Wayna-sipas, ¿imata ruwanaykipaqmi yuyaykushanki?
HUK sipasmi nirqan: “Allinta kawsanaypaqmi tukuy atisqayta ruwasaq”, nispa. Qanpas chhaynatachá yuyaykushanki. Ichaqa, ¿iman chay allin kawsay? Runakunapas, escuelapi compañeroykikunapas, profesorniykikunapas yaqapaschá chayta tarinaykipaq kallpacharqasunkiku qhapaq kanaykipaq, profesional kanaykipaq otaq allin llank’anayoq kanaykipaqpas.
Biblian ichaqa llapa wayna-sipaskunaman willan kay pachapi imaymanata maskhayqa ‘wayra hap’iykuy hinalla’ kasqanta (Eclesiastés 4:4). Hinaspapas pisillan qhapaq kaytaqa tarinku, ichaqa ch’usaq sonqon kawsanku. Gran Bretaña nacionmanta huk waynan tukuy atisqanta kallpachakurqan allin estudioyoq kananpaq, paymi nirqan: “Tukuy tarisqayqa ch’usaq caja hinan, ukhunta qhawaykuqtiymi mana imapas kanchu”, nispa. Allin llank’anayoq kaspaqa yaqapaschá askha qolqeyoq kawaq, ichaqa manan yanapasunkichu ‘Diosta maskhasqaykipiqa’ (Mateo 5:3). Hinaspapas 1 Juan 2:17 texton nin: “Kay pachaqa tukukapushanmi”, nispa. Chayrayku imaymanataña tarinki chaypas manan unaypaqchu kanqa.
Chaymi Eclesiastés 12:1 textoqa kayta nisunki: “Wayna-sipasllaraq kashaspa Kamaqniykimanta yuyarikuy”, nispa. Chhaynaqa Jehová Diosta servispan aswan allin kawsaytaqa tarinki. Chaypaqmi ichaqa huk ruwaykunataraq hunt’anayki. ¿Imaynatan chayta hunt’awaq? ¿Iman Diosta servispa kawsay?
¿Imatan ruwanayki Jehová Diospa testigon kanaykipaq?
Ñawpaqtaqa qanpunin munanayki Jehová Dios serviyta, chaytaqa manan tayta-mamayki cristiano kasqankuraykuchu munanki. Qanpunin kallpachakunayki Jehová Diosta reqsinaykipaq, ¿iman chaypaq yanapasunki? Huk sipasmi nirqan: “Diosmanta mañakuymi”, nispa (Salmo 62:8; Santiago 4:8).
Hinaspapas Romanos 12:2 textoq nisqantan ruwanayki, ninmi: “Ahinapin mayqenchus Diospa munaynin kasqanta reparankichis”, nispa. ¿Hayk’aqllapas iskayarqankichu wakin yachachisqasuykikumanta? Chhayna kaqtinqa qan kikiyki chaykunata t’aqwispa ‘reparay’ cheqaqpuni kasqanta yachanaykipaq. Bibliata qelqakunatapas leey. Ichaqa Diosta reqsiyqa manan yachaywan yuyayninchista hunt’achiyllachu. Yachasqaykikunapin yuyaymananayki chhaynapin sonqoykiman chayanqa, chaytaqmi yanapasunki astawan Diosta munakunaykipaq (Salmo 1:2, 3).
Chaymantataq yachasqaykimanta hukkunaman willay, yaqapaschá willawaq estudiaqmasiykikunaman. Chay qhepamantaq wasin-wasinta predicaq lloqsiy, yaqapaschá chaypi estudiaqmasiykikunawan tupaspa p’enqakunki. Ichaqa Biblian niwanchis ‘allin willakuykunamantaqa mana p’enqakunanchischu’ kasqanta (Romanos 1:16). Predicaspaqa kawsayta qoq willakuytan apashanki, chayraykun mana imamantapas p’enqakunaykichu.
