Yachachiq kallpachaq takikuna

SALMOS libroqa huk librokunamanta aswan askhan, waranqa watapi hinataqmi qelqakurqan. Chay takikunata qelqaqkunaqa allin iñiyniyoq runakunan karqanku. Qelqasqankupin rikuchirqanku kusikusqankuta, ñak’arisqankuta, agradecido kasqankuta, huchankumanta pesapakusqankuta, Dios hatunchasqankuta, llakikusqankutawan. Paykunaqa munakurqankun Diosta, amigonkuta hinataqmi payta rikurqanku. Qhawarisun imakunamantan Salmos qelqa rimashan chayta.

Ancha Hatun Kamachikuq Diosqa hatunchanapaq yupaychanapaq hinapunin. Salmo 83:18 texton nin: “Qanllapuni Señor Diosqa kasqaykita yachachunku, qanllapuni teqsimuyuntinpi Ancha Hatun Dios kasqaykita reqsichunku”, nispa. Salmo takiqa Diostan hatunchan hanaq pachata, ch’askakunata, kay pachapi kawsaqkunata, cuerponchista ima kamasqanrayku (Salmos 8, 19, 139, 148). Askha qelqaqkunan Jehová Diosta hatuncharqanku payman sonqollikuqkunata cuidasqanrayku. Hukkunataq takirqanku chanin Dios kayninpi pisichasqakunata yanapasqanrayku, hinallataq millay runakunata castigasqanrayku (Salmos 11, 68, 146).

Munakuqninkunatan yanapan kallpachantaqmi kanpas. 23 Salmopin aswan allin reqsisqa taki tarikun. Chay takipin Jehová Taytanchista rikch’anachin ovejankunata sumaqta pusaq michiqwan. Salmo 65:2 textopin willan Jehová Dios ‘mañakusqata uyariq’ kasqanta. Hatun huchaman urmaqkunapas 39, 51 Salmokunapin kallpachayta tarinku. Chay textokunapin David rikuchin hatun huchaman urmasqanmanta anchatapuni pesapakusqanta, Diospa pampachananpi confiasqantapas. Salmo 55:22 texton kallpachawanchis Diospi hap’ipakunanchispaq ima sasachakuyninchistapas paypa makinpi saqenanchispaq.

Mesiaspa kamachikusqanwanmi sumaq kawsayta apamunqa. Salmos qelqan askha kutita willan Diospa prometesqan Rey Mesiasmanta. 2 Salmopin willan chay Kamachikuq pay contra sayariq runakunata ch’usaqyachinanta. 72 Salmopin willallantaq yarqayta, mana chanin kayta, ñak’ariykunatapas chinkachipunanmanta. Salmo 46:9 texton willan guerrakunatapas llapa armakunatapas chinkachipunanmanta. 37 Salmopitaq willan chay tiempopi millay runakuna manaña kapunanta, chanin runakunalla kay pachapi wiñaypaq kawsanankutawan.

(Salmos.)