Diosmanta mañakuyta yachasun

QAN, ¿rimarankichu jayk’aqllapas Jehová Dioswan?... Diosqa munanmi paywan rimananchista. Ichaqa, ¿imaynatan paywan rimasunman? Paymanta mañakuspan. Jesusqa sapa kutillanmi papanwan rimaq. Juj kutinmi ‘orqoman sapallan wicharan Diosmanta mañakuq. Tutaña karan chaypas, sapallanmi chaypi mañakuran’ (Mateo 14:23).

¿Maypin qanpas sapallayki Dioswan rimawaq?... Yaqapaschá rimawaq manaraq puñushaspa. Jesusmi niran: ‘Mañakuyta munaspaqa cuartoykiman jaykuy, jinaspa punkuykita wisq’amuspa Yayaykimanta mañakuy’, nispa (Mateo 6:6). ¿Sapa ch’isinchu mañakunki puñunaykipaq?... Chaytan ruwanayki.

Jesusqa mañakuqmi papanmanta juj runakunawan kaspapas. Chaytan ruwaran amigon Lázaro wañupuqtin. Payta p’ampasqanku cercapin juj runakunawan kuska Diosmanta mañakuran (Juan 11:41, 42). Qatikuqninkunawan juñukuspapas mañakuqmi papanmanta. ¿Rishankichu Diosmanta yachanapaq juñukuykunaman? ¿Uyarikushankichu chaypi Diosmanta mañakusqankuta?... Juñukuypiqa kuraq runakunan mañakunku. Chaypin Dioswan rimanku, chaymi ch’inlla uyarinayki. Ichaqa rimayta tukuqtinkun ninanchis “amén” nispa. ¿Imarayku “amén” ninanchis?... Chayta nispan rikuchisun mañakusqan gustawasqanchista.

Jesusqa manaraq mijushaspan papanta “gracias” niq. Noqanchispas manaraq mijushaspan Jehová Diosta “gracias” ninanchis. Qan, ¿agradecekunkichu Diosta?... Kuraqkunawan kanki chayqa, paykunan Diosta “gracias” ninqaku. Ichaqa, sapallayki kanki otaq Diosta mana agrecedekuq runakunawan kanki chayri, ¿imatan ruwanki manaraq mijushaspa?... Arí, sapallaykin Diosta “gracias” ninayki.

¿Uyariwasunmanchu Dios sonqonchis ukhullapi mañakuqtinchis?... Chayta kutichinapaq Nehemiasmanta yachasun. Payqa Jehová Diostan adoraran, Persia llaqtapi Artajerjes reypaqtaqmi llank’aran. Juj kutinmi yacharuran Jerusalén llaqtapi perqakuna thunisqa kasqanta. Chaymi payqa sinchi llakisqa kasharan.

Reymi Nehemiasta tapuran: ‘¿Imaraykun llakisqa kashanki?’, nispa. Chaypin Nehemías sonqollanpi Jehová Diosmanta mañakuran. Jinan reyman willaran llaqtanpi sucedesqanta, valekurantaq: ‘Llaqtayman kachaway’, nispa. ¿Iman sucederan?...

Diosqa uyariranmi Nehemiaspa mañakusqanta, chaymi reyqa munallaran rinanta. Jinaspapas askha k’aspikunatan qoran llaqtanpi perqata sayarichinanpaq. Arí, Diosqa uyarinmi sonqollanchispi mañakusqanchistapas (Nehemías 1:2, 3; 2:4-8).

¿Imaynatan Diosmanta mañakusunman? ¿K’umuykuspa? ¿Qonqorikuspa? ¿Icha sayaspachu?... Jesusqa mayninpin qonqorikuspa mañakuq maynintaq sayaykuspa. Mayninqa janaq pachata qhawaspan mañakuq Lazaropaq mañakusharan jinata.

Noqanchisri, ¿imaynatan Jehová Diosmanta mañakunanchis?... Arí, mayninqa k’umuykuspan ñawinchista ch’illmispa mañakusunman. Maynintaq Jesús jina qonqorikuspa mañakusunman. Jinaspapas mañakusunmanmi p’unchaytapas tutatapas munasqanchis horapi. Ichaqa manan ninanchischu: “Diosqa manan uyariwanchu”, nispaqa. Payqa uyariwanchispunin. ¿Creenkichu chayta?...

¿Imakunatan Diosmanta mañakusunman?... A ver, ¿imakunatan qan mañakunki?... Jehová Diosqa imaymanatan qowanchis ¿riki? ¿Agradecekunanchischu chaykunamanta?... Arí, agradecekunanchismi. ¿Agradecekurankichu jayk’aqllapas unumanta, plantakunamanta, sach’akunamanta, munay t’ikakunamantapas?... Diosmi chaykunatapas ruwaran.

Juj kutinmi amigonkuna Jesusta niranku: “Yachachiwayku mañakuyta”, nispa. Chaypin Jesús yachachiran imakuna mañakunata. ¿Yachankichu qan?... Yachanapaq maskhasun Mateo librota, 6 capitulota, 9-13 versiculokunata. Chay mañakuytan nikun “Yayayku” nispa. Chay textota leesun.

Chaypin Jesús yachachiran ñaupaqtaqa Diospa sutinpaq mañakuyta. Chaymi mañakunanchis sutin ancha respetasqa kananpaq. ¿Yachankichu Diospa sutinta?... Arí, sutinmi Jehová. Chay sutintan noqanchispas anchata respetananchis.

Chay qhepamanmi yachachiran Diospa gobiernonta mañakunapaq. Chay gobiernota mañakuyqa ancha importanten. Chay gobiernon kay allpata paraisoman tukuchinqa. Chaypiqa sumaq kausaymi kanqa.

Chaymantapas yachachiranmi Diospa munaynin kay pachapi ruwakunanpaq mañakuyta. Chaymi noqanchispas Diospa munayninta ruwananchis.

Jesusqa yachachiranmi sapa p’unchaypaq mijuna mañakuytapas. Jinaspapas niranmi mana allinkuna ruwasqanchismanta perdonta mañakunapaq. Ichaqa ñaupaqtan perdonananchis contranchispi mana allinkuna ruwaqta. Qanpaq, ¿facilchu jujkunata perdonay?...

Chaymantapas Satanasmanta librawananchispaqmi Jehová Diosmanta mañakunanchis. Tukuy chaykuna mañakuytan Jesús yachachiran.

Jehová Diosqa uyarinpunin mañakusqanchista. Ichaqa manan imatapas mañakunallapaqchu paywan rimana. Imaymana qowasqanchismantan “gracias” ninallanchistaq. Payqa kusikunmi tukuy sonqowan chayta niqtinchis, tukuy allinkuna mañakusqanchistataqmi qowasun. ¿Creenkichu chaypi?...