14 capítulo
¿Imaynatan Jehová Dios llaqtanta kamachin?
1. ¿Imatan Biblia willan Jehová Diospa llaqtanmanta, imarayku ancha allin ñoqanchispaq?
¿KANCHU Diospa llaqtan? Ari kanmi, chaymi Biblia willan hanaq pachapi kaq ancha sumaq llaqtanmanta (Ezequiel 1:1, 4-14; Daniel 7:9, 10, 13, 14). Manaña chay llaqtanta rikunchischu chaypas chay llaqtaqa anchatan yanapan kay tiempopi cheqaq yupaychaqkunata (2 Reyes 6:15-17). Kay Hallp’apipas kanmi Jehová Diospa llaqtanqa. Biblian willawanchis pikuna kasqanta Jehová Dios imayna kamachisqantapas.
Kay Hallp’api llaqtanta reqsikun
2. ¿Ima mosoq congregaciontan Jehová Dios sayarichiran?
2 Waranqa phisqa pachak tawa chunka phisqayoq watan Israel llaqta Diospa congregacionnin karan (Hechos 7:38). Ichaqa Diosmi paykunata wikch’upuran kamachikuyninta mana kasukusqankumanta Churintapas mana chaskisqankumanta. Judiokunatan Jesús niran: “Chay hinaqa, wasiykichismi purunyapunqa”, nispa (Mateo 23:38). Chaymi Jehová Diosqa mosoq rimanakuyta ruwaran mosoq congregación sayarichisqanwan. Chay congregacionqa Diospa akllasqan pachak tawa chunka tawayoq waranqa runakunan kanku, paykunan Churinwan kuska hanaq pachapi hukllachakunqaku (Apocalipsis 14:1-4).
3. Pentecostés p’unchaypi 33 watapi, ¿ima sucedesqanmi rikuchin Jehová Dios mosoq congregacionwan munaynin hunt’ananta?
3 Pentecostés p’unchaypi 33 watapi santo espirituwan akllasqa cristianokunan chay mosoq congregacionpi ñawpaq kaqkuna karanku. Chaymantan Biblia khaynata willan: “Pentecostés Fiesta p’unchay chayamuqtinmi llapallanku huk sonqolla huñunasqa kasharqanku. Hinan hanaq pachamanta qonqaylla huk suenay uyarikurqan, sinchi wayraq suenasqan hina, chay suenaymi tiyashasqanku wasiman hunt’aykurqan. Hinaqtinmi paykunaqa nina qallushaq hina rawraykunata rikurqanku, chaykunan umanku pataman tiyaykurqan. Chaymi llapallankuman santo espirituqa hunt’aykurqan”, nispa (Hechos 2:1-4). Chay runakunaman santo espirituta qomusqanpin Jehová Dios sut’ita rikuchiran paykunawan munaynin hunt’ananta chaypaqtaqmi Jesucristota churaran Umalliq kananpaq.
4. ¿Pikunan kanku kay Hallp’api Jehová Diospa llaqtan?
4 Kunanqa pisillañan kashanku kay Hallp’api pachak tawa chunka tawayoq waranqa cristianokunamanta. Ichaqa profeciaq nisqan hina, chay pisi t’aqa akllasqa runakunamanmi ancha askha runakuna otaq ‘wak oveja’ nisqakuna yapakushanku, arí, paykunaqa millonninpiñan kashanku. Allin Michiq Jesusmi iskaynin t’aqata huk t’aqallaman huñun paytaqmi michishanpas (Apocalipsis 7:9; Juan 10:11, 16). Paykunan huk congregacionlla kanku, paykunatan nikun kay Hallp’api Diospa llaqtan, nispa.
Diospa allichasqan llaqta
5. ¿Pin kamachin Diospa llaqtanta, imaynatan chayta ruwan?