Sichus tayta-mamayki cristiano chayqa paykunawan kuskachá predicaq rishanki. Ichaqa, ¿qan kikiykipunichu runakunawan rimanki Bibliawanpas yachachinki? Icha, ¿qhawayllachu qhawakunki predicasqankuta, revistakunatapas rakiyllachu rakinki? Predicay yachayta munanki chayqa tayta-mamaykimanta otaq huk allin cristianomanta yanapayta mañakuy. Kallpachakuy manaraq bautizakushaspa iñiq t’aqawan predicanaykipaq.
Tiempowanqa qan kikillaykimantan Jehová Diosta tukuy tiempo servinaykipaq sonqoykipi prometekunki (Romanos 12:1). Ichaqa hukkunapas chaytaqa yachanankun, Diosqa munanmi “qespichisqa kanapaqqa siminchiswan willananchista” (Romanos 10:10, NM). Bautizakunaykipaqqa hukkunan uyarinasuykiku iñiyniykimanta, chay qhepamantaqmi unuman chinkaykachisqa kanki (Mateo 28:19, 20). Allinta yuyaykuspan chaytaqa ruwanayki, ichaqa manan chayraykuchu manchakunayki qhepakunaman imapipas pantanaykimanta. Kallpata Diosmanta mañakuqtiykiqa paymi ‘hatun atiyta’ qosunki, chaywanmi yanapasunki servishanallaykipaq (2 Corintios 4:7; 1 Pedro 5:10).
Bautizakuspaqa Jehová Diospa testigonmi kapunki (Isaías 43:10). Chayraykun Diospa munasqanman hinapuni kawsanayki, Diosman prometekuspa qan ‘kikiykita negakusqaykirayku’ (Mateo 16:24). Yaqapaschá imapas ruway munasqaykikunata saqenayki kanqa Diospa Gobiernonta ‘ñawpaqta maskhanaykirayku’ (Mateo 6:33). Bautizakusqayki qhepamanqa astawanmi Jehová Dios serviyta atinki, wakinkunan kaykuna.
Tukuy tiempowan Jehová Diosta servinapaq
● Precursor kaspa. Huk precursorqa allin cristianon, sapa killataqmi qanchis chunka horata predican. Sapa kutilla predicaspaqa aswan allin yachachiqmanmi tukupunki aswan allintataqmi predicankipas. Askha precursorkunan runakunata yanaparqanku Jehová Diospa testigon kapunankupaq, chaywanqa anchatan kusikurqanku, ¿ima llank’aymi chhayna kusikunapaq kanman?
Askha precursorkunaqa kuska p’unchaylla llank’aspa kawsanku. Wakinqa tayta-mamankumantan ima llank’aytapas yacharqanku otaq colegionkupi ima ruwaytapas yacharqanku. Sichus colegioykita tukusqayki qhepaman qanpas tayta-mamaykipas yuyaykunkichis imatapas estudianayki kasqanta chayqa, manan qhapaqyanaykipaqchu chaytaqa ruwanayki, aswanpas Jehová Diosta tukuy tiempoykiwan servinaykipaqmi.
Precursorqa manan llank’ayllamanchu qokun aswanpas predicaymanmi, runamasintan yanapan wiñay kawsayta tarinanpaq. ¿Munawaqchu precursor kayta? Precursor kaspaqa huk ruwaykunapin yanapakullawaqtaq. Ejemplopaq, wakin precursorkunaqa predicaqkuna necesitakusqan llaqtakunamanmi rinku, wakintaq huk simi rimayta yachaspa wakin iñiq t’aqakunapi yanapakunku otaq huk nacionkunaman rinku. Arí, precursor kayqa ancha kusikunapaqmi.
● Diospa gobiernonmanta willaqkunapaq escuela. Chay escuelan cristianokunata yanapan astawan Diosta servinankupaq. Chayqa iskay killan aparikun, chaymanqa invitasqa kanku allinta llank’aq precursorkunan, paykunan listo kashananku familiankutapas wasinkutapas saqespa maymanpas rinankupaq. Paykunan ninku: “Kaypin kashani, ñoqata kachaway”, nispa, chayta ruwaspan Jesusta qatikushanku (Isaías 6:8; Juan 7:29). Karu llaqtakunaman rispan paykunaqa yachakunanku huk runakunaman, chiriman, q’oñiman huk clase mikhunakunamanpas. Mayninpiqa huk simi rimaytaraqmi yachananku. Kay escuelaqa yanapanmi solterokunata, solterakunata, casado iñiqmasikunatapas iñiyninkupi wiñarinankupaq, ruwayninkuta allinta hunt’anankupaq, aswan allinta Diospa llaqtanpi yanapakunankupaqpas. Chaymanqa rinkuman 23 watanmanta 65 watayoqkama iñiqmasikunan.
