Lección 3
¿Pitaq Jesucristori?
¿Imaynapin Jesús Diospa “primer” Churin? (1)
¿Imaraykun Jesusta “Simi” nispa sutichakun? (1)
¿Imaraykun Jesús runaman tukuspa hamuran? (2-4)
¿Imaraykun milagrokunata ruwaran? (5)
¿Imatan hamuq tiempopi Jesús ruwanqa? (6)
1. Manaraq kayta hamushaspan Jesusqa, cielopi kawsaran espíritu hina. Diospa ñawpaq kamasqanmi; chayraykun Diospa “primer” Churin. (Colosenses 1:15; Revelación 3:14.) Diosllan Jesustaqa kamaran, mana piqpa yanapasqan. Cielopi kashaspan Jesusqa Jehováq “llank’aqmasin” karan, paymi yanaparan cielopipas Allpapipas imaymana ruwayta. (Proverbios 8:22-31; Colosenses 1:16, 17.) Diosmanta principal rimaqmi karan. Chayraykun Jesusta sutichakun “Simi”, nispa. (Juan 1:1-3; Revelación 19:13.)
2. Diosmi Churinta Allpaman kachamuran vidanta Maríaq wiksanman astamuspa. Chaymi Jesuspa taytanqa mana runachu; chayraykun mana huchayoq ch’uya runa. Kinsa razonraykun Diosqa Jesusta kachamuran: 1) Diosmanta cheqaqta yachachiwananchispaq (Juan 18:37), 2) Diospaq hunt’a sonqo kananpaq chayta rikuspa pay hina kananchispaq (1 Pedro 2:21) 3) ñoqanchisrayku sacrificakuspa huchamanta wañuymantawan librawananchispaq. ¿Imaraykun chay sacrificio necesitakuran? (Mateo 20:28.)
3. Diospa kamachisqanta mana kasukuspan, Adanqa pantaran, chaytan Biblia nin “hucha”, nispa. Chayraykun, wañuyman Diosqa huchacharan. (Génesis 3:17-19.) Diospa leyninta mana kasukuqtinmi, ch’uya kaynin tukupun. Chaymi pisi pisimanta machuyaspa, wañuran. Adanmi llapa churinman huchata saqen. Chayraykun ñoqanchispas machuyanchis, onqonchis wañunchispas. ¿Imaynatan runata salvanman? (Romanos 3:23; 5:12.)
4. Jesusqa Adán hina perfecton karan. Manan ichaqa huchallikuranchu, aswanmi hatun pruebapipas Jesusqa Diosta kasukuqpuni. Chayraykun, payqa sacrificaran ch’uya kawsayninta Adanpa huchanta pagananpaq. Chay ruwasqantan Bibliaqa sutichan “rescate”, nispa. Ahinapin Adanpa llapa churinkuna wañuymanta kacharichisqa kankuman. Lliwmi Jesuspi iñiqqa huchankumanta pampachasqa kankuman wiñay kawsaytapas chaskinkuman. (1 Timoteo 2:5, 6; Juan 3:16; Romanos 5:18, 19.)
5. Allpapi kashaspan, Jesusqa onqosqakunata hampiran, yarqasqakunata mikhuchiran, hatun wayrakunatapas sayachiran. Wañusqakunatapas kawsarichiranmi. ¿Imaraykun milagrokunata ruwaran? 1) Khuyapayaqmi ñak’ariq runakunata chaymi yanapayta munaran. 2) Milagronkunan rikuchiran Diospa Churin kasqanta. 3) Rikuchiranmi Rey hina Allpata kamachimuspa kasukuq runakunarayku ruwananta. (Mateo 14:14; Marcos 2:10-12; Juan 5:28, 29.)
6. Jesusqa wañuranmi, espiritual cuerpopi Dios kawsarichiqtintaq cieloman kutiran. (1 Pedro 3:18.) Chaymantan Rey kananpaq Dios churaran. Jesusqa tukuchinqañan Allpapi millay kawsaytapas ñak’ariytapas. (Salmo 37:9-11; Proverbios 2:21, 22.)
[7 paginapi dibujokuna]
Kay Allpapi kashaspan Jesusqa, yachachiran, milagrokunata ruwaran vidantapas ñoqanchisrayku ofreceran