Allinta p’achakuy allichakuypas

IMAYNA p’achasqachus allichasqachus kasqanchisman hinan runakunaqa imaymanata rimanku. Jehová Diosqa sonqonchistan qhawan, runakunan ichaqa ‘patallanta qhawanku’ (1 Sam. 16:7). Limpio kasqaykita rikusunkiku chayqa, respetanapaq hinan qhawarisunkikuman, hinaspa uyariyta munasunkikuman. Imayna p’achakunata hinalla p’achakuqtiykipas allinpaqmi qhawarinkuman Diospa llaqtanta, hinallataq yupaychasqayki Diostapas.

¿Imaynatan p’achakuna? Bibliaqa manan imayna p’achakunanchismantaqa kamachinchu, ichaqa yanapawanchismi Diospaq hina imatapas ruwananchispaq. Ninmi: “Lliwta ruwaychis Diosta hatunchanapaq”, nispa (1 Cor. 10:31). ¿Imaynatan chay nisqanta kasukusunman? Chaypaqmi qhawarisunchis Bibliapi wakin yachachikuykunata.

Biblian niwanchis cuerponchispas p’achanchispas limpio kananpaq. Ñawpaq tiempopin Jehová Diosqa Israel runakunata kamachirqan limpio kanankupaq. Sacerdotekunapas wakin ruwanankuta ruwanankupaqqa bañakunankun karqan, p’achankutapas t’aqsananku karqan (Lev. 16:4, 24, 26, 28). Cristianokunaqa manañan Israel runakunaman qosqa Kamachikuy Simipiñachu kashanchis, chaywanpas imaymanatan chaymanta yachasunman (Juan 13:10; Apo. 19:8). Chayraykun cuerponchispas p’achanchispas limpio kanan, siminchispas manan asnananchu. Astawanmi chaykunata qhawarikunanchis huñunakuyman rinapaq predicacionman lloqsinapaqpas, mana chayqa hukniraytan qhawawasunman. Hinallataq discurso qoqkunapas demostración ruwaqkunapas limpiopuni kananku. Limpio kaspanchisqa respetashanchismi Jehová Diosta llaqtantapas.

Bibliaqa kallpachawallanchistaqmi iman p’achakunata hinalla allin yuyaywan p’achakunanchispaq. Apóstol Pablon cristianakunata nirqan: “Munani[n] warmikunapas [...] iman p’achakunata hinalla allin yuyaywan [p’achakunankuta], ichaqa ama qoriwanpas, perlakunawanpas, ancha valorniyoq p’achawanpas p’achakunankuta, amallataq chukcha ñaqch’akuyninkutapas k’achanchakunankuta, aswanpas munanin allinkunata ruwaspa Diosta yupaychaq warmikuna hinapuni kawsanankuta”, nispa (1 Tim. 2:9, 10). Qharikunapas iman p’achakunata hinalla allin yuyaywanmi p’achakunanku.

Imayna p’achakunata hinalla p’achakuqqa manan pitapas phiñachinchu p’achakusqanwan, manataqmi munanchu hukkuna qhawapayanantaqa. Aswanpas allin yuyayniyoq kaspan allinta reparaspa imatapas ruwan. Chhayna kasunchis chayqa, Diospa kamachikuyninkunatapas kasukusunchis chayqa, Diospaq hinan p’achakusunpas allichakusunpas. Chhaynaqa, ¿manañachu sumaqchakuyta atisunman? Atisunmanmi sumaqchakuytaqa. Ichaqa allin yuyaywan mana sinchita k’achanchakuspallan chayta ruwananchis (1 Juan 2:16). Huñunakuykunapaqpas, predicanapaqpas, pukllanapaqpas otaq ima ruwanapaqpas iman p’achakunata hinalla allin yuyaywanmi p’achakunanchis. Hinallataq escuelapi kaqkuna llank’anapi kaqkunapas limpio p’achawan churakunanku, chhaynapin pitapas predicayta atinqaku.

Llapanchispas manan kaqllatachu uniformasqa hina p’achakunchis, sapankanchismi gustonchisman hina p’achakunchis. Ichaqa Bibliaq nisqanman hinan chaytaqa ruwananchis.

Apóstol Pedron nirqan: ‘Sonqoykichis sumaqchasqa kachun, chaymi aswan allinqa sumaq pach’asqa allin ñaqch’asqa kaymantapas’, nispa (1 Ped. 3:3, 4). Sichus sonqonchis munakuywan, q’ochukuywan, thak-kaywan, sumaq sonqo-kaywan, allin iñiq-kaywan hunt’a kashan chayqa, sumaq p’achasqapas kashasunman hinan kanqa Diospaqqa.

Bibliaqa kallpachawallanchistaqmi allin hap’iq p’achawan churakunanchispaq. 1 Timoteo 2:9 textopin willashan “allinta hap’iq p’achawan” churakunamanta. Warmikunaq p’achakunankumantaña apóstol Pablo rimasharqan chaypas, qharikunapas chaymantan yachankuman imayna p’achakuyta. Allin hap’iq p’achaqa limpion kanan. Qhapaqña wakchaña kanchis chaypas, lliwmi atisunman allin p’achakuyta allichakuytapas.