5 ‘Kawsaq Diospa iglesian [otaq congregacionnin]’ nispa Bibliapi nisqanmi sut’inchan pi kamachisqanta. Chay llaqtaqa teocrática nisqan, otaq Diospa kamachisqan. Jehová Diosqa Churintan churan chay congregacionta umallinanpaq, chaymi paywan, Simin Qelqapiwan kamachin (1 Timoteo 3:14, 15; Efesios 1:22, 23; 2 Timoteo 3:16, 17).
6. a) ¿Imaynatan apostolkunaq tiemponpi rikukuran Jehová Dios congregación kamachisqanta? b) ¿Imaynapin yachanchis congregacionpi Jesús kunan tiempopipas umallisqanta?
6 Llaqtanta Jehová Dios kamachisqanqa askha kutipin rikukuran: Pentecostés p’unchaypi (Hechos 2:14-18, 32, 33); África ladoman allin willakuykuna apakunanpaq angelpa kamachisqanpi; Tarso llaqtayoq Saulo Jesuspa kunkanta uyarispa kamachikuykuna chaskisqanpi; mana judío runakunaman Pedroq predicasqanpiwan (Hechos 8:26, 27; 9:3-7; 10:9-16, 19-22). Qhepamanmi ichaqa manaña hanaq pachamanta kunkata uyarikuranchu, angelkunatapas manañan rikukuranchu nitaqmi santo espirituq yanapayninwan milagrokunata ruwakuranñachu. Jesusmi ichaqa kayta prometeran: “Ñoqaqa qankunawanmi sapa p’unchay kashani kay pachaq p’uchukanankama”, nispa (Mateo 28:20; 1 Corintios 13:8). Kay tiempopi Jehová Diospa testigonkunapas reqsikunkun Jesuspa pusasqanta. Jesuspa yanapaynillanwanmi sinchi hark’akuy kashaqtinpas Reinomanta allin willakuykunata apanku.
7. a) ¿Pikunan kanku “allin yuyayniyoq hunt’aq kamachi”, imaynapin chayta yachanchis? b) ¿Ima llank’anatan Jesús saqeran ‘kamachiman’?
7 Jesusqa manaraq wañupushaspan qatikuqninkunaman willaran ‘allin yuyayniyoq hunt’aq kamachiman’ Patron hina huk sumaq llank’ay saqenanmanta. Wiraqocha Jesús hanaq pachaman kutipushaqtinqa ñan karanña chay ‘kamachiqa’, Reinonpi kamachikuq hina kutimuqtinpas llank’ashaqllatan tarimunan karan. Chayqa manan huk runallawan tupanmanchu, hanaq pachapaq akllasqa congregacionwanmi ichaqa tupan. Chay cristianokunata yawarninwan rantisqanraykun sutichan “kamachi”, nispa. Paykunatan kamachiran discipulokunata maskhanankupaq ‘tiempollanpi kamachinkunaman [espiritual] mikhunata qonanpaqwan’ (Mateo 24:45-47; 28:19; Isaías 43:10; Lucas 12:42; 1 Pedro 4:10).
8. a) ¿Ima llank’anayoqmi hunt’aq kamachi kay tiempopi? b) ¿Imaraykun chaskikunanchis Jehová Dios kamachinwan yachachiwasqanchista?
8 1914 watapi Patron kutimuqtinmi chay kamachitaqa saqesqan llank’anapi llank’ashaqta tarimuran, chaymi 1919 watapi paykunaman aswan hatun llank’ayta qoran. Chay watamantapachan Reinomanta allin willakuykunata teqsimuyuntinpi willaspa, Jehová Diosta yupaychaq ancha askha runakunata huñukuran manchay ñak’ariymanta qespichisqa kanankupaq (Mateo 24:14, 21, 22; Apocalipsis 7:9, 10). Paykunapas espiritual mikhunataqa necesitallankutaqmi, hunt’aq kamachitaq qon. Jehová Diosta kusichinapaqqa kamachinwan yachachiwasqanchistan chaskikunanchis chayman hinataq kawsananchispas.
