¿Imaraykun “Jehová Diospa testigon” nisqa sutiyoq kayku?

Askha runakunan ninku: “Chayllaraqmi Jehová Diospa testigonkunaqa rikhurimun”, nispa. Ichaqa 2.700 watakuna ñawpaqtaraqmi cheqaq Dios serviqkunata nikurqan ‘testigokuna’ nispa (Isaías 43:10-12). 1931 wata ñawpaqtaqa Biblia Estudiaqkuna nisqa sutiyoqmi karqayku. Chhaynaqa, ¿imaraykun “Jehová Diospa testigon” nisqa sutiyoq kapurqayku?

Pichus Diosniyku kasqantan rikuchin. Ñawpa k’uyukunapiqa waranqa-waranqa kutitan Diospa sutin rikhurin. Ichaqa askha t’ikrasqa Bibliakunapin sutinpa rantinpi Señor otaq Dios nispalla nin. Jehová Diosqa Moiseswan rimaspan pay kikin nirqan: “Kay sutiywanmi wiñay-wiñaypaq reqsiwanqaku”, nispa (Éxodo 3:15).a Chaypin Diosqa pantasqa dioskunamanta hukniray kasqanta reqsichikurqan. Ñoqaykuqa anchatan kusikuyku Diospa sutinta apaspa.

Ruwasqaykutan rikuchin. Abelmantapachan askha runakuna Jehová Diospi iñisqankumanta hukkunaman willarqanku. Chay “ancha askha” testigokuna ukhupin tarikunku Noé, Abraham, Sara, Moisés, David ima (Hebreos 11:4–12:1). Imaynan huk runa mana huchayoq runamanta juzgadopi cheqaqta willan, chay hinatan ñoqaykupas Diosniykumanta cheqaqta willayku.

Jesusta qatikusqaykutan rikuchin. Biblian Jesusta sutichan ‘cheqaq rimaq hunt’aq testigo’, nispa (Apocalipsis 3:14). Pay kikinmi willarqan Taytanpa sutin yachachisqanmanta, Diosmanta ‘cheqaq-kayta willananpaq’ hamusqanmantapas (Juan 17:26; 18:37). Chaymi cheqaq qatikuqninkunapas Diospa sutinta apananku, hukkunamantaq yachachinanku. Chayta ruwanaykupaqmi Testigokuna kallpachakuyku.

• ¿Imaraykun Jehová Diospa testigonkuna nisqa sutiyoq kapurqayku?

• ¿Hayk’aqmantapachan kay Hallp’api Jehová Diospa testigonkuna karqan?

• ¿Pin aswan hatun Testigo karqan kay Hallp’api?