Cuerpoykiwan yanapachikuspa rimay

WAKIN llaqtakunapi runakunaqa aswan yachasqan kanku cuerponkuwan yanapachikuspa rimayman. Chaywanpas yaqa llapanmi piwanpas parlashaspa otaq discursota qoshaspapas kuyuykachachinkupuni makinkuta, rikrankuta otaq imankutapas; uyankupas rimasqankuman hinan cambian.

Jesuspas ñawpaq yachachisqankunapas cuerponkuwan yanapachikuspan rimaqku. Huk kutinmi Jesusman huk runa willarqan mamanwan wawqenkunapiwan paywan parlay munasqankuta, hinan payqa nirqan: “¿Pitaq mamayri, pikunataq wawqeykunapas?” nispa. Yachachisqankunaman “makinta haywarispataq” nirqan: “Kaykunan mamaypas wawqeykunapas”, nispa (Mat. 12:48, 49). Hechos 12:17; 13:16 nisqanman hinaqa Pedrowan Pablowanqa makinkuwan yanapachikuspan rimaqku.

Ima yuyaykusqaykita imayna sientekusqaykitapas manan rimaspallachu reparachiwaq, reparachillawaqtaqmi llapan cuerpoykiwanpas. Mana kuyurispa rimanki chayqa, manapas discursoykimanta imapas qokusunkimanchu hinatan qhawarisunkikuman, ichaqa rimasqaykiman hina cuerpoykitapas kuyuykachachinki chayqa, aswan allinmi discursoyki kanqa. Telefonopi rimashaspayki cuerpoykiwan yanapachikuspaykiqa, aswan allintan entiendechinki imapas willasqaykita, imayna sientekusqaykitapas. Chay hinaqa, discursota qoshaspa, hukkunaman leeshaspapas llapan cuerpoykiwan yanapachikuy, manaña qhawashasunkikuchu chaypas.

Imaynan asikunaykipaqpas phiñakunaykipaqpas mana librotaraqchu estudiarqanki, chhaynallataqmi cuerpoykiwan yanapachikuspa rimanaykipaqpas kanan. Qanllamantan chaykunaqa paqarimunan, chhaynapin allin kanqa.

Makinchiswanpas imanchiswanpas yanapachikunchis imapas imayna ruwakusqanta, maypi kasqanta, hatunchus huch’uyllachus kasqantawan willanapaqmi. Chayman hina discursoykipi ruwanayki kaqtinqa ama huk-hinallamantachu ruway, aswanpas imaymananmanta ruway llapan discursoykipi. Sasachakushanki chayqa, maskhay imapas may ladopi kasqanta, karuchus hatunchus maypichus kasqantawan sut’inchaq simikunata. Chaymantapas kallpachakuy piwanpas parlarikushawaq hina tukuy sonqowan rimanaykipaq, amataq sinchita llakikuychu uyariqniykikuna imayna qhawarinasuykimantaqa. Llakhilla kashaspaykiqa mana sasachakuspallan makiykiwanpas otaq imaykiwanpas yanapachikuspa rimanki.

Cuerponchiswanqa yanapachikullanchistaqmi mana iskayaspa sonqomantapuni rimasqanchista rikuchinapaq. Chhaynapin sut’ita reparachinchis importante kaqkunata. Ichaqa cuidakunaykin ama huk-hina ruwayllaman yachakunaykipaq, mana chayqa uyariqniykikunan distraekunkuman sapa rato huk-hinallamanta makiykita otaq imaykitapas kuyuykachisqaykita rikuspanku, manataqmi discursoyki sumaqchu kanman. Escuelapi umalli reparachisunki huk-hinallamanta ruwasqaykita chayqa, amaña huk tiempo chayta ruwaychu, aswanpas imapas imaynachus kasqanta rikuchinallaykipaq cuerpoykiwan yanapachikuy.

Pikunamanchus rimaykushanki chayman hinan rimasqaykita kallpachanayki cuerpoykiwan yanapachikuspayki. Sichus paykunata dedoykiwan señalanki chayqa, hukniraytan qhawasunkikuman. Chaymantapas wakin llaqtakunapiqa qhariqa manas siminta makinwan tapakunanchu imamantapas admirakuspaqa, p’enqaysi kanman, warmita hinas qhawarinkuman. Wakin llaqtakunapitaqsi warmikunaqa mana makinkuwan yanapachikunkumanchu rimashaspanku, mana chayqa mana kasukuqpaqsi qhawarinkuman; chay llaqtakunapiqa warmikunaqa uyankuwanmi astawan yanapachikunanku rimashaspanku. Chaymantapas yaqa llapa llaqtakunapin asikunapaq hina qhawarinku pisi runakunaq qayllanpi nishuta makiwan rimaqta.

Discurso qoypi astawan yachasqaykiman hinaqa mana sasachakuspallan cuerpoykiwan yanapachikunki rimasqaykita allinta kallpachanaykipaq, chhaynapin sut’ita lliwpas reparanqaku mana iskayaspa sonqomantapuni rimasqaykita, discursoykipas aswan allinmi kanqa.

Uyaykiwan yanapachikuy. Uyanchispin aswan allintaqa rikuchisunman imayna sientekusqanchistaqa. Chaypaqmi ñawinchiskuna, siminchis, umanchispas yanapawasunman. Mana rimaspallan uyanchispi reparachisunman mana imapas qokuwasqanchista, millakusqanchista, iskayashasqanchista, hatuntaraq qhawarisqanchista, kusisqa kasqanchistapas. Kamaqninchisqa uyanchistan kamarqan kinsa chunka más chutarikuq huñukuq aychayoqta, asirikuqtinchisqa chaykunamanta yaqa kuskannintan llank’achinchis.

Discursota qoshaspa predicacionpi kashaspapas sonqota kusirichiq allin willakuykunatan willanchis, chaymi asirikuspa munakuywan chayta willananchis. Mana chayqa, hawa sonqollapas rimashasunman hinatan uyariqninchiskuna qhawariwasunman.

Kay tiempopi runakunaqa manchakunkun mana reqsisqakunawan parlayta. Chayraykun asirikuspa rimananchis, chhaynapin amigonkuta hina qhawariwasun, sumaqtataq uyariwasunpas.