● Betelpi llank’ay. Paykunaqa Jehová Diospa testigonkunaq sucursalninpin llank’anku. Wakinqa Bibliamanta qelqakuna ruwaypin yanapakunku, wakintaq chay sucursalpi wasikunata allichanku chaypi kaq maquinakunatapas, wakintaq chaypi llank’aqkuna qhalilla kanankupaq yanapakunku. Betelpi llank’ayqa Jehová Diosta hatunchanapaqmi. Paykunaqa yachankun llank’asqankuqa pachantinpi iñiqmasinkunaq allinninpaq kasqanta, chayraykun ima llank’aypiña kanku chaypas anchata kusikunku.
Wakin Testigokunataqa imatapas yachasqankuman hina invitanku wakintataq Betelpi kaqtinkuña yachachinku. Chaypiqa manan qolqeta gananankupaqchu llank’anku aswanpas kusisqan kanku mikhuna chaskisqankuwan, chaypi tiyasqankuwan, gastollankupaq qolqeta chaskisqankuwanpas. Betelpi llank’aq waynan nirqan: “¡Ancha sumaqmi chaypi llank’ayqa! Horallanpi imapas ruwakusqanman yachakuyqa sasan, ichaqa askha bendicionkunatan chaskirqani”, nispa.
● Yupaychana wasikunata hatarichiqkuna. Paykunaqa sucursalkunata huñunakunapaq wasikunatan hatarichinku. Chaypi llank’aqkunaqa yupaychana wasikuna hatarichiypin yanapakunku. Paykunapas Salomonpa ruwachisqan templota ruwaqkuna hinan llank’asqankuwan Jehová Diosta hatunchanku (1 Reyes 8:13-18). Yupaychana wasikunata hatarichiqkunaqa Betelpi llank’aqkuna hinan yanapaykunata chaskinku. Chaypi llank’aqkunaqa anchatan kusikunku ruwasqankuwan Jehová Diosta hatunchasqankuta yachaspa.
Diosta tukuy sonqoykiwan serviy
Jehová Diosta servispallan aswan allin kawsaytaqa tarinki. Chhaynaqa, ¿kallpachakuwaqchu tukuy tiempoykiwan Diosta servinaykipaq? Chhayna kaqtinqa tayta-mamaykiwan rimay, iñiq t’aqaykipi umallikunawan hinallataq watukuq umalliwanpas. Sichus munanki Betelpi kayta otaq Diospa gobiernonmanta willaqkunapaq escuelaman riyta chayqa, kinsa p’unchay asambleapin huk huñunakuy kanqa, chaymanmi riwaq.
Ichaqa manan lliwchu tukuy tiemponkuwan Dios serviyta atinqaku. Mayninpiqa onqosqa kasqankurayku, manupi tarikusqankurayku otaq familiankuta qhawarinankuraykun mana atinkuchu. Chaywanpas llapa bautizasqa cristianokunaqa kasukunanchismi Bibliaq kay nisqanta: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa (Mateo 22:37). Jehová Diosqa munanmi imaynapi tarikusqaykiman hina tukuy sonqoykiwan servinaykita. Chayraykun ima ruwasqaykimantapas Jehová Dios serviy aswan importante kanan. Kallpachakuy Dios serviypi ima ruwaymanpas aypanaykipaq. Chhaynaqa, “wayna-sipasllaraq kashaspa Kamaqniykimanta yuyarikuy” chayta ruwaspaqa wiñaypaqmi bendicionkunata chaskinki.
Kay qelqapi textokunaqa Diospa Simin Qelqa (Edición 2004), Traducción del Nuevo Mundo de las Santas Escrituras españolpi (NM) Bibliakunamantan.
5/14