¿Imaynapin Bibliapi cheqaq yachayta tarirqanku?

Biblian willarqan Cristoq wañupusqan qhepaman cristianokuna ukhupi pantasqata yachachiqkuna rikhurinanta. Chay runakunan cheqaq yachachikuyta waqllichipunanku karqan (Hechos 20:29, 30). Chayqa hunt’akurqanmi, llulla yachachiqkunan Jesuspa yachachisqanta pantasqa yachachikuykunawan taqrurqanku, chhaynapitaq “cristianon kayku” niq religionkuna rikhurirqan (2 Timoteo 4:3, 4). Chhaynaqa, ¿imaynapin yachakun Bibliamanta yachasqayku cheqaqpuni kasqanta?

Diosmi cheqaq yachayta mast’ariyta qallarirqan. Diosmi willarqanña p’uchukay tiempopi ‘cheqaq yachay askhayananta’ (Daniel 12:4, Traducción del Nuevo Mundo). 1870 watapin huk pisi t’aqa runakuna cheqaq yachayta maskhaspa repararqanku, iglesiakunapi mana Bibliaq nisqanman hinachu yachachisqankuta. Chaymi imatapunichus Bibliaq yachachisqanta t’aqwirirqanku, Jehová Diostaqmi yanaparqan cheqaq yachayta tarinankupaq.

Allin sonqoyoq runakunan Bibliata allinta t’aqwirqanku. Biblia Estudiaqkunaqa sapanka temamantan Bibliata t’aqwiqku, chaytan kunanpas ruwayku. Sasa entiendena textota tarispaqa huk textokunatawanmi maskhaqku chayta entiendenankupaq, llapa t’aqwisqanku textokuna Bibliaq yachachisqanwan tupaqtintaq chayta qelqaqku. Chhaynapin kikin Bibliapi cheqaq kaqta tarirqanku Diospa sutinmanta, Gobiernonmanta, runakunapaq Hallp’apaqpas imachus munasqanmanta, wañusqakuna imaynapi tarikusqankumanta, kawsarimpuy suyakuymantawan. Bibliata t’aqwisqankun kacharichirqan pantasqa yachachikuykunamanta mana allin costumbrekunamantapas (Juan 8:31, 32).

1879 watapin entienderqanku Hallp’aq k’uchunmanta huk k’uchunkama cheqaq yachayta willananku kasqanta. Chay watapin Qhawaq, Jehová Diospa Gobiernonmanta Willashan nisqa revistata horqomuyta qallarirqanku. Kunanqa 240 nacionkunapi llaqtakunapi iman, 750 más simikunapi chay cheqaq yachachikuykunata willakushan. ¡Manan hayk’aqpas chay hinataqa kay Hallp’api willakurqanchu!

• ¿Iman sucederqan Cristoq wañupusqan qhepaman?

• ¿Imaynapin Bibliapi cheqaq yachayta tarirqayku?