CAPÍTULO 35

¿Imatan ruwayman Diospa amigon kanaypaq?

Jehová Diospa amigon kayqa imamantapas ancha valorniyoqmi, chaytan Gabrielqa sut’ita repararan llakipi tarikushaspa. Gabrielmi nin: “Chunka iskayniyoq wataypi kashaqtiymi papayqa wasiykumanta ripuran, jinan Jehová Diosta juj tuta unayta rogakurani papayta kutichimunanpaq”, nispa.

Gabrielqa sinchi llakisqan chay tuta kasharan, jinan Bibliata leeran chaypin kay sumaq simikunata tariran: “Qanmanmi mana kallpayoqqa jap’ipaykukun, qanqa mana piniyoqtaqa [otaq mana taytayoqtaqa] yanapallankipunin”, nispa (Salmos 10:14). Chayta yachasqanqa anchatan Gabrieltaqa yanaparan, jinan niran: “Chayta leespan repararani Jehová Dios yanapawashasqanta, pay taytay kasqantapas, Jehová Diosmi pimantapas aswan allin taytaqa”, nispa.

Qanpas Gabriel jinapaschá llakisqa kashanki. Imaynapiña tarikushanki chaypas, Jehová Diosqa munanmi amigon kanaykita. Bibliapin niwanchis: “Diosman achhuykuychis jinan paypas qankunaman achhuykamusunkichis”, nispa (Santiago 4:8). Chaypi leesqanchis jina Jehová Dios kikinmi paypa amigon kananchispaq invitawanchis. Manaña payta rikunchischu, manaña imapaschu ñaupanpi kanchis chaypas payqa munanmi amigon kananchista.

Ichaqa Dioswan amigontin kananchispaqqa imaymanatan ruwananchis. Kaypi piensarisun, ¿jayk’aqllapas plantarankichu juj t’ikachata? Chay t’ika allinta wiñananpaqqa cuidanaykin unutapas jich’anaykin, jinallata saqewaq chayqa ñak’erapunmanmi. Jinallataqmi Dioswan amigontin kananchispaqpas imaymanata ruwananchis.

Bibliatan estudianayki

Piwanpas allin amigontin kananchispaqqa paywanmi parlarinanchis, uyarinanchistaqmi imachus niwasqanchista. Diosninchiswan amigontin kananchispaqpas paypa nisqantan uyarinanchis. Ichaqa, ¿imaynatan payta uyarisunman? Bibliata estudiaspan (Salmos 1:2, 3).

Nishankipaschá: “Wayyy, estudiayqa manan gustawanchu”, nispa. Yaqapaschá qanmanqa astawan gustasunki televisionta qhaway, videojuegos nisqapi pujllay, amigoykikunawan pujllay. Ichaqa Diospa amigon kayta munanki chayqa kallpachakunaykin Bibliata estudianaykipaq.

Qallariypiqa yaqapaschá Bibliata leeyqa sasa kanqa, pisi-pisimantan ichaqa atillanki. Manaña librokuna leey gustasunkichu chaypas, tiempowanqa yaqapaschá gustapusunki. Bibliata leenaykipaqqa tiempoykitan t’aqanayki kanqa. ¿Imaynatan chayta ruwawaq? Laispa ruwasqanta jinan ruwawaq, paymi nin: “Noqaqa horariotan churakurani tutamantanta Bibliamanta juj capitulota leenaypaq”, nispa. Mariapas manaraq puñuq ripushaspan Bibliata leen, payqa 15 watanpin kashan.

Qanri, ¿ima ratopin Bibliata leenki? Chaypaqqa 292 paginapi recuadron yanapasunkiman. Chayta qhawasqayki qhepaman kay libropi anotay ima horastas Bibliata leenki chayta.

․․․․․

Horariota churakurankiña Bibliata estudianaykipaq chaypas, mayninpiqa manapaschá entiendenkichu Bibliapi nisqanta. Chaymi pasaran Jezreelta, payqa chunka jujniyoq watanpin kashan, paymi nin: “Bibliamanta wakin leesqaytaqa manan entiendeqchu kani”, nispa. Chhaynaña kaqtinpas manan saqenaykichu Biblia estudiayta. Bibliata estudiaspan uyarishanki ancha allin amigoyki Jehová Diosta. Tiempowanqa entiendellankin Bibliapi leesqaykita, kusikunkitaqmi estudiaspayki.