9, 10. a) ¿Imaynatan allichaqku apostolkunaq tiemponpi yachachikuymanta iskayay kaqtin, imaynatataqmi allichakuq allin willakuykuna aparikunanpaq? b) ¿Imaynatan aparikun kay tiempopi Jehová Diospa llaqtanpi llank’aykuna?
9 Mayninpiqa kanmi iskayay Bibliapi yachachikuymanta otaq Diospa llaqtanpi ima ruwakusqanmantapas. Chhayna kaqtin, ¿imatan ruwasunman? Hechos chunka phisqayoq capitulon willan mana judío runakunamanta churanakuy kaqtin imayna allichasqankuta. Chaytan Jerusalenpi kaq ancianokunaman apostolkunamanwan willaranku, paykunan karanku chay tiempopi umalliq t’aqa. Chay runakuna pantaqña karanku chaypas Diosmi paykunata yanaparan chay sasachakuyta allichanankupaq. Paykunaqa chay temamanta willaq textokunaman hina, santo espirituq yanapayninwan mana judío runakunata predicakusqanta qhawarisqankuman hinan chay sasachayta allicharanku. Jehová Diosqa samincharanmi chay ruwasqankuta (Hechos 15:1-29; 16:4, 5). Chay umalliq t’aqan askha qharikunata kacharan Reinomanta allin willakuykunata ch’eqerichinankupaq.
10 Kay tiempopi Diospa llaqtanpi Umalliq T’aqaqa askha suyukunamantan kanku santo espirituwan akllasqa cristianokunan, paykunaqa Jehová Diospa testigonkunaq oficina central nisqapin kashanku. Paykunan Jesuspa umallisqan teqsimuyuntinpi Jehová Diospa testigonkunaq predicayninta allichanku cheqaq yupaychay mast’arikunanpaq. Llapallankun apóstol Pabloq yuyaykusqanta hina yuyaykunku, paymi cristianomasinkunaman kayta qelqaran: “Iñiyniykichispiqa allin takyasqañan kashankichis, chaymi iñiyniykichispi mana kamachikuytachu munayku, aswanpas kusikunaykichispaqmi yanapaykuyta munayku”, nispa (2 Corintios 1:24).
11. a) ¿Imaynatan ancianokunata siervo ministerialkunatapas churakun? b) ¿Imaraykun congregacionpi umalliqkunata yanapakunanchis?
11 Jehová Diospa testigonkunaqa Umalliq T’aqamanmi saqenku allin wakichisqa cristianokunata churaspa ancianokunata siervo ministerialkunata congregación qhawaqta churakunanpaq. Biblian willan imakunatan hunt’ananku anciano kanankupaq siervo ministerial kanankupaqpas, qhawarinkutaqmi pantaq runa kasqankutapas. Reqsichikuy cartata apachiq ancianokunapaq anciano churaqkunapaqpas ancha hatun ruwaymi Diospa ñawpaqenpi (1 Timoteo 3:1-10, 12, 13; Tito 1:5-9). Chaymi Diosmanta mañakunku santo espiritunwan yanapananpaq, Simin Qelqatapas t’aqwinkun yanapachikunankupaq (Hechos 6:2-4, 6; 14:23). Agradecekusun Diosninchista “iñiypi huk-nisqalla” kanapaq ‘runakuna qosqanmanta’ (Efesios 4:8, 11-16).
12. ¿Ima ruwanayoqmi kanku warmikuna Jehová Diospa llaqtanpi?
12 Bibliaq nisqan hina congregacionpiqa qharikunan umallinanku. Chay kamachikuyqa manan warmikunata pisichanchu, wakinqa hanaq pachamanmi rinqaku Reinopi kamachikuq, Reinomanta predicaypipas warmikunan aswantaqa predicanku (Salmo 68:11). Hinaspapas wasinkupiña imaymana ruwanayoq kanku chaypas congregación allin qhawarisqa kananpaqmi yanapakunku (Tito 2:3-5). Congregacionta yachachinankupaqmi ichaqa qharikuna churasqa kanku (1 Timoteo 2:12, 13).
