Jamuq tiempomanta sumaq willakuy
Satanaspas supayninkunapas chinkay-chinkay ukhuman wijch’uykusqan kanqaku.
Satanaspas supaykunapas manan runakunata engañanqakuñachu. Jehová Diosmi janaq pachamanta wijch’uykanpunña (Apocalipsis 12:9). Pisi tiempollamantan Diosqa Satanasta supayninkunatawan tukuchipunqa. Diosmi apóstol Juanwan willachirqan: “Chayllamanmi rikuruni juj angelta chinkay-chinkay ukhuq llaven apaykusqa jatun cadena apaykusqa ima janaq pachamanta uraykamushaqta. Jinan ñaupa mach’aqway nisqa dragonta jap’irqan, paymi Saqra Satanaspas, jinaspa waranqa watapaq watarqan. Chaymantataq chinkay-chinkay ukhuman wijch’uykurqan, chaypi wisq’aspataq juj sellota churarqan, chhaynapi chay waranqa wata tukunankama amaña nacionkunata pantachinanpaq”, nispa (Apocalipsis 20:1-3). Satanaspas supaykunapas wiñaypaqmi chinkachisqa kanqaku (Apocalipsis 20:10).
Chaymantapas millay runakunan chinkachisqa kallanqakutaq (Salmos 37:9, 10; Lucas 13:5).
¡Wañuqkunan kausarimpunqaku!
Wañusqakunaqa kay jallp’apin kausarimpunqaku.
Jehová Diosqa Satanastapas supaykunatapas chinkachipuspan runakunapaq askha bendicionkunata apamunqa. Yachamusqanchisman jina wañusqakunaqa manan kausankuñachu. Jesusqa wañuytaqa tupanachirqan misk’i puñuywanmi (Juan 11:11-14). Payqa yacharqanmi wañuypi puñushaqkuna jujmanta kausanankupaq rijch’arimpunankuta. Nirqanmi: “Tiempon chayamunqa, chaypin sepulturakunapi llapa kaqkunaqa [...] lloqsimunqaku”, nispa (Juan 5:28, 29; tupachiy Hechos 24:15).
Wañusqakunaqa kausarimpunqakun. Manañan wañusqakunamanta cuentokuna kanqachu, aswanpas kausarimpuymanta willakuykunan kanqa. ¡Ancha kusikuymi kanqa munakusqanchis familianchiskunawan amigonchiskunawan kausarimpuqtinku tupayqa!