Apostolkunaqa mana manchakuspan predicarqanku

JESÚS hanaq pachaman kutipusqanmanta chunka p’unchay qhepamanmi, 33 watapi Pentecostés fiesta p’unchay 120 cristianokuna huñunasqa kasharqanku. Chayllamanmi sinchi wayraq suenasqan hina uyarikurqan, hinaqtinmi llapallanku huk rimaykunapi rimayta qallarirqanku Diospa espiritun paykunaman hunt’aykusqanrayku.

Jerusalén llaqtapin kasharqanku askha nacionkunamanta fiestaman hamuq runakuna. Chaymi Jesuspa qatikuqninkuna huk rimaykunapi rimasqankuta uyarispa anchata admirakurqanku. Apóstol Pedron paykunaman willarqan profeta Joelpa nisqan hunt’akushasqanta. Paymi willasqaña santo espiritunta serviqninkunaman Dios kachaykamuqtin musphanapaq ruwaykuna ruwanankuta (Joel 2:28, 29). Chaypin yachakurqan Israel llaqtaq rantinpi cristianokuna Diospa akllakusqan llaqta kapusqankuta. Chay p’unchaymantapachan Diosta serviy munaqkunaqa cristiano kapunanku karqan.

Cristoq enemigonkunan paykunata qatiykachayta qallarirqanku. Huk kutinmi wakinta carcelpi wisq’arqanku, ichaqa chay tutan Diospa angelnin paykunata kacharispa kamachirqan predicashanallankupaq. Illarimuqtin hinan Dios yupaychana wasiman haykuspa Jesusmanta rimarqanku. Chayta rikuspan religionpi umalliqkuna kamachirqanku amaña predicanankupaq. Apostolkunan ichaqa mana manchakuspa kutichirqanku: “Diostan ñawpaqtaqa kasunayku, manan runakunatachu”, nispa (Hechos 5:28, 29).

Chayta uyarispankun astawanraq qatiykacharqanku. Wakin judiokunan ‘Diospa contranpin rimashan’ nispa, Estebanta rumiwan ch’aqeshaspalla wañuchirqanku. Chaytan qhawasharqan cristianokunata cheqnikuq Tarso llaqtayoq Saulopas. Qhepamanmi Saulo Damasco llaqtata rirqan lliw cristianokunata presota hap’imunanpaq. Ichaqa ñanta rishaqtinmi hanaq pachamanta k’anchay ñawsayachirqan, hinan huk kunkata uyarirqan: “¡Saulo! ¡Saulo! ¿Imanaqtinmi qatiykachawanki?” niqta. Chaymi Sauloqa nirqan: “Señor, ¿pitaq kanki?” nispa. Hinan kutichirqan: “Jesusmi kani”, nispa (Hechos 9:3-5).

Kinsa p’unchay qhepamanmi Jesusqa Ananiasta kacharqan Sauloq ñawinta qhawarichinanpaq. Sauloqa bautizakuspan tukuy sonqowan predicayta qallarirqan. Qhepamantaq apóstol Pablo sutiwan reqsisqa kapurqan, payqa allin misioneron karqan.

Jesuspa qatikuqninkunaqa judiokunaman Samaria runakunallamanwanmi Diospa Gobiernonmanta willaqku. Ichaqa huk p’unchaymi Roma ejercitopi umalliq Cornelioman huk ángel rikhurirqan, hinan apóstol Pedrota waqyachirqan. Chaymi Pedroqa hukkunapiwan chay Dios sonqo runaman familianmanwan predicarqanku. Apóstol rimashaqtinmi Cornelioman familianmanwan santo espíritu hunt’aykurqan, hinan Pedroqa kamachirqan Jesuspa sutinpi bautizasqa kanankupaq. Chay p’unchaymantapachan lliw nacionkunapi runakunaman predicakushan wiñay kawsayman aypanankupaq.

(Hechos 1:1–11:21.)