13. a) Bibliaq nisqan hina, ¿imaynatan ancianokuna qhawarinanku umalli kasqankuta? b) ¿Ima sumaq llank’aytan llapallanchis chaskikunchis?
13 Kay pachapiqa allin llank’anayoq runakunallan allin qhawarisqa kanku. Diospa llaqtanpin ichaqa kay kamachikuyman hina kawsanku: “Qankuna ukhupi aswan huch’uykaqmi qollanaqa kanqa” (Lucas 9:46-48; 22:24-26). Ancianokunatan Biblia anyan ama hatunchakuspalla Diospa kaqninta qhawarinankupaq, kallpachantaqmi llapa cristianokunaq yachaqakunan hina kanankupaq (1 Pedro 5:2, 3). Manan akllasqa runakunallachu predicanku aswanmi qharikunantin warmikunantin llapa Testigokuna hanaq pacha kay pacha kamachiq Diospa sutinpi, Reinomanta sutinmantawan k’umuykukuywan willanku.
14. Parrafopi kaq textokunaman hina tapukuykunata kutichiy.
14 Allinmi kanman kay tapuykunata tapukuy: “¿Allintachu entiendeni Jehová Dios llaqtanta imayna kamachisqanta? ¿Chaytachu rikuchishani ruwasqaypi, rimasqaypipas?”. Qatimuq tapuykunapi yuyaymanaymi yanapawasun imayna kasqanchista qhawarikunanchispaq.
Congregacionta Umalliq Cristota cheqaqtapuni kasukuni chayqa, ¿imatan ruwasaq qatimuq versiculokunaq nisqanman hina? (Mateo 24:14; 28:19, 20; Juan 13:34, 35.)
Hunt’aq kamachi Umalliq T’aqawan espiritualpi imaymana qosqankuta agradecekuspa chaskikuqtiy, ¿pi respetasqaytan rikuchishani? (Lucas 10:16.)
¿Imaynatan cristianokuna astawanqa ancianokuna cristianomasinta qhawarinanku? (Romanos 12:10.)
15. a) ¿Imata ruwaspan rikuchinchis Jehová Diospa llaqtan imayna qhawarisqanchista? b) ¿Imakunata ruwaspan Jehová Diospa sonqonta kusichisunman Saqraq llulla kasqantapas rikuchisunman?
15 Cristoq umallisqan llaqtanwanmi Jehová Dios pusan llapa kamachinkunata. Chay llaqtanta imayna qhawarisqanchispin rikuchinchis Jehová Diospa kamachikuq kayninman q’emiykusqanchista mana q’emiykusqanchistapas (Hebreos 13:17). Satanasmi kay hinata nin: runakunaqa munasqallankupin yuyaykunku, nispa. Sichus pipaqpas imataña ruwapusun chayqa manan hukkunaq allin qhawariwananchistaraqchu maskhananchis, chaywanmi rikuchisun Saqra llulla kasqanta. Sichus congregacionpi umalliqkunata munakuspa respetasun manataq imatapas chaskinanchisraykullachu ‘runakunamanta allinta rimasun’ chayqa, Jehová Diostan kusichisun (Judas 16; Hebreos 13:7). Jehová Diospa llaqtanmanta mana karunchakuspan rikuchisun paylla Diosninchis kasqanta huk hinalla yupaychasqanchistapas (1 Corintios 15:58).
Yuyarinapaq
• ¿Mayqenmi kay tiempopi Jehová Diospa llaqtan? ¿Imatan ruwashan?
• ¿Pitan churan congregacionpi Umalliq kananpaq, pikunatan churan munakuywan kamachiwananchispaq?
• ¿Imaynatan qhawarinanchis Diospa llaqtanpi llapa iñiqmasinchiskunata?
[133 paginapi dibujokuna]
Jehová Diosmi Cristoq umallisqan llaqtanwan pusawanchis