Imayna yupaychanata Dios munan

Diospa amigon kanapaqqa, munasqanman hina yupaychananchis. Jesuspa nisqan hina, “cheqaq yupaychaqkunaqa” ‘cheqaq-kaywanmi’ Diosta yupaychananku (Juan 4:23, 24). Hukllan ñanqa Diosta yupaychanapaq (Efesios 4:4-6). Chay ñanqa wiñay kawsayman apan, pantasqa ñantaq wañuyman apan (Mateo 7:13, 14).

Runakunaq imayna yupaychasqanta qhawaspan reparasun mayqenchus Diospa munayninman hina yupaychay kasqanta. Jehová Diosqa allintaq chayqa, cheqaq yupaychaqninkunapas allinllataqmi kananku. Imaynan allin kapuli sach’aq rurunqa allin, chhaynallataqmi Diospa munayninman hina yupaychaqkunapas kanku (Mateo 7:15-20).

Jehová Diospa amigonkunaqa anchatan Bibliata respetanku. Yachankun Bibliaqa Diospa yuyaychasqan kasqanta. Chaymi Bibliawan yanapachikunku allinta kawsanankupaq, sasachakuyninkuta allichanankupaq, Diosta allinta reqsinankupaqpas (2 Timoteo 3:16). Rimasqankuwan tupaqta kawsanku.

Jehová Diospa amigonkunaqa munanakunku. Jesusqa runakunata munakuran, chaymi Diosmanta yachachiran, onqosqakunatapas qhaliyachiran. Diospa cheqaq yupaychaqninkunaqa runamasinkuta munakunku. Jesús hina, manan pisichankuchu wakchakunata waq llaqtayoq runakunatapas. Jesuspa nisqan hina, yachachisqankunaqa reqsichikunanku karan munanakuyninkupi (Juan 13:35).

Jehová Diospa amigonkunaqa Diospa sutinta hatunchanku. Pipas sutinchista mana rimayta munanmanchu chayqa, ¿amigonchischu kanman? Manapunin. Amigonchistaqa sutinmantan waqyanchis hukkunamanpas paymanta allinta rimanchis. Chhaynallataqmi Diospa amigon kanapaqqa sutinmanta waqyakunanchis hukkunamanpas paymanta rimananchis. Chhayna ruwananchistan Jehová Diosqa munan (Mateo 6:9; Romanos 10:13, 14).

Jesús hina, Diospa amigonkunaqa runakunaman yachachinku Diospa Reinonmanta. Diospa Reinonqa hanaq pacha gobiernon, chay gobiernon kay Allpata paraisoman tukuchinqa. Diospa amigonkunaqa Reinomanta allin willakuykunata hukkunaman yachachinku (Mateo 24:14).

Jehová Diospa testigonkunaqa kallpachakunku Diospa amigon kanankupaq. Bibliata respetanku, munanakunkutaq. Diospa sutinta rimanku, hatunchanku, hukkunamanpas yachachinku Diospa Reinonmanta. Jehová Diospa testigonkunaqa Diospa munayninman hina yupaychanku.