Dioswanmi sapa kutilla rimanayki

Diosman mañakuspaqa paywanmi parlashanchis. Chay ruwayqa may munaymi. Jehová Dioswanqa imay ratopipas parlawaqmi, tutapipas p’unchaypipas. Payqa liston kashan uyariwananchispaq. Chaymi Bibliapiqa niwanchis: “Rogakuspa, graciasta qospa ima Diosman willakuychis imachus necesitasqaykichista”, nispa (Filipenses 4:6).

Chhaynaqa Diosmanqa willakuwaqmi tukuy ima llakichisqasuykita, imachus ruway munasqaykitapas. Chaymantapas agradecekunaykin qanrayku tukuy imaymana ruwasqanmanta. Mayqen amigoykipas qanrayku imatapas ruwaqtinqa agradecekunkin ¿riki?. Jehová Diosqa llapa amigonchiskunamantapas astawanraqmi yanapawanchis (Salmos 106:1).

¿Imakunamantan Jehová Diosta agradecekunki? Chayta kaypi qelqay:

․․․․․

Sichus imamantapas nishuta llakikushanki otaq manchakushanki chayqa, kaytan ruwanayki: ‘Diosmanmi llakipakuyniykikunata saqenayki, paymi qaqata sayachisunki, manan jayk’aqpas chanin runataqa urmachisqa kananta munanqachu’ (Salmos 55:22).

Imakunatan Diosman willayta munanki, chayta kaypi qelqay:

․․․․․

Imakunapin Jehová Dios yanapashasunki chayta reparay

Juj kutinmi David kay takita qelqaran: “Reqsiykuychis, jinaspa rikuychis may sumaqchus Señor Diosqa kashasqanta”, nispa (Salmos 34:8). Kay takita manaraq qelqashaspaqa imaymana llakikuykunapin Davidqa tarikusharan. Rey Saulmi paytaqa wañuchiyta munaran jinan mana wañunanpaq enemigonkunaq tiyasqan llaqtaman ayqekuran. Enemigonkunaqa ratullan Davidta reqsiruranku jinan wañuchiyta munaranku. ¿Imatan David ruwaran enemigonkunamanta salvakunanpaq? Locoyapuq runamantan pasachikuran jinan chay llaqtamanta qarqomuranku (1 Samuel 21:10-15).

Davidqa mana payllamantachu salvakuran aswanpas Jehová Diosmi yanaparan, chaytan Davidqa Bibliapi sut’ita qelqaran, paymi niran: “Señor Diosmanmi wajakurani, paytaq kutichimuwaran, lliu manchakusqaymantan librawaran”, nispa (Salmos 34:4). Payqa allintan repararan Jehová Dios yanapasqanta, chaymi niran: “Reqsiykuychis, jinaspa rikuychis may sumaqchus Señor Diosqa kashasqanta”, nispa.a

Imapi tarikushaqtiykin Jehová Dios yanaparasunki chayta kaypi qelqay. Chaytaqa yaqapaschá juj kutilla repararanki otaq sapa kutilla:

․․․․․

Sapankanchismi kallpachakunanchis Jehová Dioswan amigontin kananchispaq. Wakin wayna-sipaskunaq tayta-mamanqa Jehová Diospa testigokunan kanku, paykunan wawankuta yanaparanku Jehová Diosta munakunankupaq. Chaywanpas sapankanchismi Jehová Dioswan amigontin kananchispaqqa imaymanata ruwananchis. Chhaynaqa, ¿imakunatan ruwashankiña Jehová Dioswan amigontin kanaykipaq? ¿Ruwashankichu icha manaraqchu? Manaraq ruwashankichu chayqa, kay capitulopi yachasqaykin yanapasunki. Chayta ruwanki chayqa Jehová Diosqa anchatan bendecisunki, Bibliapin nin: “Diosmanta mañakushallaychis, chaskinkichismi; maskhashallaychis, tarinkichismi; punkutapas takashallaychis, kicharimusunkichismi”, nispa (Mateo 7:7).

ÑAUPAQ KAQ LIBROPIN 38, 39 CAPITULOKUNAPI ASTAWAN CHAYMANTA YACHANKI

[Willakuy]

KAYPI NISQANTA AMA QONQAYCHU

“Kusisqa kachunku Diosta necesitasqankuta reparakuqkunaqa, paykunaqmi janaq pacha gobiernoqa” (Mateo 5:3).

KAYTAN RUWAWAQ

Bibliata juj watallapi leespa tukunaykipaqqa sapa p’unchaymi leenayki tawa paginakunata.