Runakunaqa chukchanchistan ñawpaqtaqa qhawanku. Chayraykun chukchanchistaqa allin ñaqch’asqata limpiota hap’inanchis. Chukchanchis imayna kasqanman hina otaq may llaqtayoqchus kasqanchisman hinan ñaqch’akunchis, chayta yachaspan apóstol Pabloqa huk yuyaychayta qorqan 1 Corintios 11:14, 15 textopi. Ichaqa manan allinchu kanman pipas qhari kashaspa warmi hina ñaqch’akunman chayqa, otaq warmi kashaspa qhari hina ñaqch’akunman chayqa (Deu. 22:5).

Chaymantapas qharikunaqa allintan k’isukunanku sunkhankuta, bigoteyoq kanku chayqa allintan allichakunanku (tiyasqaykipi bigoteyoq kay mana allin qhawarisqa kanman chayqa, manan chayta wiñachikunachu).

Chaymantapas manan kay pachaq munasqanman hinachu p’achakunanchis. Apóstol Juanmi nirqan: “Ama kay pachata munakuychischu, amallataq chaypi kaqkunatapas munakuychischu”, nispa (1 Juan 2:15-17). Kay pachata munakuqkunaqa imaymanata munapayaspankun kawsanku, aychaq millay munayninkunaman hina, kaqninkunamanta hatunchakuspa ima. Bibliaqa willallantaqmi contra hatariyllatapuni munaqkunamanta, mana kasukuqkunamantawan (Pro. 17:11; Efe. 2:2). Paykunaqa chhayna kasqankuman hinan p’achakunkupas allichakunkupas, chaymi t’eqe, mana allin hap’iq, malatrasa p’achawan churakunku. Jehová Diosta serviqkunan ichaqa paypaq hina p’achakunanchis.

Kay pacha munakuqkunata qatikunanchismantaqa aswan kallpachakusun Diospa llaqtanpi allin iñiq cristianomasinchiskuna hina kananchispaq. Hatun discursokuna qoyta munaq waynakunaqa allintan qhawarinanku chhayna discurso qoqkuna imayna p’achakusqankuta. Hinallataq llapanchispas allinta yachasunman unay tiempoña tukuy sonqowan predicaqmasinchiskunamanta (1 Tim. 4:12; 1 Ped. 5:2, 3).

Imayna p’achakunapaq allichakunapaqpas Cristotan qatikunanchis, payqa “manan pay kikinpa allinnintachu maskharqan” (Rom. 15:3). Jesuspaqqa Diospa munayninta ruwaymi aswan importante karqan imamantapas. Chaymantapas hukkunaq allinnintan ñawpaqta maskharqan. Chhaynaqa, sichus p’achanchisrayku otaq imayna allichakusqanchisrayku predicasqanchis runakuna huknirayta qhawariwasunman chayri, ¿imatan ruwananchis? Jesús hina huch’uyaykukuq kaspanchismi kasukunanchis apóstol Pabloq nisqanta, paymi nirqan: “Manan pimanpas ima misk’anatapas churaykuchu”, nispa (2 Cor. 6:3). Chayrayku ama runakuna mana allinta rimanankupaq hinachu ñaqch’akusunpas p’achakusunpas.

Allintan sayana. Allinta p’achakusqanchismantapas yachananchismi allin sayayta. Manaña huk-hinallamantachu llapanchispas sayasunchis chaypas, kallpachakunanchismi allinta sayanapaq. Bibliaq nisqan hina, rectota sayaqqa allin suyakuyniyoq, respetasqa kasqantan rikuchin (2 Cró. 20:17). Wakin iñiqmasinchiskunaqa onqosqa, yuyaqña kasqankurayku otaq unay watakuna k’umuspalla llank’asqankuraykun mana atinkuchu recto sayayta, chaymi wakinqa tawnapakuspalla sayanku. Ichaqa, atiqkunaqa kallpachakunankun allinta sayaspa rimanankupaq, mana chayqa manchasqapas kashanman hinatan qhawarinkuman otaq manapas imapas qokunmanchu hinata. Chaymantapas atrilman mana tawnapakuspalla rimamuqtan aswan allintaqa qhawarinqaku.

Imakuna apasqanchispas limpion kanan. Predicacionman apasqanchis qelqakunapas, otaq ima apasqanchispas limpion kanan, allintaqmi kananpas.

Apasqanchis Bibliaqa limpion kanan. Mawk’achaña kashanman chaypas, manan q’aqñu-q’aqñuchu nitaq llik’i-llik’ichu kanan.

Munasqanchisman hinaña maletinninchisman qelqakunata churanchis chaypas, manan thawi-thawitachu churananchis, limpiotaqmi tukuy imapas kanan. ¿Hayk’aqllapas rikurqankichu huk predicaqmasinchista wasiyoqman Bibliata leeshaqtin, otaq huñunakuypi discursota qoshaqtin Biblianmanta hojachakuna urmashaqta? Chayta rikuspaqa distraekurankichá. Chayrayku ama hojachakunata Bibliaykiman churaychu, aswanpas huk ladopi waqaychay. Chaymantapas respetowanmi Bibliata hap’inayki, wakin llaqtakunapiqa sinchi mana allinpaqmi qhawarinku pipas Bibliata otaq Bibliamanta willaq qelqakunatapas pampaman churaqtinkuqa.

Allinta p’achakusun allichakusunpas chayqa, allinpaqmi runamasinchiskuna qhawariwasun, chaywanpas ‘Qespichiqninchis Diosmanta yachachikuyta tukuypi sumaqpuni kasqanta rikuchinanchisraykun’ allintaqa p’achakunchis allichakunchispas (Tito 2:10).