan puñunqaku, torillowan uña wakawanpas kuskan mikhunqaku; huk wawataq michiqninku kanqa.” (Isaías 11:6-9; Oseas 2:18.)

¡Qhawariwaqchu, t’ikapata Allpapi liw onqoykuna tukukapunqa! Diospa qelqanmi cheqaqchawanchis: “Manan pipas ninqachu: ‘Onqosqan kani’”. (Isaías 33:24.) “Diosmi paykunaq ñawinmanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñaupaqkaqkunaqa ripunñan. (Revelación 21:4.)

Imaynatan qan kayta tariwaq

Sonqoykiqa kusirikuranchá, Diospa mosoq pachapi chanin kausayta munachiwasqanchista yachaspa. Kay sumaq kausayqa manachu hina cheqaqqa kanmanchu nispa wakin niqtinkupas, khuyakuq kamaqninchis Diospa makillanpin kaykuna ruwananpaqqa kashan. (Salmo 145:16; Miqueas 4:4.)

T’ikapata allpapi wiñay kausayta munaspaqa, hunt’ananchismi Diospa Kamachikuyninta. Ñaupaq kaqtan Jesusqa Diosman mañakushaspa qhawarichiwaranchis: “Chay wiñay kausayqa kaymi: Qan sapallayki cheqaq Diosta, kachamuwasqayki ñoqa Jesucristatawan reqsiyninku”. (Juan 17:3.)

Chayrayku, sichus cheqaqtapuni kausayta munanchis Diospa mosoq pacha qosqanpi chayqa, ñaupaqtaqa yachananchis iman Diospa munaynin, chayman hinataq ruwana, cheqaqmi kay nisqanqa “kay pachaqa munaynintin ripushanmi, Diospa munaynin ruwaqmi ichaqa wiñaypaq takyanqa”. Chayta ruwasunchis chayqa, wiñaypaqchá kusikusunchis, khuyakuq kamaqninchispa askha saminchayninta (bendicionninta) chaskikuspa. (1 Juan 2:17.)

Llapa Bibliaq willayninkunaqa Traducción del Nuevo Mundo de las Santas Escriturasmantan (Español), mana chaymanta kaqtinqa willakushanmi.