¿KAYTA YACHARANKICHU?

Jehová Diosqa paypa amigon kananchistan munan chaymi Bibliata qowaranchis. Kay libroqa Bibliaq nisqanman jinan yachachishan, chaypi nisqanta leespa kasukuspayki iman rikuchishanki Jehová Diospa amigon kay munasqaykita (Juan 6:44).

¡RUWAYTA QALLARIY!

Bibliata allinta estudianaypaq kayta ruwasaq: ․․․․․

Diosmanta sapa kutilla mañakunaypaq kayta ruwasaq: ․․․․․

¿Ima nispan papayta otaq mamayta tapuyman kaypi yachasqaymanta? ․․․․․

¿IMA NIWAQMI?

● ¿Imakunatan ruwawaq Bibliata estudiaspa kusikunaykipaq?

● ¿Imaraykun Jehová Dios uyariyta munan juchasapa runakunaq mañakusqanta?

● ¿Imatan ruwawaq Diosman mañakusqayki aswan allin kananpaq?

[Willakuy]

Evan nin: “Erqellaraq kashaqtiyqa kaqllatan sapa p’unchay Diosmanta mañakuq kani, kunanmi ichaqa sapa p’unchay imachus pasawasqanta Diosman willakuni”, nispa.

[Recuadro]

Bibliaq yachachisqanta allinta estudiay

1. Bibliapi kaq ima willakuymantan yachayta munanki chayta ajllay. Chay willakuymanta allinta yachanaykipaqqa Jehová Diospa yanapaynintan mañakunayki.

2. Tukuy yuyaywanmi leenayki. Manan phaway-phawayllachu leenayki, aswanpas leeshaspaykin piensanayki chay runakunawanpas kashawaq jinata, chay llaqtapipas kashawaq jinata, mijusqanku mijunatapas mijuysikushawaq jinata. Chayta ruwanki chayqa, kusikunkin Bibliata estudiaspayki.

3. Tapukuy. Leesqayki qhepamanmi tapukunayki:

● ¿Imaraykun Jehová Dios Bibliapi chay willakuyta qelqachiran?

● ¿Mayqen runakunan noqapaq allin ejemplo kanku, mayqenkunataqmi mana?

● ¿Imakunatan kay leesqaypi yacharani?

● ¿Imatan kay leesqay Jehová Diosmanta yachachiwan?

4. Jehová Diosman willay. Imakunatas yacharanki, imaynatas chayman jina kausawaq chayta Jehová Diosman willay. Chaymantapas Bibliamantan agradecekunanchis.

[Dibujo]

“Simiykiqa purinaypaq lamparan, simiykiqa ñanniypaq k’anchaymi” (Salmos 119:105).

[Recuadro]

¿Imatan ñaupaqta ruwanayki?

¿Sapa kutillachu ninki: “Manan tiempoy kanchu Diosmanta mañakunaypaq Bibliata leenaypaqpas”, nispa? Chhaynapi mana tarikunaykipaqqa yachanaykin imatas ñaupaqta ruwanaykita.

Kayta ruway: Juj baldeman churay jatunkaray rumikunata chaymantataq aqotawan jich’aykuy junt’anankama. Kusa, chhaynaqa juj baldemanmi rumikunata aqotawan junt’achiranki.

Kunanqa chay baldemanta rumitawan aqotawan orqoy jinaspa jujmanta churay, ichaqa ñaupaqta churay aqota chaymantataq rumikunata. Reparasqayki jina manan llapa rumikuna jaykuyta atinchu. ¿Imaraykun mana jaykuyta atinchu? Aqota ñaupaqta churasqaykirayku.

¿Imatan kay ruwasqaykimanta yachawaq? Sichus pujllayta chay jina juj ruwaykunatapas ñaupaqta ruwanki chayqa,, manan tiempoyki kanqachu aswan allin kaqkunata ruwanaykipaq, jujnin ancha allin ruwayqa Bibliata leeymi. Chaymi kikin Bibliapi nishan: ‘Aswan allin kaqkunatapas allinta reparaychis’, nispa (Filipenses 1:10). Sichus chay yachachikuyman jina ruwanki chayqa, kanqan tiempoyki Bibliata leenaykipaq, Diosmanta mañakunaykipaq, pujllanaykipaqpas. Ama qonqankichu ñaupaqtaqa aswan allin ruwaykunatan ruwanayki.